| e-texts navigator |
| Wylie |
161a1 བྱང་ཕྱོགས་དང་། དེ་བཞིན་དུ་འོག་གི་ཕྱོགས་དང་། དེ་བཞིན་དུ་སྟེང་གི་ཕྱོགས་ཏེ། དེ་ལྟར་ཕྱོགས་བཅུ་ཀུན་གྱི་ཕྱོགས་རེ་རེ་ན་དེ་བཞིན་གཤེགས་པའི་མཚན་གཅིག་པ་ཡང་གྲངས་མ་མཆིས་ལ། དེ་བཞིན་གཤེགས་པའི་མཚན་ཐ་དད་པ
161a2 ཡང་བཞུགས་སོ། །བཀའ་སྩལ་པ། གཞོན་ནུ་ཁྱོད་ཀྱིས་འཁོར་ལོས་བསྒྱུར་བའི་རྒྱལ་སྲིད་ལ་གནས་པ་དེ་བས་ཀྱང་ཆེས་ལྷག་པའི་སངས་རྒྱས་བཅོམ་ལྡན་འདས་དག་མཐོང་ངམ། གསོལ་པ་བཅོམ་ལྡན་འདས་མཐོང་ལགས་སོ། །བདེ་བར
161a3 གཤེགས་པ་མཐོང་ལགས་སོ། །དེ་ནས་ལི་ཚ་བི་གཞོན་ནུ་རིན་ཆེན་དྲ་བ་ཅན་མགུ་ཞིང་དགའ་ལ་ཡིད་རངས། རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་དེའི་ཚེ་ས་ཆེན་པོ་གཡོས་པར་གྱུར་ཏོ། །སེམས་ཅན་ཐམས་ཅད་ལ་ཕན་པ་དང་བདེ
161a4 བ་སྐྱེད་པ་དང་། སེམས་ཅན་ཐམས་ཅད་ཀྱི་སེམས་རབ་ཏུ་དགའ་བ་དང་། དགེ་བའི་རྩ་བ་སྐྱེད་པའི་སྣང་བ་ཆེན་པོ་བྱུང་བར་གྱུར་ཏོ། །ལྷ་བྱེ་བ་ཁྲག་ཁྲིག་འབུམ་ཕྲག་དུ་མ་དག་ནམཁའ་ལ་འཁོད་ནས་ལྷའི་འཛམ་བུ་ཆུ་བོའི་གསེར་གྱི་ཕྱེ་མ
161a5 རྣམས་གཏོར་ཏོ། །ཚངས་པ་བྱེ་བ་ཁྲག་ཁྲིག་འབུམ་ཕྲག་དུ་མ་དག་གིས་ཀྱང་ལྷའི་ཙན་དན་དམར་པོའི་ཕྱེ་མ་རྣམས་ཀྱིས་བཅོམ་ལྡན་འདས་ལ་གཏོར་རོ། མངོན་པར་གཏོར། མངོན་པར་རབ་ཏུ་གཏོར་ཏོ། །ལྷ་བྱེ་བ་ཁྲག་ཁྲིག་འབུམ་ཕྲག
161a6 དུ་མ་དག་གིས་ཀྱང་ལྷའི་མེ་ཏོག་ཨུད་པ་ལ་དང་། པད་མ་དང་། ཀུ་མུ་ཏ་དང་། པད་མ་དཀར་པོ་དང་། མན་དཱ་ར་བ་དང་། མན་དཱ་ར་བ་ཆེན་པོས་གཏོར། མངོན་པར་གཏོར། མངོན་པར་རབ་ཏུ་གཏོར་ཏོ། །ལྷ་བྱེ་བ་ཁྲག་ཁྲིག་འབུམ་ཕྲག་དུ་མ
161a7 དག་གིས་ཀྱང་རིན་པོ་ཆེའི་གདུགས་སྟོང་ཕུལ་ལོ། །ལྷ་བྱེ་བ་ཁྲག་ཁྲིག་འབུམ་ཕྲག་དུ་མ་དག་གིས་ཀྱང་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ངུས་ཏེ། གནས་བྱ་བ་ཁྲག་ཁྲིག་འབུམ་ཕྲག་དུ་མ་དག་རྗེས་སུ་དྲན་ནོ། །འདི་ལྟ་སྟེ།
161a8 སངས་རྒྱས་བཅོམ་ལྡན་འདས་ཀྱི་བྱིན་གྱིས་བརླབས་ཀྱིས་ཀྱང་ཆོ་འཕྲུལ་བྱེ་བ་ཁྲག་ཁྲིག་འབུམ་ཕྲག་དུ་མ་དག་རབ་ཏུ་བསྟན་ཏོ། །དེ་ལ་འདི་སྐད་ཅེས་བྱ་སྟེ། བྱེ་བ་བརྒྱ་ཕྲག་དུ་མ་ཡི། །ལྷ་རྣམས་ཁོ་ར་ཁོར་ཡུག་ནས། །ཙན་དན་དམར་པོ་ཞིབ་མོ་ཡིས།
iiif viewer powered by OpenSeadragon
