| e-texts navigator |
| Wylie |
304a1 སོའི་སྐྱེ་བོ་དང་། ཉན་ཐོས་དང་། རང་སངས་རྒྱས་དང་། མུ་སྟེགས་ཅན་ཐམས་ཅད་ཀྱི་དབང་པོ་དང་། ཚད་མ་རྣམས་ལས་རྣམ་པར་ལོག་པ་ཡིན་ཏེ། མཐོང་བའི་ཆོས་ལ་བདེ་བར་གནས་པ་བར་ཆད་མེད་པའི་ཆོས་ཤེས་པའི་བཟོད
304a2 པ་ཐོབ་པའི་ཕྱིར་ལག་ན་རྡོ་རྗེས་བསྲུང་བར་བྱ་བ་མ་ཡིན་ནོ། །སྤྲུལ་པའི་སངས་རྒྱས་ཐམས་ཅད་ནི་ལས་ལས་སྐྱེས་པ་མ་ཡིན་ནོ། །འཕྲུལ་པས་སྤྲུལ་པའི་སངས་རྒྱས་ནི་སངས་རྒྱས་ཀྱང་མ་ཡིན། སངས་རྒྱས་ལས་གཞན་པ་ཡང་མ
304a3 ཡིན་ཏེ། །དཔེར་ན་རྫ་མཁན་གྱི་འཁོར་ལོ་ལ་སོགས་པའི་རྒྱུ་ལྟ་བུར་སེམས་ཅན་གྱི་བྱ་བ་བྱེད་ཅིང་མཚན་རྣམས་དང་ལྡན་པས་ཆོས་སྟོན་ཀྱང་རང་གི་ཚུལ་གྱི་གནས་སོ་སོ་རང་གིས་རིག་པའི་སྤྱོད་ཡུལ་བཤད་པ་ནི་མ་ཡིན་ནོ། །གཞན་ཡང་བློ་གྲོས
304a4 ཆེན་པོ་བྱིས་པ་སོ་སོའྀ་སྐྱེ་བོ་རྣམས་རྣམ་པར་ཤེས་པའི་ཚོགས་བདུན་འགགས་པའི་ཕྱིར་ནི་ཆད་པར་ལྟ་བ་བསྐྱེད་དོ། །ཀུན་གཞི་རྣམ་པར་ཤེས་པ་མ་རྟོགས་པའི་ཕྱིར་ནི་རྟག་པར་ལྟ་བ་བསྐྱེད་དོ། །བདག་ཉིད་རྣམ་པར་རྟོག་པའི་ཕྱིར་ནི་ཐོག་མའི
304a5 མཐའ་མི་ཤེས་སོ། །རང་གི་རྣམ་པར་རྟོག་པའི་བློ་འགགས་པའི་ཕྱིར་ནི་རྣམ་པར་གྲོལ་བར་འགྱུར་རོ། །གནས་པའི་ས་གཞི་དང་མ་རིག་པ་གནས་ཀྱི་སའི་བག་ཆགས་སྤངས་པའི་ཕྱིར་ཉེས་པ་ཐམས་ཅད་སྤངས་པ་ཡིན་ནོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད
304a6 ཡང་དག་པར་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ཐེག་པ་གསུམ་ནི་ཐེག་མ་ཡིན། །དེ་བཞིན་གཤེགས་པ་ཟད་མི་འགྱུར། །ཐམས་ཅད་སངས་རྒྱས་ལུང་བསྟན་ཅིང་། །ཉེས་པ་རྣམས་དང་བྲལ་བར་བཤད། །མངོན་རྟོགས་ཡེ་ཤེས་ཐོབ
304a7 བྱ་དང་། །ལྷག་མེད་མྱ་ངན་འདའ་བ་དང་། །ཞུམ་པ་རྣམས་ཀྱང་སྤྲོ་བྱའི་ཕྱིར། །དེ་ཕྱིར་དགོངས་ཏེ་བཤད་པ་ཡིན། །སངས་རྒྱས་བསྐྱེད་པའི་ཡེ་ཤེས་དག་།དེ་ཉིད་རྣམ་འབྱེད་ལམ་དུ་བཤད། །ཐེག་པ་རྣམས་ནི་ཐེག་མ་ཡིན། །དེ་ནི་མྱ་ངན་འདའ་བ་མིན། །འདོད
304a8 གཟུགས་སྲིད་དང་ལྟ་བ་རྣམས། །གནས་བཞིའི་སར་ནི་བཤད་པ་ཡིན། །ཡིད་ཀྱི་རྣམ་པར་ཤེས་ལས་འབྱུང་། །རྣམ་ཤེས་ཁྱིམ་དུ་ཡིད་ནི་གནས། །ཡིད་དང་མིག་སོགས་རྣམ་པར་ཤེས། །འགག་པ་ལ་ནི་མི་རྟག་བཤད། །ཡང་ན་མྱ་ངན་འདས་པར་ལྟ། །རྟག་པར
iiif viewer powered by OpenSeadragon
