| e-texts navigator |
| Wylie |
198b1 གང་གི་ཚེ་བྱང་ཆུབ་སེམས་དཔའ་བདེན་པ་བཞི་པོ་གང་དག་ལ་ཚུལ་འདིས་རྟོགས་པ་དེ་ནི་བདེན་པ་ཤེས་པ་ཞེས་བྱའོ། །བདེན་པ་བཞི་པོ་འདི་རྣམས་ཉན་ཐོས་ཀྱི་ཐེག་པ་པ་རྣམས་དང་། རང་སངས་རྒྱས་ཀྱི་ཐེག་པ་པ་རྣམས་སྟོན་ལ། ཐེག་པ་དེ་དག་ལ
198b2 ཡང་འདོད་པར་མི་བྱེད་པ་དེ་ནི་བདེན་པ་ཤེས་པའི་རྣམ་པར་འཕྲུལ་པ་ཞེས་བྱའོ། །རྣམ་པར་འཕྲུལ་པའི་རྒྱལ་པོ་གཞན་ཡང་ཤེས་པའི་རྣམ་པར་འཕྲུལ་པ་ནི་གང་ཉན་ཐོས་ཀྱི་ཐེག་པ་ཡང་ཤེས་ལ། དེ་ལ་གནས་པར་ཤེས་པ་ཡང་མ་ཡིན
198b3 པ་དང་། རང་སངས་རྒྱས་ཀྱི་ཐེག་པ་པ་ཡང་ཤེས་ལ། དེ་ལ་གནས་པར་ཤེས་པ་ཡང་མ་ཡིན་པ་དང་། རང་སངས་རྒྱས་ཀྱི་ཐེག་པ་ཡང་ཤེས་ལ། དེ་ལ་གནས་པར་ཤེས་པ་ནི་ཤེས་པའི་རྣམ་པར་འཕྲུལ་པ་ཞེས་བྱའོ། །གཞན་ཡང་ཤེས་པའི་རྣམ
198b4 པར་འཕྲུལ་པ་ནི་གང་ཤེས་པ་གཅིག་གིས་སེམས་ཅན་ཐམས་ཅད་ཀྱི་སེམས་ཤེས་པ་དང་། སེམས་ཀྱི་ངོ་བོ་ཉིད་གཅིག་གིས་སེམས་ཅན་ཀྱི་སེམས་ཀྱི་ངོ་བོ་ཉིད་ཤེས་ལ། སེམས་དང་ཤེས་པ་ལ་གཉིས་སུ་ཡང་མི་འཇུག་པའོ། །གཞན་ཡང
198b5 ཤེས་པའི་རྣམ་པར་འཕྲུལ་པ་ནི་གང་འདས་པ་ལ་ཤེས་པ་དང་མཐོང་བ་ཐོགས་པ་མེད་ལ། འདས་པ་ལ་མ་འོངས་པའི་སེམས་འཕོ་བ་ཡང་མེད་པ་དང་། མ་འོངས་པ་ལ་ཤེས་པ་དང་མཐོང་བ་མེད་པ་ལ་མ་འོངས་པ་ལ་འདས་པའི་སེམས་འཕོ་བ་མེད་པ་དང་།
198b6 ད་ལྟར་བྱུང་བ་ལ་ཤེས་པ་དང་མཐོང་བ་ཐོགས་པ་མེད། འདས་པ་དང་། མ་འོངས་པ་དང་། ད་ལྟར་བྱུང་བ་ལ་ཡང་སེམས་སྤྲོས་པ་མེད་པའོ། །གཞན་ཡང་ཤེས་པའི་རྣམ་པར་འཕྲུལ་པ་ནི་གང་ཟག་པ་ཡང་ཤེས་ལ་དགེ་བའི་རྩ་བ་མངོན་པར་འདུ་བྱེད
198b7 པ་ལ་ཡོངས་སུ་མི་ཟད་པར་ཤེས་པ་དང་། སྐྱེ་བ་མེད་པར་ཤེས་ལ། སྡུལ་བའི་དངོས་པོ་ལ་ཡང་ཐབས་ཤེས་པ་འདི་ནི་ཤེས་པའི་རྣམ་པར་འཕྲུལ་པའོ། །གཞན་ཡང་ཤེས་པའི་རྣམ་པའི་འཕྲུལ་པ་ནི་གང་ཤིན་ཏུ་ཡོངས་སུ་མྱ་ངན་ལས་འདས་པའི
198b8 ཆོས་རྣམས་ལ་གཞན་གྱི་དྲིན་ལ་མི་འཇོག་པར་ཤེས་ཤིང་ཤེས་པའི་སྟོབས་དེས་ཀྱང་འདི་ལྟ་སྟེ། སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་ཕྱིར་ཡོངས་སུ་མྱ་ངན་ལས་འདའ་བ་འདི་ནི་ཤེས་པའི་རྣམ་པར་འཕྲུལ་པ་ཞེས་བྱའོ། །རྣམ་པར
iiif viewer powered by OpenSeadragon
