| e-texts navigator |
| Wylie |
141a1 དྲུག་པོ་དེ་དག་གོ། །ཀླུའི་བདག་པོ་གཞན་ཡང་མར་མེ་བྱིན་པས་ནི་ལྷའི་མིག་རྣམ་པར་དག་པར་འགྱུར་རོ། །སིལ་སྙན་དང་། ཕེག་རྡོབ་པ་དང་། གླུའི་དབྱངས་ཐམས་ཅད་བྱིན་པས་ནི་ལྷའི་རྣ་བ་རྣམ་པར་དག་པར་འགྱུར་རོ། །
141a2 ཀུན་ནས་ཉོན་མོངས་པ་མེད་པར་བྱིན་པས་ནི་གཞན་གྱི་སེམས་ཤེས་པ་རྣམ་པར་དག་པར་འགྱུར་རོ། །དགེ་བའི་ཆོས་དྲན་པར་བྱེད་ཅིང་བསྐུལ་བས་ནི་སྔོན་གྱི་གནས་རྗེས་སུ་དྲན་པ་ཤེས་པ་རྣམ་པར་དག་པར་འགྱུར་རོ། །
141a3 སྒྲིབ་པ་དང་། འགྱོད་པ་བསལ་བས་ནི་རྫུ་འཕྲུལ་གྱི་བྱ་བ་ཤེས་པ་རྣམ་པར་དག་པར་འགྱུར་རོ། །ཆོས་བྱིན་པས་ནི་ཟག་པ་ཟད་པ་ཤེས་པ་རྣམ་པར་དག་པར་འགྱུར་རོ། །ཀླུའི་བདག་པོ་གཞན་ཡང་དེ་བཞིན་གཤེགས་པ་ལ
141a4 ལྟ་བས་ནི་ལྷའི་མིག་རྣམ་པར་དག་པར་འགྱུར་རོ། །དམ་པའི་ཆོས་མཉན་པས་ནི་ལྷའི་རྣ་བ་རྣམ་པར་དག་པར་འགྱུར་རོ། །སེམས་ཀྱིས་ངེས་པར་བརྟགས་པས་ནི་གཞན་གྱི་སེམས་ཤེས་པ་རྣམ་པར་དག་པར་འགྱུར་རོ། །
141a5 དགེ་འདུན་རྗེས་སུ་དྲན་པས་ནི་སྔོན་གྱི་གནས་རྗེས་སུ་དྲན་པ་ཤེས་པ་རྣམ་པར་དག་པར་འགྱུར་རོ། །འདུན་པ་དྲག་པོས་ནི་རྫུ་འཕྲུལ་གྱི་བྱ་བ་ཤེས་པ་རྣམ་པར་དག་པར་འགྱུར་རོ། །ཆོས་སྒྲུབས་པས་ནི་ཟག་པ་ཟད་པ
141a6 ཤེས་པ་རྣམ་པར་དག་པར་འགྱུར་རོ། །དེ་ལ་མངོན་པར་ཤེས་པས་རྣམ་པར་རྩེ་བ་གང་ཞེ་ན། ཀླུའི་བདག་པོ་འདི་ལ་ཉན་ཐོས་དང་། རང་སངས་རྒྱས་རྣམས་ཀྱི་ལྷའི་མིག་གང་ཡིན་པ་དང་། ཕྱི་རོལ་གྱི་དྲང་སྲོང་མངོན
141a7 པར་ཤེས་པ་ལྔ་དང་ལྡན་པ་རྣམས་ཀྱི་ལྷའི་མིག་གང་ཡིན་པ་དང་། ལྷ་དང་ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ
141a8 རྣམས་ཀྱི་ལྷའི་མིག་གང་ཡིན་པ་དེ་བས་ནི་བྱང་ཆུབ་སེམས་དཔའི་ལྷའི་མིག་དེ་ཆེས་འདས་པ་དང་། ཆེས་གསལ་བ་དང་། ཆེས་ཁྱད་པར་དུ་འཕགས་པ་དང་། ཆེས་མཆོག་ཏུ་གྱུར་པ་དང་། ཆེས་རྣམ་པར་དག་པ་སྟེ།
iiif viewer powered by OpenSeadragon
