| e-texts navigator |
| Wylie |
304b1 གནས་པ་ཉིད་དུ་འདོད། །དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་ཚིགས་སུ་བཅད་པས་ཞུ་བ་ཞུས་པ། བྱང་ཆུབ་སེམས་དཔའ་ལ་སོགས་པ། །བླ་མེད་བྱང་ཆུབ་ཚོལ་བ་དག་།ཤ་དང་ཆང་དང་སྒོག་བཙོང་རྣམས། །འཚལ་ཞིང་བཏུང་བར་བགྱི་མི་བགྱི། །བླ་ན
304b2 མ་མཆིས་གཙོ་མཆོག་གིས། །ཐུགས་རྗེས་བདག་ལ་བཤད་དུ་གསོལ། །བྱིས་པ་དེ་ལ་བརྐམ་པར་བགྱིད། །དྲི་ང་གྲགས་པ་མ་མཆིས་འགྱུར། །ཤི་ན་གཅན་གཟན་རྣམས་ཀྱི་ཟས། །ཇི་ལྟར་དེ་ནི་འཚལ་བར་རུང་། །འཚལ་ནས་ནོངས་དམིགས་ཅི་མཆིས་དང་། །
304b3 མ་འཚལ་ཡོན་ཏན་གང་ལགས་པ། །འཚལ་དང་མ་འཚལ་དགེ་སྡིག་རྣམས། །ཐུགས་རྗེས་བདག་ལ་བཤད་དུ་གསོལ། །བྱང་ཆུབ་སེམས་དཔའ་བློ་གྲོས་ཆེན་པོས་ཚིགས་སུ་བཅད་པ་རྣམས་ཀྱིས་ཞུ་བ་ཞུས་ནས། ཡང་བཅོམ་ལྡན་འདས་ལ་འདི་སྐད
304b4 ཅེས་གསོལ་ཏོ། །བཅོམ་ལྡན་འདས་ཀྱིས་བདག་ལ་སོགས་པའི་སླད་དུ་ཤ་འཚལ་བ་དང་མི་འཚལ་བའི་ནོངས་པ་དང་ཡོན་ཏན་རྣམས་བཤད་དུ་གསོལ། བདག་དང་བྱང་ཆུབ་སེམས་དཔའ་གཞན་རྣམས་ཀྱིས་ད་ལྟར་དང་མ་འོངས་པ་ན་ཤའི་ཟས་ལ་ཆགས
304b5 ཤིང་རེ་བའི་སེམས་ཅན་སྣ་ཚོགས་ལ་རྣམ་པར་ཕྱེ་སྟེ་ཆོས་བཤད་པས་སེམས་ཅན་དེ་དག་བྱམས་པའི་སེམས་ཀྱིས་ཕན་ཚུན་གཅིག་ལ་གཅིག་ལྟ་བ་དང་། བྱམས་པའི་སེམས་ཐོབ་ནས་ཀྱང་སོ་སོའི་ས་ལ་གནས་ཤིང་རྣམ་པར་དག་པ་གསལ་བར་རྟོག
304b6 སྟེ་མྱུར་དུ་མཐར་ཐུག་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བ་དང་། ཉན་ཐོས་དང་། རང་སངས་རྒྱས་དག་རང་གི་ས་ལ་བསྟི་ཞིང་། བསྟིས་ནས་ཀྱང་བླ་ན་མེད་པའི་བྱང་ཆུབ་འཐོབ་པར་འགྱུར་རོ། །ཆོས་ངན་པ་ལོག་པར་སྨྲ་བའི
304b7 མུ་སྟེགས་ཅན་གང་དག་ལོག་པར་ལྟ་བ་དང་། རྟག་པ་དང་ཆད་པ་ལ་མངོན་པར་ཞེན་པ་རྣམས་ཀྱིས་ཀྱང་ཤ་འཚལ་བ་བཀག་སྟེ་ཤ་འཚལ་དུ་མི་གནང་བ་ལགས་ན། དེ་བཞིན་གཤེགས་པ་འཇིག་རྟེན་གྱི་མགོན་པོ་ཡང་དག་པའི་ཆོས་ཡོངས་སུ་གྲུབ་པས་ཤ་མི
304b8 གསོལ་བ་ལྟ་ཅི་སྨོས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ལེགས་སོ་ལེགས་སོ། །དེའི་ཕྱིར་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་ངས་ཁྱོད་ལ་བཤད་དོ། །བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། དེ་བཞིན་དུ་འཚལ
iiif viewer powered by OpenSeadragon
