| e-texts navigator |
| Wylie |
191a1 དཔྱོད་པ་ལས་སེམས་དབང་བའི་རྣམ་པ་མངོན་པར་བསྒྲུབ་པའི་རྫུ་འཕྲུལ་གྱི་རྐང་པ་འཐོབ་སྟེ། དེ་ཤིན་ཏུ་ཆེར་མངོན་པར་འདུས་བྱས་པ་མེད་པར་རྫུ་འཕྲུལ་མངོན་དུ་འཐོབ་བོ། །དེ་འདོད་ན་སེམས་བསྐྱེད་པ་གཅིག་གིས
191a2 འཇིག་རྟེན་གྱི་ཁམས་གང་གའི་ཀླུང་གི་བྱེ་མ་སྙེད་དག་ཏུ་འགྲོ་ཞིང་དེར་སོང་བ་ཡང་ཤེས་ལ་འདི་ནས་ཀྱང་མི་གཡོའོ། །དེ་ན་ཆོས་སྟོན་པར་ཡང་སྣང་ལ་འདི་ན་གཏམ་བརྗོད་པའི་རྒྱུན་ཡང་མི་འཆད་དོ། །རྣམ་པར་འཕྲུལ་པའི་རྒྱལ་པོ
191a3 འདི་ནི་བྱང་ཆུབ་སེམས་དཔའི་རྫུ་འཕྲུལ་གྱི་རྣམ་པར་འཕྲུལ་པ་སྟེ། རྣམ་པར་འཕྲུལ་པ་དེས་རྫུ་འཕྲུལ་གྱི་ཆོ་འཕྲུལ་གྱིས་གདུལ་བའི་སེམས་ཅན་རྣམས་གདུལ་བར་བྱེད་དེ། ལྷ་ཡང་རུང་། མི་ཡང་རུང་སེམས་ཅན་གང་དག་རྟག་པར
191a4 འདུ་ཤེས་པ་དེ་དག་ལ་སྲེག་པའི་བསྐལ་པ་ཉེ་བར་སྟོན་ཏེ། དེ་ན་སྟོང་གསུམ་གྱི་འཇིག་རྟེན་གྱི་ཁམས་ཚིག་པར་དེ་དག་གིས་མཐོང་ལ་འཇིག་རྟེན་གྱི་ཁམས་དེ་ཞིག་པར་ཡང་མི་འགྱུར་རོ། །སེམས་ཅན་གང་དག་ལྷག་པའི་ང་རྒྱལ་ཅན
191a5 དེ་དག་ལ་ནི་གནོད་སྦྱིན་ལག་ན་རྡོ་རྗེའི་གཟུགས་སུ་ཉེ་བར་སྟོན་ཏེ། དེ་རྡོ་རྗེ་འབར་བ་ཀུན་ཏུ་རབ་ཏུ་མཆེད་ཅིང་འབར་བ་རབ་ཏུ་འཇིགས་པར་བྱེད་པས་དེ་དག་འཇིགས་པར་བྱས་ནས་དེ་དག་ང་རྒྱལ་མེད་པར་གྱུར་ཏེ་དེ་ལ་ཕྱག་འཚལ་ལོ། །གང་དག
191a6 འཁོར་ལོས་བསྒྱུར་བའི་ཁ་དོག་ལ་མོས་པ་དེ་དག་ལ་ནི་འཁོར་ལོས་བསྒྱུར་བའི་ཁ་དོག་དང་གཟུགས་ཀྱིས་ཆོས་སྟོན། གང་དག་བརྒྱ་བྱིན་གྱི་ཁ་དོག་ལ་མོས་པ་དེ་དག་ལ་ནི་བརྒྱ་བྱིན་གྱི་ཁ་དོག་དང་གཟུགས་ཀྱིས་ཆོས་སྟོན། གང་དག
191a7 བདུད་ཀྱི་ཁ་དོག་ལ་མོས་པ་དེ་དག་ལ་ནི་བདུད་ཀྱི་ཁ་དོག་དང་གཟུགས་ཀྱིས་ཆོས་སྟོན། སེམས་ཅན་གང་དག་ཚངས་པའི་ཁ་དོག་ལ་མོས་པ་དེ་དག་ལ་ནི་ཚངས་པའི་ཁ་དོག་དང་གཟུགས་ཀྱིས་ཆོས་སྟོན། གང་དག་ཉན་ཐོས་དང་རང་སངས་རྒྱས་ཀྱི
191a8 ཁ་དོག་ལ་མོས་པ་དེ་དག་ལ་ནི། དེ་ལྟ་བུའི་ཁ་དོག་དང་གཟུགས་ཉིད་ཀྱིས་ཆོས་སྟོན། སེམས་ཅན་གང་དག་སངས་རྒྱས་ཀྱི་ཁ་དོག་ལ་མོས་པ་དེ་དག་ལ་ནི་སངས་རྒྱས་ཀྱི་ཁ་དོག་དང་གཟུགས་ཀྱིས་ཆོས་སྟོན་ཏོ། །
iiif viewer powered by OpenSeadragon
