| e-texts navigator |
| Wylie |
199b1 ང་རྒྱལ་གྱི་ལས་སོ། །བདག་ནི་འདོད་པ་ཆུང་བ། ཆོག་ཤེས་པ། རབ་ཏུ་དབེན་པ་ལ་དགའ་བའོ། །སྙམ་པ་དེ་ནི་ང་རྒྱལ་གྱི་ལས་སོ། །བདག་ནི་སྦྱིན་གནས་སྨྲ་བ། བདག་ནི་དགོན་པ་པོ་ཡོ་བྱད་བསྙུངས་པའོ་སྙམ་དུ་རློམ
199b2 སེམས་སུ་བྱེད་ཅིང་རྣམ་པར་རྟོག་པ་དེ་ནི་ང་རྒྱལ་གྱི་ལས་སོ། །བདག་ནི་སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་ལ་གནས་པའོ་སྙམ་པ་དེ་ནི་ང་རྒྱལ་གྱི་ལས་སོ། །བདག་ནི་བདེན་པར་སྨྲ་བའོ། །ཡང་དག་པར
199b3 སྨྲ་བའོ། །ཇི་ལྟར་སྨྲས་པ་དེ་ལྟར་བྱེད་པའོ་སྙམ་པ་དེ་ནི་ང་རྒྱལ་གྱི་ལས་སོ། །བདག་ནི་བདུད་ཀྱི་ལས་ལས་ཡང་དག་པར་འདས་ལ། བདུད་བཞི་དང་ལྟ་བ་ཐམས་ཅད་དང་བྲལ་ཞིང་སྐྱེ་བ་མེད་པ་ལ་བཟོད་པ་ཉམས་སུ་བླང་ངོ་སྙམ་པ་དེ་ནི
199b4 ང་རྒྱལ་གྱི་ལས་སོ། །བདག་གིས་བྱང་ཆུབ་རྟོགས་ནས་ཆོས་ཀྱི་འཁོར་ལོ་བསྐོར་ཏེ། སེམས་ཅན་རྣམས་ཐར་པར་བྱས་ནས་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་བཟླའོ་སྙམ་དུ་གང
199b5 རློམ་སེམས་སུ་བྱེད་ཅིང་རྣམ་པར་རྟོག་པར་དེ་དག་ཐམས་ཅད་ནི་ང་རྒྱལ་གྱི་ལས་ཏེ། རྣམ་པར་འཕྲུལ་པའི་རྒྱལ་ཇི་ཙམ་དུ་ཡིད་ཉེ་བར་སྤྱོད་པ་དང་། སེམས་མཐོང་བ་དང་དམའ་བ་དང་། རྣམ་པར་ཤེས་པར་བརྟགས་པ་དེ་ཙམ་དུ་ང་རྒྱལ
199b6 གྱི་ལས་སོ། །རྣམ་པར་འཕྲུལ་པའི་རྒྱལ་པོ་དེ་ལ་ཡེ་ཤེས་ཀྱི་ལས་གང་ཞེ་ན། གང་ལ་ཡིད་ཀྱི་ཉེ་བར་སྤྱོད་པ་མེད། སེམས་ཀྱི་མེད། རྣམ་པར་ཤེས་པའི་མེད་པ་དེ་ནི་ཡེ་ཤེས་ཀྱི་ལས་ཏེ། དེ་ཡེ་ཤེས་ཀྱིས་བྱས་པའི་ལས་རྣམས་ཀྱང
199b7 བྱེད་དོ། །བྱང་ཆུབ་སེམས་དཔའི་ལས་ཀྱང་གང་ཞེ་ན། གང་བྱང་ཆུབ་སེམས་དཔས་བྱ་བ་སྟེ། བྱང་ཆུབ་སེམས་དཔའི་ལས་ནི་རྣམ་པ་གཉིས་སོ། །གཉིས་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་ཡོངས་སུ་སྨིན་པར
199b8 བྱ་བ་དང་། དམ་པའི་ཆོས་ཡོངས་སུ་གཟུང་བའོ། །དེ་བདག་ཇི་ལྟར་ཤེས་པ་དེ་བཞིན་དུ་སེམས་ཅན་ཡོངས་སུ་སྨིན་པར་བྱེད་དེ། བདག་ཀྱང་ཇི་ལྟར་ཤེས་ཤེ་ན། བདག་ནི་གནས་མེད་པར་ཤེས་ཏེ་གང་བདག་གནས་མེད་པར་ཤེས་པ་དེ་ལ
iiif viewer powered by OpenSeadragon
