| e-texts navigator |
| Wylie |
184a1 ཆུབ་པ་གང་། སྨྲས་པ། གཟུགས་མཉམ་པ་ཉིད་དུ་མངོན་པར་རྫོགས་པར་བྱང་ཆུབ་པ་ནི་བྱང་ཆུབ་མངོན་པར་རྫོགས་པར་བྱང་ཆུབ་པའོ། །ཚོར་བ་དང་། འདུ་ཤེས་དང་། འདུ་བྱེད་རྣམས་དང་། རྣམ་པར་ཤེས་པ་མཉམ་པ་ཉིད་དུ་མངོན་པར་རྫོགས
184a2 པར་བྱང་ཆུབ་པ་ནི་བྱང་ཆུབ་མངོན་པར་རྫོགས་པར་བྱང་ཆུབ་པའོ། །བདུད་རྣམ་པར་གནོན་པས་སྨྲས་པ། དགེ་སློང་བྱང་ཆུབ་གང་དུ་བཙལ་བར་བྱ། བྱང་ཆུབ་སེམས་དཔའ་རྡོ་རྗེ་ལྟེ་བས་སྨྲས་པ། གྲོགས་པོ་བྱང་ཆུབ་ནི་འཇིག་ཚོགས་ལ་ལྟ་བའི་ངོ་བོ་ཉིད
184a3 ལས་བཙལ་བར་བྱའོ། །སྨྲས་པ། ཇི་ལྟར་བཙལ་བར་བྱ། སྨྲས་པ། ཅི་ནས་ཀྱང་བྱང་ཆུབ་དང་བྱང་ཆུབ་ཏུ་ལྟ་བ་ཀུན་ནས་མི་ལྡན་པ་དེ་ལྟར་བཙལ་བར་བྱའོ། །དེ་ནས་བདུད་རྣམ་པར་གནོན་པས་དགེ་སློང་རྡོ་རྗེའི་ལྟེ་བ་ལ་འདི་སྐད་ཅེས་སྨྲས་སོ། །དགེ
184a4 སློང་ཁྱོད་ཀྱི་སྟོན་པ་སུ་ཡིན། སུས་རྗེས་སུ་བསྟན་པས་ཁྱོད་ཀྱི་སྤོབས་པ་འདི་ལྟ་བུར་འགྱུར། སྨྲས་པ་གྲོགས་པོ་གང་འཇིག་ཚོགས་སམ་བཤིགས་པར་བྱང་ཆུབ་ཐོབ་པ་དེ་ནི་ཁོ་བོའི་སྟོན་པའོ། །གང་ཉོན་མོངས་པ་དང་རྣམ་པར་བྱང་བ་ལ་མི་གནས་པ
184a5 དེ་ནི་ཁོ་བོའི་སྟོན་པའོ། །གང་འདུས་བྱས་དང་འདུས་མ་བྱས་ལ་རྣམ་པར་ཤེས་པ་མི་གནས་པའི་ཁོ་བོའི་སྟོན་པའོ། །གང་གཞན་ལས་མ་མཉན་པར་བླང་བ་མེད་པའི་ཆུ་བོ་མི་གནས་པ་རྒལ་བ་དེ་ནི་ཁོ་བོའི་སྟོན་པའོ། །གང་ཆོས་ཐམས་ཅད་ལ་རྣམ
184a6 པར་ཤེས་པ་མི་འཇུག་ཅིང་ཆོས་རྣམས་ལ་ཤེས་པ་མི་འཕོ་བ་དེ་ནི་ཁོ་བོའི་སྟོན་པའོ། །གང་སྒྲ་ཐམས་ཅད་ལ་འཇུག་པ་ཉེ་བར་བསྒྲུབ་ཅིང་བརྗོད་དུ་མེད་པའི་ཆོས་ཉིད་ལས་ཀྱང་མི་གཡོ་བ་དེ་ནི་ཁོ་བོའི་སྟོན་པའོ། །གང་ཆོས་ཐམས་ཅད་མི་སྐྱེ་བ་དང་སྐྱེ་བ་ཐམས
184a7 ཅད་མི་འབྱུང་བར་བྱ་བའི་ཕྱིར་ཆོས་ཀྱི་འཁོར་ལོ་བསྐོར་བ་དེ་ནི་ཁོ་བོའི་སྟོན་པའོ། །གང་ཚུལ་རོལ་དང་། ཕ་རོལ་དང་དབུས་ན་མི་གནས་པ་དེ་ནི་ཁོ་བོའི་སྟོན་པའོ། །གང་ཆོས་ཐམས་ཅད་མི་སྐྱེ་བའི་ཕྱིར་སྐྱེས་པ་དེ་ནི་ཁོ་བོའི་སྟོན་པའོ། །གང་ཆོས་ཐམས་ཅད་འགོག
184a8 པ་མེད་པའི་ཕྱིར་ཡོངས་སུ་མྱ་ངན་ལས་འདས་པ་དེ་ནི་ཁོ་བོའི་སྟོན་པ་སྟེ། དེས་རྗེས་སུ་བསྟན་པ་ལས་ཁོ་བོའི་སྤོབས་པ་འདི་ལྟ་བུར་གྱུར་ཏོ། །བདུད་རྣམ་པར་གནོན་པས་སྨྲས་པ། དེ་བཞིན་གཤེགས་པ་དེ་ཆོས་ཀྱི་འཁོར་ལོ་ཇི་ལྟར་བསྐོར། བྱང་ཆུབ་སེམས
iiif viewer powered by OpenSeadragon
