| e-texts navigator |
| Wylie |
166b1 གཟུངས་དང་ལྡན་པ་ཡིན། ཆོས་ཇི་ལྟ་བ་བཞིན་རྗེས་སུ་འགྲོ་བ་དང་། ཚུལ་གཅིག་པའི་ཆོས་ཀྱི་རྗེས་སུ་འགྲོ་བ་དང་། གཉིས་སུ་མེད་པ་ཡང་དག་པའི་མཐའ་ལ་གནས་པ་དང་། མི་སྐྱེ་བའི་ཆོས་ལ་བཟོད
166b2 པ་ཐོབ་པ་དང་ལྡན་པ་ཡིན་ཏེ། རྒྱལ་པོ་ཆེན་པོ་ཆོས་བརྒྱད་པོ་དེ་དག་དང་ལྡན་པའི་བྱང་ཆུབ་སེམས་དཔའ་ནི་ཆོས་ཀྱི་དབང་ཕྱུག་ཐོབ་པར་འགྱུར་རོ། །རྒྱལ་པོ་ཆེན་པོ་གཞན་ཡང་རིན་པོ་ཆེའི་ཟ་མ་ཏོག
166b3 ཅེས་བྱ་བའི་གཟུངས་ཡོད་དེ། དེ་ཐོབ་ན་བྱང་ཆུབ་སེམས་དཔས་ཆོས་ཀྱི་དབང་ཕྱུག་ཐོབ་པར་གྱུར་ཏེ། དེ་ལྟར་ན་དེ་བཞིན་གཤེགས་པས་རིན་པོ་ཆེའི་ཟ་མ་ཏོག་གི་གཟུངས་ལས་བརྩམས་ནས། ལོ
166b4 འབུམ་གྱི་བར་དུ་རྒྱས་པར་རྣམ་པར་དབྱེ་བས་དེ་ལ་ཡང་དག་པར་བསྟན་ཏོ། །རྒྱལ་པོ་བསོད་ནམས་མི་ཟད་པ་དེ་ཡང་རྒྱལ་པོའི་བྱ་བ་ཐམས་ཅད་བཏང་སྟེ། ལས་གཞན་མི་བྱེད་ལ་སེམས་ཀྱི་རྒྱུད་རྣམ
166b5 པར་གཡེངས་པ་མེད་པར་དཔུང་དང་བཅས་འཁོར་དང་བཅས་པས་ཆོས་མཉན་ཏེ། དེས་ལོ་འབུམ་པོ་དེའི་བར་དུ་འདོད་པའི་རྟོག་པ་འམ། གནོད་སེམས་ཀྱི་རྟོག་པ་འམ། རྣམ་པར་འཚེ་བའི་རྣམ་པར་རྟོག་པ
166b6 འམ། བུ་དང་། ཆུང་མ་དང་། རྒྱལ་སྲིད་དང་། ཡོངས་སུ་འཛིན་པ་དང་། སྡུག་པ་ཐམས་ཅད་ལ་ངེས་པའི་རྟོག་པ་རྣམས་ལ་བརྟག་པར་མ་བསམས་ཏེ། ཆོས་ལ་སྡུག་པར་ངེས་པ་ཡིད་ལ་ཕྱིན་པ་དང་།
166b7 བྱང་ཆུབ་ཀྱི་སེམས་ཀྱི་བསམ་པ་ལ་གནས་པར་གྱུར་པ་དང་། བྱམས་པ་ཆེན་པོས་སེམས་ཅན་ཐམས་ཅད་ལ་སེམས་སྙོམས་པ་དང་། སྙིང་རྗེ་ཆེན་པོའི་གོ་ཆ་བགོས་ནས་ཆོས་འབའ་ཤིག་མཉན་ཏོ། །
166b8 དེ་ནས་བཅོམ་ལྡན་འདས་དེ་ལས་ལོ་འབུམ་ཐམ་པའི་བར་དུ་དམ་པའི་ཆོས་ཉན་ཏེ། ཐོས་ནས་ཀྱང་རིན་པོ་ཆེའི་ཟ་མ་ཏོག་གི་གཟུངས་འདི་ཉིད་ཀྱི་རྩ་བ་ཡོངས་སུ་སྦྱང་བ་བྱས་སོ། །དེ་བསྐལ་པ་ས་ཡ་ཕྲག
iiif viewer powered by OpenSeadragon
