| e-texts navigator |
| Wylie |
292b1 ཁོང་དུ་ཆུད་པས་རྣམ་པར་རྟོག་པ་མི་སྐྱེ་སྟེ། སེམས་དང་ཡིད་དང་། ཡིད་ཀྱི་རྣམ་པར་ཤེས་པ་དང་། ཕྱི་རོལ་གྱི་དངོས་པོའི་རང་གི་ངོ་བོའི་མཚན་ཉིད་ལ་མངོན་པར་ཞེན་པའི་རྣམ་པར་རྟོག་པར་ཡང་མི་ལྟུང་ལ། སངས་རྒྱས་ཀྱི་ཆོས་ཀྱི་རྒྱུ་མི་སྐྱེད་པ་ཡང
292b2 མ་ཡིན་ཏེ། ཡེ་ཤེས་ཀྱི་རྗེས་སུ་སྐྱེ་བས་དེ་བཞིན་གཤེགས་པའི་རང་གིས་རིག་པའི་ས་འཐོབ་པར་འགྱུར་ཏེ། ཇི་ལྟར་སྐྱེས་བུའི་རྨི་ལམ་ན་ཆུ་བོ་རྒལ་བར་རྩོམ་པ་ཕ་རོལ་ཏུ་མ་ཕྱིན་པར་སད་ལ། སད་ནས་འདི་སྙམ་དུ་ཅི་འདི་ཡང་དག་པའམ། འོན
292b3 ཏེ་ཡང་དག་པ་མ་ཡིན་པ་ཞེས་རྟོག་པར་བྱེད་པ་དེ་ནི་ཡང་དག་པ་ཡང་མ་ཡིན། ལོག་པ་ཡང་མ་ཡིན་གྱི། གཞན་དུ་ན་ཐོག་མ་མེད་པའི་མཐོང་བ་དང་། ཐོས་པ་དང་། བྱེ་བྲག་ཕྱེད་པ་དང་། རྣམ་པར་རིག་པ་རྒྱུའི་འདུ་ཤེས་སྣ་ཚོགས་ཀྱི་བག་ཆགས་དང་།
292b4 དབྱིབས་དང་། གནས་སྣ་ཚོགས་དང་། ཡོད་པ་དང་། མེད་པའི་མཚན་ཉིད་དུ་ལྷུང་བ་དང་། སེམས་དང་ཡིད་དང་། ཡིད་ཀྱི་རྣམ་པར་ཤེས་པའི་རྨི་ལམ་ལས་སྣང་ངོ་། །བློ་གྲོས་ཆེན་པོ་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱང
292b5 བྱང་ཆུབ་སེམས་དཔའི་ས་བརྒྱད་པ་ལ་རྣམ་པར་རྟོག་པའི་མཚན་ཉིད་སྐྱེ་བར་མཐོང་བ་དང་། ས་དང་པོ་ནས་བརྩལ་བས་ས་བདུན་དུ་འཕོ་བ་དང་། ཆོས་ཐམས་ཅད་སྒྱུ་མ་ལ་སོགས་པ་དང་མཚུངས་པར་མཐོང་བའི་སྦྱོར་བས་གཟུང་བ་དང་།
292b6 འཛིན་པའི་སེམས་རྣམ་པར་རྟོག་པའི་སྤྱོད་པ་ལས་བཟླས་ཏེ། སངས་རྒྱས་ཀྱི་ཆོས་ཀྱི་སྦྱོར་བས་བྱས་ནས་ད་དུང་མ་ཐོབ་པ་ནི་ཐོབ་པར་བྱེད་དོ། །བློ་གྲོས་ཆེན་པོ་འདི་ནི་བྱང་ཆུབ་སེམས་དཔའ་རྣམས་ཀྱི་མྱ་ངན་ལས་འདས་པའི་སྦྱོར་བ་རྣམ
292b7 པར་མི་འཇིག་པ་ཡིན་ཏེ། སེམས་དང་ཡིད་དང་། ཡིད་ཀྱི་རྣམ་པར་ཤེས་པ་ཡོངས་སུ་སྤངས་ནས་མི་སྐྱེ་བའི་ཆོས་ལ་བཟོད་པ་འཐོབ་པར་འགྱུར་བའོ། །བློ་གྲོས་ཆེན་པོ་དོན་དམ་པ་ལ་ནི་གོ་རིམས་དང་མཚམས་སྦྱར་བ་མེད་དེ། སྣང་བ་མེད་པ
292b8 རྣམ་པར་རྟོག་པ་ལས་དབེན་པའི་ཆོས་བསྟན་པའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །སེམས་ཙམ་དང་ནི་སྣང་མེད་དང་། །གནས་འདི་དང་ནི་སངས་རྒྱས་ས། །
iiif viewer powered by OpenSeadragon
