| e-texts navigator |
| Wylie |
189a1 སེམས་ཀྱི་རང་བཞིན་ཞེ་སྡང་མ་ཡིན་པའི་ཕྱིར་རོ། །གལ་ཏེ་འཁོར་གཏི་མུག་ལ་སྤྱོད་པ་ཡིན་ན་ཡང་དེའི་སེམས་རབ་ཏུ་ཤེས་སོ། །གཏི་མུག་དང་བྲལ་བའི་སེམས་ཀྱང་ཡང་དག་པར་མཐོང་ངོ་། །དེ་ཅིའི་ཕྱིར་ཞེ་ན།
189a2 སེམས་ཀྱི་རང་བཞིན་ནི་གཏི་མུག་མ་ཡིན་པའི་ཕྱིར་རོ། །གལ་ཏེ་འཁོར་ཉན་ཐོས་ཀྱི་ཐེག་པ་ལ་མོས་པ་ཡིན་ན་ཡང་སྤྱོད་པ་དེ་ཁོ་ན་བཞིན་དུ་ཤེས་ཏེ། ཆོས་ཀྱི་དབྱིངས་ཆུང་བར་ཡང་མི་བྱེད་དོ། །གལ་ཏེ་འཁོར
189a3 རང་སངས་རྒྱས་ཀྱི་ཐེག་པ་ལ་མོས་པ་ཡིན་ན་ཡང་སྤྱོད་པ་དེ་ཁོ་ན་བཞིན་དུ་ཤེས་ཏེ། ཆོས་ཀྱི་དབྱིངས་འབྲིང་དུ་ཡང་མི་བྱེད་དོ། །གལ་ཏེ་འཁོར་ཐེག་པ་ཆེན་པོ་ལ་མོས་པ་ཡིན་ན་ཡང་སྤྱོད་པ་དེ་ཁོ་ན་བཞིན་དུ་ཤེས་ཏེ།
189a4 ཆོས་ཀྱི་དབྱིངས་མཆོག་ཏུ་ཡང་མི་བྱེད་དོ། །དེ་སེམས་ཅན་ཐམས་ཅད་ཀྱི་སེམས་ཀྱི་ཁམས་ཀྱི་སྤྱོད་པ་ཤེས་པས་ཀྱང་ཆོས་སྟོན་ལ། སེམས་ཀྱི་རང་བཞིན་ལ་རྣམ་པར་རྟོགས་པ་ཡང་མེད་དོ། །ཐེག་པ་ཐམས
189a5 ཅད་རྣམ་པར་འཇོག་པས་ཀྱང་ཆོས་སྟོན་ལ་ཆོས་ཀྱི་དབྱིངས་ཐ་དད་པར་ཡང་མི་བྱེད་དོ། །ཆོས་ཀྱི་དབྱིངས་ཐ་དད་པ་མེད་པས་ཀྱང་སེམས་ཅན་ཐམས་ཅད་ཀྱི་སྤྱོད་པ་རབ་ཏུ་ཤེས་སོ། །དེ་སེམས་ཀྱིས་སེམས་ལ་རྣམ་པར་ལྟ་ལ།
189a6 སེམས་ཀྱིས་སེམས་ལ་སྤྱོད་པར་ཡང་མི་བྱེད་ཅིང་མི་མཐུན་པར་ཡང་མི་བྱེད་དོ། །སེམས་ཅན་ཐམས་ཅད་ཀྱི་སེམས་ཀྱི་དབྱིངས་དེ་དག་ཀྱང་རབ་ཏུ་ཤེས་ཏེ། ཆོས་ཀྱི་དབྱིངས་གང་ཡིན་པ་དེ་སེམས་ཀྱི་དབྱིངས་ཡིན་པར་རབ་ཏུ
189a7 ཤེས་སོ། །རྣམ་པར་འཕྲུལ་པའི་རྒྱལ་པོ་དེ་ལྟར་ན་བྱང་ཆུབ་སེམས་དཔའ་ཕ་རོལ་གྱི་སེམས་ཤེས་པའི་མངོན་པར་ཤེས་པ་ཐོབ་སྟེ། མངོན་པར་ཤེས་པ་དེས་ལྷ་དང་བཅས་པའི་འཇིག་རྟེན་གྱི་ཁམས་མངོན་པར་ཤེས་སོ། །
189a8 རྣམ་པར་འཕྲུལ་པའི་རྒྱལ་པོ་གཞན་ཡང་བྱང་ཆུབ་སེམས་དཔའ་སྔོན་གྱི་གནས་ཤེས་པ་མངོན་སུམ་དུ་བྱེད་པའི་མངོན་པར་ཤེས་པ་འཐོབ་ཅིང་དེ་བརྗོད་པ་མེད་ལ། དབང་པོ་མཉམ་པར་བཞག་པས་སྔོན་གྱི་གནས་རྗེས་སུ་དྲན་ཏེ།
iiif viewer powered by OpenSeadragon
