| e-texts navigator |
| Wylie |
184b1 གླུའི་དབྱངས་ལེན་པ་དང་། ཕྱོགས་བཅུའི་སངས་རྒྱས་ཀྱི་ཞིང་དཔག་ཏུ་མེད་པར་གསུང་གིས་གོ་བར་མཛད་ནས་སངས་རྒྱས་ཀྱི་མཐུ་དང་། དེ་བཞིན་གཤེགས་པའི་བྱིན་གྱིས་བརླབས་ཀྱི་འཇིག་རྟེན་གྱི་ཁམས་གཞན
184b2 དང་གཞན་དག་ན་གནས་པའི་བྱང་ཆུབ་སེམས་དཔའ་རྣམས་དང་། བརྒྱ་བྱིན་དང་། ཚངས་པ་དང་། འཇིག་རྟེན་སྐྱོང་བ་རྣམས་དང་། ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་ལྷ་མ་ཡིན་དང་། ནམ་མཁའ་ལྡིང་དང་།
184b3 མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་ཀྱིས་ཀྱང་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་རྒྱ་མཚོ་ཆེན་པོར་གཤེགས་པ་མཐོང་ངོ་། །དེ་ན་ལྷའི་བུ་མོ་དང་། ཀླུའི་བུ་མོ་དང་།
184b4 གནོད་སྦྱིན་གྱི་བུ་མོ་དང་། ལྷ་མ་ཡིན་གྱི་བུ་མོ་དང་། ནམ་མཁའ་ལྡིང་གི་བུ་མོ་དང་། དྲི་ཟའི་བུ་མོ་དང་། མི་འམ་ཅིའི་བུ་མོ་དང་། ལྟོ་འཕྱེ་ཆེན་པོའི་བུ་མོ་བྱེ་བ་ཕྲག་འབུམ་དག་གིས་སིལ་སྙན་དང་། གླུའི་དབྱངས
184b5 ལེན་ཅིང་བཅོམ་ལྡན་འདས་མདུན་ནས་བསུ་ནས་དེའི་ཚེ་རྒྱུད་ཀྱི་སྒྲ་སྐད་ལས་འབྱུང་བའི་ཚིགས་སུ་བཅད་པ་ཁྱད་པར་དུ་འཕགས་པ་འདི་དག་གིས་བཅོམ་ལྡན་འདས་ལ་མངོན་པར་བསྟོད་པ། སྦྱིན་པ་ལས
184b6 ཚུལ་ཁྲིམས་མཛེས་དང་ལྡན། །བཟོད་པའི་སྟོབས་ལས་བྱུང་བ་བྱམས་པ་བསྒོམས། །བརྩོན་འགྲུས་ལས་བྱུང་དོན་གྱི་རྒྱ་མཚོ་ལས། །བསམ་གཏན་རྣམ་ཐར་དགྱེས་པ་ཁྱོད་ཕྱག་འཚལ། །ཤེས་རབ་འོད
184b7 ལྡན་དགོངས་པ་རྣམ་པར་དག་། འོད་དང་གཟི་བརྗིད་དཔལ་གྱིས་མངོན་པར་བརྒྱན། །རྣམ་པར་གྲོལ་བ་མངོན་སུམ་སྟོན་མཛད་པ། །ཐུབ་པ་ཉོན་མོངས་བསལ་ལ་ཕྱག་འཚལ་ལོ། །བརྟུལ་ཞུགས
184b8 ཤིན་ཏུ་རྫོགས་པ་བརྟུལ་ཞུགས་མཆོག་། དཀའ་ཐུབ་མཐར་ཕྱིན་རྟོགས་པར་ཐུགས་སུ་ཆུད། །མིག་ནི་སྦྱིན་པར་མཛད་ཅིང་མིག་སྦྱོང་བ། །འགྲོ་བ་ཀུན་ཏུ་རྒྱུ་བ་འགྲོ་བའི་མཆོག་།དོན་དམ་ཟབ་མོ་ཤིན་ཏུ་སྟོན་པ་པོ། །
iiif viewer powered by OpenSeadragon
