| e-texts navigator |
| Wylie |
198a1 མི་ནུས་སོ། །སྨྲས་པ་བཙུན་པ་གལ་ཏེ་སངས་རྒྱས་ཀྱི་ཆོས་རྣམས་གདགས་སུ་མ་མཆིས་པ་དང་། གདགས་སུ་མི་རུང་བ་ལགས་ན་ཅིའི་སླད་དུ་བདག་ལ་ཚོར་བར་མཛད། སྨྲས་པ། བུ་མོ་འོ་ན་སངས་རྒྱས
198a2 ཀྱི་ཆོས་གང་ལས་བཙལ་བར་བྱ། སྨྲས་པ། ལྟ་བའི་རྣམ་པ་དྲུག་བཅུ་རྩ་གཉིས་ལས་བཙལ་བར་བགྱིའོ། །སྨྲས་པ་ལྟ་བའི་རྣམ་པ་དྲུག་བཅུ་རྩ་གཉིས་ཀྱང་གང་ལས་བཙལ་བར་བྱ། སྨྲས་པ། དེ་བཞིན་གཤེགས
198a3 པའི་རྣམ་པར་གྲོལ་བ་ལས་བཙལ་བར་བགྱིའོ། །སྨྲས་པ་དེ་བཞིན་གཤེགས་པའི་རྣམ་པར་གྲོལ་བ་གང་ལས་བཙལ་བར་བྱ། སྨྲས་པ་མཚམས་མེད་པ་ལྔ་ལས་བཙལ་བར་བགྱིའོ། །སྨྲས་པ་མཚམས་མེད
198a4 པ་ལྔ་ཡང་གང་ལས་བཙལ་བར་བྱ། སྨྲས་པ། གནས་བརྟན་འོད་སྲུང་ཆེན་པོའི་རྣམ་པར་གྲོལ་བའི་ཡེ་ཤེས་མཐོང་བ་ལས་བཙལ་བར་བགྱིའོ། །སྨྲས་པ་བུ་མོ་ཁྱོད་ཀྱི་གཏམ་འདི་འདྲ་བ་དེ་ཇི་ལྟ་བུ་ཞིག་།སྨྲས་པ
198a5 བཙུན་པ་གཏམ་འདི་ནི་མ་བཅིངས་མ་གྲོལ་བའི་གཏམ་ལགས་སོ། །བླང་དུ་མ་མཆིས་ཤིང་དོར་དུ་མ་མཆིས་ཏེ་རང་བཞིན་གྱིས་ཡོངས་སུ་དག་པའི་གཏམ་ལགས་སོ། །ཆོས་ཐམས་ཅད་ཐ་དད་པ་མ་མཆིས་པའི
198a6 གཏམ་ལགས་སོ། །སྨྲས་པ་བུ་མོ་འདི་ནི་དེ་བཞིན་གཤེགས་པ་རྣམས་ཀྱི་བྱང་ཆུབ་དང་འཐུན་པ་མ་ཡིན་ནོ། །སྨྲས་པ་བཙུན་པ་འོད་སྲུང་ཆེན་པོ་དེ་ནི་མེད་དེ། འདི་ནི་དེ་བཞིན་གཤེགས་པ་རྣམས་ཀྱི་བྱང་ཆུབ་དང་འཐུན
198a7 པ་མ་ལགས་སོ། །དེ་ཅིའི་སླད་དུ་ཞེ་ན། འདི་ལྟར་དེ་བཞིན་གཤེགས་པ་རྣམས་ཀྱི་བྱང་ཆུབ་ནི་བརྗོད་དུ་མ་མཆིས་པ་བསྙད་དུ་མ་མཆིས་པ་ལགས་པའི་སླད་དུའོ། །བཙུན་པ་འོད་སྲུང་ཆེན་པོ་བཤད་པའི་དངོས་པོ་གང
198a8 ལགས་པ་དེ་དག་ཐམས་ཅད་ནི་སྒྲས་རྣམ་པར་དབྱེ་བ་ལགས་ལ། བྱང་ཆུབ་གང་ལགས་པ་དེ་ནི་དོན་དམ་པར་སྒྲས་བརྡའ་སྤྲད་པར་མི་ནུས་པ་ལགས་སོ། །བཙུན་པ་བྱང་ཆུབ་ཅེས་བགྱི་བ་འདི་ནི་ཉེ་བར་ཞི་བའི་གཞི
iiif viewer powered by OpenSeadragon
