| e-texts navigator |
| Wylie |
291b1 ཆེན་པོ་ས་བརྒྱད་པའི་བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་རྣམས་ཀྱི་སེམས་དང་། ཡིད་དང་། ཡིད་ཀྱི་རྣམ་པར་ཤེས་པའི་རྣམ་པར་རྟོག་པ་དང་། འདུ་ཤེས་ལྡོག་པར་འགྱུར་རོ། །ས་དང་པོ་ནས་ས་བདུན་པའི་བར
291b2 གྱི་བྱང་ཆུབ་སེམས་དཔའ་དེ་དག་ཁམས་གསུམ་པ་འདི་ནི་སེམས་དང་ཡིད་དང་། ཡིད་ཀྱི་རྣམ་པར་ཤེས་པ་ཙམ་མོ་ཞེས་སོ་སོར་རབ་ཏུ་རྟོག་སྟེ། བདག་དང་བདག་གི་དང་བྲལ་བ། རང་གི་རྣམ་པར་རྟོག་པའི་སྤྱོད་པ་ཅན། ཕྱི་རོལ་གྱི་དངོས
291b3 པོ་སྣ་ཚོགས་ཀྱི་མཚན་ཉིད་དུ་ལྟུང་བ། བྱིས་པ་སོ་སོའི་སྐྱེ་བོ་རྣམས་ཀྱི་རང་གི་མཚན་ཉིད་གཟུང་བ་དང་། འཛིན་པའི་དངོས་པོ་རྣམ་པ་གཉིས་སུ་གྱུར་པས་མི་ཤེས་པའི་རྗེས་སུ་སོང་བ། ཐོག་མ་མེད་པའི་དུས་ནས་རྣམ་པར་སྤྲོས་པའི
291b4 གནས་ངན་ལེན་གྱི་བག་ཆགས་ཀྱིས་ཡོངས་སུ་བསྒོས་པ་རྣམས་ཁོང་དུ་མི་ཆུད་དོ། །བློ་གྲོས་ཆེན་པོ་ས་བརྒྱད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དང་། ཉན་ཐོས་དང་། རང་སངས་རྒྱས་རྣམས་ཀྱིས་མྱ་ངན་ལས་འདས
291b5 པ་མཚུངས་ཀྱང་བྱང་ཆུབ་སེམས་དཔའ་ནི་ཏིང་ངེ་འཛིན་བློས་ཡོངས་སུ་བཟུང་བས། དེའི་ཕྱིར་ཏིང་ངེ་འཛིན་གྱི་སྒོའི་བདེ་བས་ཡོངས་སུ་མྱ་ངན་ལས་མི་འདའོ། །གལ་ཏེ་ཡོངས་སུ་མ་བཟུང་དུ་ཟིན་ན་ནི་དེ་བཞིན་གཤེགས་པའི་ས་ཡོངས
291b6 སུ་རྫོགས་པར་མི་འགྱུར་ཞིང་སེམས་ཅན་གྱི་བྱ་བ་ཐམས་ཅད་ཡོངས་སུ་སྤོངས་བར་འགྱུར་ལ། དེ་བཞིན་གཤེགས་པའི་རིགས་ཀྱི་གདུང་ཡང་ཆད་པར་འགྱུར་བས་ན། སངས་རྒྱས་བཅོམ་ལྡན་འདས་རྣམས་དེ་བཞིན་གཤེགས
291b7 པའི་བསམ་གྱིས་མི་ཁྱབ་པའི་ཡོན་ཏན་དཔག་ཏུ་མེད་པ་སྟོན་ཏོ། །ཉན་ཐོས་དང་། རང་སངས་རྒྱས་རྣམས་ཏིང་ངེ་འཛིན་གྱི་སྒོའི་བདེ་བས་ཕྲོགས་པར་གྱུར་པའི་ཕྱིར་མྱ་ངན་ལས་འདས་པར་འདུས་ཤེས་སོ། །བློ་གྲོས་ཆེན་པོ
291b8 ངས་ས་བདུན་པའི་སེམས་དང་། ཡིད་དང་། ཡིད་ཀྱི་རྣམ་པར་ཤེས་པའི་མཚན་ཉིད་ལ་མཁས་ཤིང་གོམས་པར་བྱ་བ་དང་། བདག་དང་བདག་གིར་འཛིན་པ་དང་། གང་ཟག་དང་། ཆོས་བདག་མེད་པ་བསྡུ་བ་དང་། སྐྱེ་བ་དང་། འཇིག་པ་དང་། རང
iiif viewer powered by OpenSeadragon
