| e-texts navigator |
| Wylie |
160a1 པས། །ཕྱིས་ནི་བྱང་ཆུབ་སྤྱོད་པ་ན། །སངས་རྒྱས་བྱེ་བ་བསམ་མི་ཁྱབ། །ཤེས་རབ་ཅན་གྱིས་རྟག་མཆོད་འགྱུར། །སངས་རྒྱས་མཚན་དེ་གང་ཐོས་ནས། །གཞན་རྣམས་ལ་ཡང་རབ་སྟོན་ན། །དེ་འདྲའི་བསོད་ནམས་ཕུང་པོ
160a2 ཡི། །ཚད་ནི་བཤད་པར་མི་ནུས་སོ། །དེ་ལྟར་མཚན་འདི་ཐོས་པ་ནི། །ཕྱི་དུས་དག་ནི་མང་པོར་ཡང་། །བླ་མེད་སངས་རྒྱས་ཡེ་ཤེས་ལ། །དེར་ནི་སོམ་ཉི་ཟ་མི་བྱེད། །གང་གིས་རྫོགས་སངས་རྒྱས་མཐོང་ནས། །བཀུར་སྟི་རིམ་གྲོ་བྱས་པ་ནི། །ཕྱི་མའི
160a3 དུས་སུ་མདོ་སྡེ་འདི། །དེ་ཡི་ལག་དུ་འཐོབ་པར་འགྱུར། །ང་ནི་བྱང་ཆུབ་སེམས་དཔའ་ཡིས། །བསྐོར་དང་དྲ་བ་ཅན་སུས་མཐོང་། །དེས་ནི་མདོ་སྡེ་འདི་ཐོས་ནས། །དེ་ལ་སོམ་ཉི་ཟ་མི་འགྱུར། །དེ་བཞིན་གཤེགས་པ་དཔག་མེད་དེ། །སངས་རྒྱས་ཆོས་ལ་ཐེ་ཙོམ
160a4 སྤངས། །འདི་ལྟར་སྔོན་གྱི་སྤྱོད་པ་ནི། །བསྐལ་པ་བྱེ་བ་མང་བརྒྱར་སྤྱད། །ལག་པ་རྐང་པ་གཏོང་བ་དང་། །རྣ་བ་སྣ་དང་མགོ་བོ་དང་། །བུ་ཕོ་བུ་མོ་ཡུལ་འཁོར་དག་།བྱིན་ལ་ཡིད་ནི་མི་དགའ་མེད། །གང་ཞིག་མདོ་སྡེ་འདི་ཐོས་པ། །ཕྱི་མའི་དུས་ན་རྙེད་ནས
160a5 ནི། །གཞན་དག་ལ་ཡང་སྟོན་བྱེད་ན། །དེ་ནི་མཆོད་པའི་འོས་སུ་འགྱུར། །སངས་རྒྱས་ཀུན་གྱི་སྤྱོད་ཡུལ་བ། །མངོན་རྫོགས་བྱང་ཆུབ་འདོད་གང་གིས། །ནམ་ཡང་འཇིག་རྟེན་མགོན་པོ་ཡི། །བསྟན་ལ་སོམ་ཉི་མ་ཟ་ཅིག་།དེ་ལྟར་མདོ་སྡེ་འདི་ཐོས་ནས། །
160a6 གཡོ་སྒྱུ་མེད་པའི་མིས་ཟུང་ལ། །འཆག་པ་དག་དུའང་ཡང་དང་ཡང་། །མདོ་སྡེ་འདི་ནི་བརྗོད་པར་བགྱི། །བརྗོད་བྱས་ཟླ་བ་གསུམ་དག་ཏུ། །ཚངས་བར་ཤིན་ཏུ་ཡངས་བརྗོད་ན། །ཆོས་རྣམས་ཐམས་ཅད་འཛིན་བྱེད་པའི། །གཟུངས་ཀྱི་ཡེ་ཤེས་ཐོབ་པར་འགྱུར། །
160a7 དེ་ནས་ལི་ཚ་བི་གཞོན་ནུ་རིན་ཆེན་དྲ་བ་ཅན་བཅོམ་ལྡན་འདས་ཀྱིས་ལེགས་པར་གསུངས་པར་རིག་ནས་རིན་ཐང་མེད་པའི་རས་བཅོས་བུ་གསེར་གྱིས་བརྒྱན་པ་ཟུང་ཅིག་བཅོམ་ལྡན་འདས་ལ་མངོན་པར་གསོལ་ཏོ། །དེ་ནས་བཅོམ་ལྡན་འདས་ཀྱིས་དེའི་ཚེ་རྫུ་འཕྲུལ་མངོན་པར
160a8 འདུ་མཛད་པ་ཇི་ལྟ་བུས་བཅོམ་ལྡན་འདས་ཀྱི་སྐུ་ཐམས་ཅད་ཀྱིས་བ་སྤུའི་ཁུང་བུ་ཐམས་ཅད་ནས་འོད་ཟེར་དག་བྱུང་སྟེ། ཤར་ཕྱོགས་ཀྱི་འཇིག་རྟེན་གྱི་ཁམས་དཔག་ཏུ་མེད་གྲངས་མེད་པ་ཇི་སྙེད་པ་དེ་དག་ཐམས་ཅད་སྣང་བར་གྱུར་པ་དང་། སངས་རྒྱས་ཀྱི་ཞིང་དེ་དག་ན
iiif viewer powered by OpenSeadragon
