| e-texts navigator |
| Wylie |
190a1 ཤེས་ཏེ། དེ་ཕུང་པོ་ལྔ་ཆར་སྔོན་གྱི་མཐས་དབེན་པ་ཉིད་དང་། ཕྱི་མའི་མཐས་དབེན་པ་ཉིད་དང་། ད་ལྟར་བྱུང་བས་དབེན་པ་ཉིད་དུ་རབ་ཏུ་ཤེས་སོ། །དེ་ཆོས་ཐམས་ཅད་སྔོན་གྱི་མཐས་སྟོང་པའི
190a2 ངོ་བོ་ཉིད་དང་། ད་ལྟར་བྱུང་བས་སྟོང་པའི་ངོ་བོ་ཉིད་དང་། ཕྱི་མའི་མཐས་སྟོང་པའི་ངོ་བོ་ཉིད་དུ་རབ་ཏུ་ཤེས་སོ། །རྣམ་པར་འཕྲུལ་པའི་རྒྱལ་པོ་བྱང་ཆུབ་སེམས་དཔའ་སྔོན་གྱི་གནས་རྗེས་སུ་དྲན་པ་ནི་སྔོན་གྱི་དགེ་བའི་རྩ
190a3 བ་ཡོངས་སུ་ཉམས་པར་ཡང་མི་འགྱུར་ལ། ལས་མངོན་པར་འདུ་བྱ་བ་སྔོན་བྱས་པ་ཡང་ཡོངས་སུ་ཟད་པར་འགྱུར་རོ། །དེ་ཅིའི་ཕྱིར་ཞེ་ན། དེས་ཆོས་ཐམས་ཅད་སར་པ་མ་ཡིན་པ་དང་། རྙིང་པ་མ
190a4 ཡིན་པར་ཤེས་པའི་ཕྱིར་རོ། །དེས་ཤེས་པ་དེ་ལྟ་བུ་དང་ལྡན་པས་འདུ་བྱེད་དུ་གཏོགས་པ་རྣམས་རྨི་ལམ་ལྟ་བུར་མོས་པར་བྱེད་དེ། འདི་ལྟ་སྟེ། དཔེར་ན་རྨི་ལམ་ན་སྐྱེ་བ་དང་། འཆི་བ་དང་། བདེ་བ
190a5 དང་སྡུག་བསྔལ་རྨི་བ་དེ་བཞིན་དུ་འདུ་བྱེད་ཐམས་ཅད་ལ་མོས་པར་བྱེད་དོ། །དེ་དེ་ལྟར་མོས་པས་འཁོར་བ་ལས་སྐྱོ་བར་མི་འགྱུར་ལ། སེམས་ཅན་ཐམས་ཅད་ལ་ཡང་སྙིང་རྗེ་བར་འགྱུར་རོ། །ཆོས་ཐམས་ཅད་ལ་བཅོས
190a6 མ་འདུ་ཤེས་སུ་འགྱུར་ཏེ། དེ་འདི་སྙམ་དུ་བདག་བསྐལ་པ་སྟོང་ཕྲག་འདི་སྙེད་གཅིག་ཏུ་འཁོར་བར་གྱུར་པ་དེ་ཡང་དག་པར་མ་ཡིན་ཞིང་མེད་པའོ། །འབྱུང་བ་ཆེན་པོ་རྣམས་ནི་མེད་པས་གང་ན་འབྱུང་བ་ཆེན་པོ་རྣམས་མི་སྲིད་པའི་སེམས
190a7 ཅན་ཐམས་ཅད་ཀྱི་འཁོར་བ་ཡང་དེ་བཞིན་ཏེ། ཡང་དག་པ་མ་ཡིན་ཞིང་མེད་པའོ་སྙམ་དུ་མི་སེམས་སོ། །རྣམ་པར་འཕྲུལ་པའི་རྒྱལ་པོ་བྱང་ཆུབ་སེམས་དཔའ་དེ་སྔོན་གྱི་གནས་རྗེས་སུ་དྲན་ལ་དེ་འབྱུང་བ་རྣམས་དང་།
190a8 འདུ་བྱེད་རྣམས་མི་རྟག་པ་ཉིད་དུ་མཐོང་སྟེ། དེ་ཅིའི་ཕྱིར་ཞེ་ན། དེ་ནི་འཁོར་ལོས་བསྒྱུར་བའི་བདེ་བ་རྗེསུ་དྲན་པ་དེ་ཡང་མི་རྟག་པ་དང་འགྱུར་བའི་ཆོས་ཅན་ཡིན། བརྒྱ་བྱིན་གྱི་བདེ་བ་རྗེས་སུ་དྲན་ལ་དེ་ཡང་མི་རྟག
iiif viewer powered by OpenSeadragon
