| e-texts navigator |
| Wylie |
290a1 འཇིག་གོ་ཞེས་ཟེར་ལ། བློ་གྲོས་ཆེན་པོ་མཐར་ཕྱིན་པ་ནི་རྡུལ་ཕྲ་མོའི་བར་དུ་རབ་ཏུ་ཕྱེ་སྟེ། འཇིག་པ་ལས་སོ་སོར་བརྟགས་ན་འབྱུང་བ་ཆེན་པོ་བཞི་དང་། རྒྱུར་བྱས་པའི་གཟུགས་རྣམས་ཐ་དད་པར་མཐོང་བའི་དབྱིབས་དང
290a2 རིང་ཐུང་མི་དམིགས་ཏེ། འབྱུང་བ་ཆེན་པོ་བཞི་ནི་མ་ཡིན་པས་འབྱུང་བ་ཆེན་པོ་བཞི་མི་འཇིག་གི། དབྱིབས་རྣམ་པར་འཇིག་པར་ལྟ་བས་གྲངས་ཅན་གྱི་སྨྲ་བར་ལྟུང་བ་ཡིན་ནོ། །དེ་ལ་གཟུགས་ཉིད་མི་རྟག་པ་ཉིད་ཅེས་བྱ་བ་ནི་འདི་ལྟ་སྟེ། གཟུགས
290a3 ཉིད་མི་རྟག་པ་ཉིད་ཡིན་པས་དབྱིབས་དེ་དག་མི་རྟག་པ་ཉིད་དེ་འབྱུང་བ་ཆེན་པོ་རྣམས་ནི་མ་ཡིན་ནོ། །གལ་ཏེ་འབྱུང་བ་བཞི་པོ་རྣམས་མི་རྟག་པ་ཉིད་ཡིན་ན་ནི་འཇིག་རྟེན་གྱི་གྲངས་སུ་བརྗོད་པ་མ་ཡིན་ནོ། །འཇིག་རྟེན་གྱི་བརྗོད་པའི་དངོས་པོ་མེད
290a4 ན་ནི་འཇིག་རྟེན་རྒྱང་པན་པའི་ལྟ་བར་ལྟུང་བར་འགྱུར་ཏེ། དངོས་པོ་ཐམས་ཅད་བརྗོད་པའི་ཚིག་ཙམ་དུ་མཐོང་ཞིང་རང་གི་མཚན་ཉིད་སྐྱེ་བར་མི་མཐོང་བའི་ཕྱིར་རོ། །དེ་ལ་རྣམ་པར་འགྱུར་བའི་མི་རྟག་པ་ཞེས་བྱ་བ་ནི་འདི་ལྟར་གཟུགས་དངོས
290a5 པ་གཞན་དུ་འགྱུར་བར་སྣང་བ་སྟེ། འབྱུང་བ་ཆེན་པོ་རྣམས་ནི་མ་ཡིན་ནོ། །ཇི་ལྟར་གསེར་ལས་རྒྱུན་དུ་བྱས་པ་རྣམས་འགྱུར་བར་སྣང་ཡང་གསེར་གྱི་རང་བཞིན་འཇིག་པ་མ་ཡིན་གྱི། རྒྱན་གྱི་དབྱིབས་ལ་འཇིག་པ་ཡོད་པ་དེ་བཞིན
290a6 དུ་དངོས་པོ་གཞན་རྣམ་པར་འགྱུར་བ་ལ་སོགས་པ་ཡང་དེ་བཞིན་ནོ་ཞེས་དེ་ལ་སོགས་པའི་རྣམ་པས་མུ་སྟེགས་ཅན་རྣམས་མི་རྟག་པའི་ལྟ་བར་རྣམ་པར་རྟོག་གོ། །འདི་ལྟར་མེས་འབྱུང་བ་ཆེན་པོ་རྣམས་སྲེགས་པའི་ཚེ་རང་གི་མཚན་ཉིད
290a7 ལ་ནི་མི་སྲེག་གོ། །ཅི་སྟེ་སོ་སོ་ནས་རང་གི་མཚན་ཉིད་གཅིག་གིས་གཅིག་འཇིག་པར་བྱེད་ན་ནི་འབྱུང་བ་དག་རྒྱུར་བྱས་པའི་གཟུགས་རྣམས་འཆད་པར་འགྱུར་བའི་རིགས་སོ། །བློ་གྲོས་ཆེན་པོ་ངའི་ཆོས་ནི་བྱུང་བ་ཉིད་ན་རྟག་པ
290a8 ཡང་མ་ཡིན། མི་རྟག་པ་ཡང་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། ཕྱི་རོལ་གྱི་དངོས་པོ་མ་ངེས་པའི་ཕྱིར་སྲིད་པ་གསུམ་སེམས་ཙམ་དུ་བསྟན་གྱི། མཚན་ཉིད་སྣ་ཚོགས་དང་། སྐྱེ་བ་དང་། འཇིག་པ་ཡོད་པར་ནི་མ་བསྟན་ཏོ། །
iiif viewer powered by OpenSeadragon
