| e-texts navigator |
| Wylie |
296b1 ཤེས་པ་དང་། བདག་མེད་པ་གཉིས་རྣམ་པར་དབྱེ་བ་དང་རབ་ཏུ་འཇུག་པའི་མཚན་ཉིད་ནི་འདི་ལྟ་སྟེ། མིང་དང་། རྒྱུ་མཚན་དང་། རྣམ་པར་རྟོག་པ་དང་། ཡང་དག་པའི་ཡེ་ཤེས་དང་། དེ་བཞིན་ཉིད་དེ། རྣལ་འབྱོར་པ་རྣམས་ཀྱིས་བསྒོམས་ན། དེ་བཞིན་གཤེགས
296b2 པའི་རང་གིས་རིག་པ་འཕགས་པའི་ཚུལ་ལ་རབ་ཏུ་འཇུག་ཅིང་རྟག་པ་དང་། ཆད་པ་དང་། ཡོད་པ་དང་། མེད་པ་ལ་སོགས་པའི་ལྟ་བ་སྤངས་ནས་མཐོང་བའི་ཆོས་ལ་བདེ་བར་སྙོམས་པར་འཇུག་པ་ལ་གནས་པ་མངོན་སུམ་དུ་འགྱུར་རོ། །བློ་གྲོས་ཆེན་པོ
296b3 ཆོས་ལྔ་དང་། རང་བཞིན་དང་། རྣམ་པར་ཤེས་པ་དང་། བདག་མེད་པ་གཉིས་དང་། རང་གི་སེམས་སྣང་བ་དང་། ཕྱི་རོལ་གྱི་དངོས་པོ་དེ་དག་ཁོང་དུ་མ་ཆུད་པའི་ཕྱིར་སོ་སོའི་སྐྱེ་བོ་རྣམ་པར་རྟོག་པར་བྱེད་ཀྱི་འཕགས་པ་རྣམས་ནི་མ་ཡིན་ནོ། །བློ་གྲོས་ཆེན་པོས་བཅོམ་ལྡན
296b4 འདས་ལ་གསོལ་པ། བཅོམ་ལྡན་འདས་ཇི་ལྟར་ན་བྱིས་པ་སོ་སོའི་སྐྱེ་བོ་རྣམས་རྣམ་པར་རྟོག་པ་སྐྱེ་ལ་འཕགས་པ་རྣམས་ཀྱིས་མ་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་བྱིས་པ་སོ་སོའི་སྐྱེ་བོ་རྣམས་ཀུན་རྫོབ་ཀྱི་བརྡའི་མིང
296b5 དང་རྒྱུ་མཚན་ལ་མངོན་པར་ཞེན་པས་སེམས་ཀྱི་རྗེས་སུ་འབྲང་ངོ་། །རྗེས་སུ་འབྲངས་ནས་མཚན་མའི་ཁ་དོག་སྣ་ཚོགས་འདོད་པས་བདག་དང་བདག་གིར་ལྟ་བར་ལྷུང་བའི་བསམ་པ་ཅན་རྣམས་གཟུགས་བཟང་པོ་ལ་མངོན་པར་ཞེན་པར་བྱེད་དེ། མངོན་པར་ཞེན
296b6 ནས་མི་ཤེས་པས་བསྒྲིབས་པའི་ཕྱིར་མངོན་པར་ཆགས་པ་བསྐྱེད་དོ། །མངོན་པར་ཆགས་པར་གྱུར་ནས་ནི་འདོད་ཆགས་དང་། ཞེ་སྡང་དང་། གཏི་མུག་ལས་བྱུང་བའི་ལས་བསགས་སོ། །མངོན་པར་བསྩགས་ནས་ནི་རྣམ་པར་རྟོག་པས་རང་ལ་འཆིང་བར
296b7 བྱེད་དེ། ཇི་ལྟར་དར་གྱི་སྲིན་བུ་སྐོན་པ་བྱེད་པ་བཞིན་དུ་འཁོར་བའི་རྒྱ་མཚོར་འགྲོ་བ་རྣམས་ཀྱི་སྐོན་པར་ལྷུང་བ་ནི་ཟོ་ཆུན་གྱི་འཁྲུལ་འཁོར་བཞིན་ཏེ། འདི་ལྟར་གཏི་མུག་པའི་ཕྱིར་སྒྱུ་མ་དང་། སྨིག་རྒྱུ་དང་། ཆུའི་ཟླ་བ་དང་མཚུངས་པར་རང
296b8 བཞིན་གྱིས་བདག་དང་བདག་གི་དང་བྲལ་བར་མ་ཤེས་ནས་ཡང་དག་པ་མ་ཡིན་པའི་རྣམ་པར་རྟོག་པ་ཐམས་ཅད་སྐྱེད་པར་བྱེད་དོ། །མཚན་ཉིད་དང་། མཚན་ཉིད་ཀྱི་གཞི་དང་། སྐྱེ་བ་དང་། འཇིག་པ་དང་བྲལ་བ་རང་གི་སེམས་ཀྱི་རྣམ་པར་རྟོག་པ
iiif viewer powered by OpenSeadragon
