| e-texts navigator |
| Wylie |
186b1 ལས་འགལ་བའི་ཆོས་ལ་གནས་པ་ཡིན་ཏེ། དེ་དག་ནི་དྲང་དགོས་པ་ཡིན་ནོ། །གང་གིས་དྲང་ཞེ་ན། སྒྲས་དྲང་ངོ་། །ངེས་པའི་དོན་གྱི་མདོ་སྡེ་ལ་རྟོན་པ་དག་ནི་སྒྲས་དྲང་བ་མ་ཡིན་ནོ། །དེ་ཅིའི་ཕྱིར་ཞེ་ན། དེ་དག་གིས་དོན་དམ་པ་བརྗོད་དུ་མེད་པ་རྟོགས་ཤིང་དེ་དག
186b2 གིས་འདས་པ་དང་། མ་འོངས་པ་དང་། ད་ལྟར་བྱུང་བའི་ཆོས་ཐམས་ཅད་ལ་ལྷག་ཆད་མེད་པར་ཤེས་པའི་ཕྱིར་ཏེ། རྣམ་པར་འཕྲུལ་པའི་རྒྱལ་པོ་དོན་གྱི་རྣམ་པ་འདི་ལ་དེ་ལྟར་ཆོས་ཉིད་འདི་ལ་རྟོན་ན་མདོ་སྡེ་ཐམས་ཅད་ངེས་པའི་དོན་དུ་འགྱུར་རོ། །དེ་ལྟར་མི་རྟོན་ན་མདོ
186b3 སྡེ་ཐམས་ཅད་དྲང་བའི་དོན་དུ་འགྱུར་རོ། །རྣམ་པར་འཕྲུལ་པའི་རྒྱལ་པོ་གཞན་ཡང་བྱང་ཆུབ་སེམས་དཔའ་སངས་རྒྱས་བཅོམ་ལྡན་འདས་དེ་དག་ལས་ཆོས་ཉན་པ་ན་ཡེ་ཤེས་ལ་རྟོན་པ་ཡིན་གྱི་རྣམ་པར་ཤེས་པ་ལ་མི་རྟོན་ཏོ། །དེ་ཅིའི་ཕྱིར་ཞེ་ན། དེས་རྣམ་པར་ཤེས
186b4 པ་སྒྱུ་མ་ལྟ་བུ་དང་། དབེན་པ་དང་། ངོ་བོ་ཉིད་མེད་པ་དང་། གཟུགས་མེད་པ་དང་། བསྟན་དུ་མེད་པ་དང་། ཐོག་པ་མེད་པ་དང་། རྣམ་པར་རིག་པ་མ་ཡིན་པར་ཤེས་པའི་ཕྱིར་ཏེ། གང་རྣམ་པར་ཤེས་པ་དེ་ལྟར་རྟོགས་པ་དེ་ནི་ཡེ་ཤེས་ཡིན་ནོ། །
186b5 དེ་ཡེ་ཤེས་ལ་རྟོན་པ་ཡིན་གྱི་རྣམ་པར་ཤེས་པའི་རྗེས་སུ་མི་རྒྱུག་ཀྱང་གཞན་དག་ལ་རྣམ་པར་ཤེས་པ་དེ་སྟོན་ཏེ། དེ་ལ་མཚན་མར་ཡང་མི་འཛིན་ཅིང་དེ་རྣམ་པར་ཤེས་པ་ལ་ཡེ་ཤེས་སོ་ཞེས་ཀུན་ཏུ་སྐྱེད་དེ། རྣམ་པར་ཤེས་པ་འམ། ཡེ་ཤེས་ལ་མངོན
186b6 པར་ཞེན་པར་ཡང་མི་འགྱུར་རོ། །རྣམ་པར་ཤེས་པ་དེ་ཁོ་ན་ལ་མངོན་པར་ཞེན་པས་ཡེ་ཤེས་ཀྱི་དེ་ཁོ་ན་མི་བརྗོད་དོ། །རྣམ་པར་འཕྲུལ་པའི་རྒྱལ་པོ་བྱང་ཆུབ་སེམས་དཔའ་གང་ཡེ་ཤེས་ལ་རྟོན་པ་དེ་ནི་རྣམ་པར་ཤེས་པ་དང་ལྷན་གཅིག་མི་གནས་སོ། །སེམས
186b7 ཅན་གཞན་དག་ལ་རྣམ་པར་ཤེས་པ་མ་ཡིན་པར་ཡང་ཆོས་མི་འཆད་དོ། །རྣམ་པར་འཕྲུལ་པའི་རྒྱལ་པོ་འདི་ནི་བྱང་ཆུབ་སེམས་དཔའི་མངོན་པར་ཤེས་པའི་རྣམ་པར་འཕྲུལ་པ་ཡིན་ཏེ། ལྷའི་རྣ་བ་ཐོབ་པ་དེས་ཡེ་ཤེས་ཀྱི་དབྱིངས་འདི་རྟོགས་པར་འགྱུར་རོ། །
186b8 རྣམ་པར་འཕྲུལ་པའི་རྒྱལ་པོ་བྱང་ཆུབ་སེམས་དཔའ་དེ་གང་ཟག་གི་ཚིག་བླ་དགས་དང་ལྡན་པའི་ཆོས་ཉན་ཅིང་ཆོས་ཉིད་ལ་རྟོན་གྱི་གང་ཟག་ལ་མི་རྟོན་ཏོ། །དེ་ཅིའི་ཕྱིར་ཞེ་ན། རྣམ་པར་འཕྲུལ་པའི་རྒྱལ་པོ་གལ་ཏེ་ལེགས་པར་གསུངས་པའི་ཆོས་འདུལ
iiif viewer powered by OpenSeadragon
