| e-texts navigator |
| Wylie |
186a1 ཁ་ན་མ་ཐོ་བ་དང་བཅས་པ་དང་། ཁ་ན་མ་ཐོ་བ་མེད་པ་རྣམས་སམ། ཉན་ཐོས་ཀྱི་ཐེག་པ་དང་ལྡན་པ་འམ། རང་སངས་རྒྱས་ཀྱི་ཐེག་པ་དང་ལྡན་པ་རྣམས་སམ། ཐེག་པ་ཆེན་པོ་དང་ལྡན་པ་རྣམས་ཐོས་ནས། འདི་ལྟ་སྟེ། དབེན་པའི་དབྱིངས་རོ
186a2 གཅིག་པ་ཉིད་ཀྱི་ཕྱིར་ཆོས་དེ་དག་ཐམས་ཅད་ཆོས་གཅིག་གི་ངོ་བོ་ཉིད་ཀྱི་རོ་ཡིན་པར་འཇུག་གོ། །དེ་ཆོས་ཉན་ཅིང་འཆད་ཀྱང་ཡུལ་ཐམས་ཅད་ལ་མི་འཆགས་སོ། །ཆོས་ཀྱང་ཉན་མོད་ཀྱི་མཚན་མ་ཐམས་ཅད་དང་ཡང་ལྷན་གཅིག་ཏུ་མི་གནས་སོ། །
186a3 དེ་ཆོས་ལ་བརྟེན་པ་ཡིན་གྱིས་ཆོས་མ་ཡིན་པ་ལ་མི་བརྟེན་ཏོ། །དེ་ལ་ཆོས་གང་ཞེ་ན། ཆོས་ཤེས་བྱ་བ་ནི་འདོད་ཆགས་དང་བྲལ་བའོ། །ཆོས་ཞེས་བྱ་བ་ནི་མཚན་མ་མེད་པའོ། །ཆོས་ཤེས་བྱ་བ་ནི་འདུས་མ་བྱས་པའོ། །ཆོས་ཤེས་བྱ་བ་ནི་མཐའ
186a4 ཡས་པ། དཔེ་མེད་པ། མི་འགྱུར་བ། དམིགས་སུ་མེད་པ། མི་སྐྱེ་བ། མ་སྐྱེས་པ་སྟེ། གང་ཆོས་དེ་ལྟ་བུ་ལ་རློམ་སེམས་མེད་པ་དང་། རྟོག་པ་མེད་པ་དང་། འདུ་ཤེས་དང་། ཡིད་ཀྱི་འདུ་བྱེད་སྤྲོས་པ་མེད་པ་དང་། བླང་བ་མེད་པ་དང་།
186a5 དོར་བ་མེད་པ་དེ་ནི་ཆོས་ཞེས་བྱའོ། །དེ་དོན་ལ་རྟོན་པ་ཡིན་གྱི་ཚིག་འབྲུ་ལ་རྟོན་པ་མ་ཡིན། ཚིག་འབྲུ་སྤོང་བས་དོན་ལ་རྟོན་པ་ཡང་མ་ཡིན་ནོ། །དེ་དོན་ལ་འབབ་པའི་བློས་ཆོས་ཉན་ཏེ། ཇི་ལྟར་ན་དོན་ལ་འབབ་པའི་བློ་གང་ཞེ་ན། གང་སྟོང་པ་ཉིད་ཀྱི་དོན
186a6 གྱིས་ལྟ་བར་མི་ལྟུང་བ་དང་། གང་མཚན་མ་མེད་པའི་དོན་གྱིས་མཚན་མར་མི་ལྟུང་བ་དང་། གང་སྨོན་པ་མེད་པའི་དོན་གྱིས་སྨོན་པར་མི་ལྟུང་བ་སྟེ་དེ་ལྟར་ན་དོན་ལ་འབབ་པའི་བློ་ཡིན་ནོ། །གང་ལས་ཆོས་ཉན་པ་དང་། གང་ལས་དོན་ལ་རྟོན་པ་དེ་ཡང
186a7 དོན་དུ་མི་དམིགས་ཏེ། དེ་དམིགས་སུ་མེད་པ་ལ་ཡང་དམིགས་པར་མི་འགྱུར་རོ། །དེ་ལ་སངས་རྒྱས་བཅོམ་ལྡན་འདས་དེ་དག་ལ་ཆོས་ཉན་ཏེ། ངེས་པའི་དོན་གྱི་མདོ་སྡེ་ལ་རྟོན་པ་ཡིན་གྱི་དྲང་བའི་དོན་གྱི་མདོ་སྡེ་ལ་རྟོན་པ་མ་ཡིན་ནོ། །ངེས་པའི་དོན་གྱི་མདོ་སྡེ
186a8 གང་ཞེ་ན། བརྗོད་དུ་མེད་པའི་ཕྱིར་མདོ་སྡེ་ཐམས་ཅད་ནི་ངེས་པའི་དོན་ཏེ། དེ་ལྟར་ན་ངེས་པའི་དོན་གྱི་མདོ་སྡེ་ལ་རྟོན་པ་ཡིན་ནོ། །ངེས་པའི་དོན་གྱི་མདོ་སྡེ་འདི་དག་ལ་གང་དག་མི་རྟོན་པ་དེ་དག་ནི་དྲང་བ་ཞེས་བྱ་སྟེ། ཅིའི་ཕྱིར་དྲང་བ་ཞེས་བྱ་ཞེ་ན། འདི་ལྟར་ངེས་པའི་དོན
iiif viewer powered by OpenSeadragon
