| e-texts navigator |
| Wylie |
188b1 མངོན་པར་ཤེས་པ་གཉིས་པའོ། ། །།འཕགས་པ་རྣམ་པར་འཕྲུལ་པའི་རྒྱལ་པོས་ཞུས་པ། བམ་པོ་གཉིས་པ། རྣམ་པར་འཕྲུལ་པའི་རྒྱལ་པོ་གཞན་ཡང་བྱང་ཆུབ་སེམས་དཔའ་ཕ་རོལ་གྱི་སེམས་ཤེས་པའི
188b2 མངོན་པར་ཤེས་པ་འཐོབ་ཅིང་སེམས་ཀྱི་སེམས་ཅན་གཞན་དག་དང་། གང་ཟག་གཞན་རྣམས་ཀྱི་སེམས་རབ་ཏུ་ཤེས་ཏེ། འཁོར་གང་དང་གང་དུ་ཆོས་འཆད་དུ་འགྲོ་བར་དེ་དང་པོ་ཉིད་དུ་སེམས་ཅན་གང་གི་བསམ་པ་ཇི་ལྟ་བུ། སྦྱོར
188b3 བ་ཇི་ལྟ་བུ། རྒྱུ་ཇི་ལྟ་བུ། མཚན་ཉིད་ཇི་ལྟ་བུ་ཡིན་སྙམ་དུ་འཁོར་གྱི་སེམས་ལ་རྣམ་པར་ལྟ་སྟེ། བལྟས་ནས་ཀྱང་དེ་བཞིན་དུ་ཆོས་སྟོན་ཏོ། །དེ་རང་གི་སེམས་ཡོངསུ་དག་པས་འཁོར་གྱི་སེམས་ཡོངས་སུ་དག་པ་རྗེསུ
188b4 འཇུག་སྟེ། རྣམ་པར་འཕྲུལ་པའི་རྒྱལ་པོ་འདི་ལྟ་སྟེ། དཔེར་ན་མེ་ལོང་གི་དཀྱིལ་འཁོར་ཡོངས་སུ་དག་པའི་ཕྱིར་མེ་ལོང་གི་དཀྱིལ་འཁོར་ཡོངས་སུ་དག་པ་ལ་གཟུགས་སུ་སྣང་བ་ཇི་ལྟ་བུ་བསྙེན་པའི་ཁ་དོག་དང་། རྟགས་དང་། དབྱིབས
188b5 ཇི་ལྟ་བུ་ཡིན་པ་དེ་ལྟ་བུ་ཉིད་ཀྱི་གཟུགས་བརྙན་ལྷག་ཆད་མེད་པར་སྣང་སྟེ། མེ་ལོང་གི་དཀྱིལ་འཁོར་ནི་རྣམ་པར་མི་རྟོག་མི་སེམས་ཀྱང་དེ་དག་སྣང་ངོ་། །རྣམ་པར་འཕྲུལ་པའི་རྒྱལ་པོ་དེ་བཞིན་དུ་བྱང་ཆུབ་སེམས་དཔའ་ཡང་རང་གི་སེམས་ཡོངས་སུ་དག་པ
188b6 དང་། ཆོས་ཀྱི་དབྱིངས་ཀྱི་དཀྱིལ་འཁོར་ཡོངས་སུ་དག་པའི་ཕྱིར་སེམས་ཅན་རྣམས་ཀྱི་སེམས་ཀྱི་སྤྱོད་པ་ཇི་ལྟ་བུར་འབྱུང་བ་དེ་དག་ཐམས་ཅད་རབ་ཏུ་ཤེས་ཏེ། བྱང་ཆུབ་སེམས་དཔའ་རང་གི་སེམས་ལ་སྒྲིབ་པ་ཡང་མེད།
188b7 གཞན་གྱི་སེམས་ལ་སྒྲིབ་པ་ཡང་མེད་དོ། །དེ་ན་གལ་ཏེ་འཁོར་འདོད་ཆགས་ལ་སྤྱོད་པ་ཡིན་ན་ཡང་དེའི་སེམས་རབ་ཏུ་ཤེས་སོ། །འདོད་ཆགས་དང་བྲལ་བའི་སེམས་ཀྱང་ཡང་དག་པར་མཐོང་ངོ་། །དེ་ཅིའི་ཕྱིར་ཞེ་ན།
188b8 སེམས་ཀྱི་རང་བཞིན་ཆགས་པ་མེད་པའི་ཕྱིར་རོ། །གལ་ཏེ་འཁོར་ཞེ་སྡང་ལ་སྤྱོད་པ་ཡིན་ན་ཡང་དེའི་སེམས་རབ་ཏུ་ཤེས་སོ། །ཞེ་སྡང་དང་བྲལ་བའི་སེམས་ཀྱང་ཡང་དག་པར་མཐོང་ངོ་། །དེ་ཅིའི་ཕྱིར་ཞེ་ན།
iiif viewer powered by OpenSeadragon
