| e-texts navigator |
| Wylie |
287b1 སྐྱེས་རང་བཞིན་མེད་པ་དང་། །ཅི་ཕྱིར་སྟོང་པའང་བཤད་པར་བྱ། །འདུས་པ་དག་ནི་ཡོངས་སྤངས་ཤིང་། །བློ་གྲོས་རིག་ན་དངོས་མི་སྣང་། །དེ་ཕྱིར་སྟོང་ཉིད་མ་སྐྱེས་པ། །རང་བཞིན་མེད་པར་ངས་བཤད་དོ། །འདི་ལྟར་རེ་རེ་འདུས་པས་ན། །དངོས་པོ་སྣང
287b2 ཡང་ཡོད་མ་ཡིན། །རྣམ་པར་གཞིག་ན་འདུས་པ་མེད། །མུ་སྟེགས་ལྟ་བ་ལྟར་ཡང་མིན། །རྨི་ལམ་སྒྱུ་མ་སྐྲ་ཤད་དང་། །སྨིག་རྒྱུ་དྲི་ཟའི་གྲོང་ཁྱེར་ལྟར། །འཇིག་རྟེན་དངོས་པོ་སྣ་ཚོགས་ཀུན། །རྒྱུ་མེད་མཚན་ཉིད་རབ་ཏུ་སྣང་། །རྒྱུ་ཡོད་སྨྲ
287b3 བ་གདུལ་བའི་ཕྱིར། །མ་སྐྱེས་དོན་ནི་རབ་ཏུ་བསྒྲགས། །སྐྱེ་མེད་རབ་ཏུ་བསྒྲགས་པས་ན། །ཆོས་ཀྱི་ཚུལ་ནི་རྒྱུན་མི་འཆད། །རྒྱུ་མེད་རབ་ཏུ་སྨྲ་བ་ནི། །འཇིགས་པའི་མུ་སྟེགས་ཅན་རྣམས་ཏེ། །ཇི་ལྟར་ཅི་ཡི་ཕྱིར་ན་ནི། །དེ་ཡང་ཅི་ཕྱིར་སྐྱེ་བར
287b4 འགྱུར། །གང་དག་ཏུ་ནི་འདུས་གྱུར་ན། །རྒྱུ་མེད་པར་ནི་སྨྲ་བར་བྱེད། །འདུས་བྱས་ཆོས་རྣམས་རབ་བརྟགས་ན། །རྒྱུ་མེད་རྒྱུ་ཡོད་མ་ཡིན་ཏེ། །སྐྱེ་དང་འཇིག་པར་སྨྲ་བ་ཡི། །ལྟ་བ་དག་ནི་དེ་ནས་ལྡོག་།དེ་ནས་བྱང་ཆུབ་སེམས་དཔའ་བློ་གྲོས
287b5 ཆེན་པོས་ཚིགས་སུ་བཅད་དེ་ཞུ་བ་ཞུས་པ། ཅི་ཡི་སླད་དུ་སྐྱེ་མ་མཆིས། །འོན་ཏེ་དངོས་པོ་མ་མཆིས་སམ། །དེ་སྟེ་རྐྱེན་ལ་བརྟགས་པ་འམ། །ཆོས་མཆིས་མི་སྐྱེ་ཞེས་བགྱི་འམ། །མིང་ནི་དོན་མ་མཆིས་མི་རིགས། །རྣམ་པར་དབྱེ་ཞིང
287b6 བཤད་དུ་གསོལ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། དངོས་མེད་མི་སྐྱེ་མ་ཡིན་ཏེ། །རྐྱེན་ལ་བཏགས་པའང་མ་ཡིན་ནོ། །དངོས་པོ་ཡོད་པས་མིང་ཡོད་མིན། །མིང་ལ་དོན་མེད་པ་ཡང་མིན། །མུ་སྟེགས
287b7 ཅན་ནི་ཐམས་ཅད་དང་། །ཉན་ཐོས་དང་ནི་རང་རྒྱས་དང་། །ས་བདུན་སྤྱོད་ཡུལ་མ་ཡིན་པ། །དེ་ནི་མི་སྐྱེ་མཚན་ཉིད་དོ། །རྒྱུ་དང་རྐྱེན་རྣམས་ཡོངས་སྤངས་ཤིང་། །བྱ་བ་ཐམས་ཅད་ཡོངས་བྲལ་ཏེ། །ཤིན་དུ་ཕྲ་བའི་སེམས་ཅན་གནས། །མཚན
287b8 ཉིད་མཚན་གཞི་ཉིད་སྤངས་ནས། །དེ་ལུས་རབ་ཏུ་གྱུར་པ་ནི། །སྐྱེ་བ་མེད་པར་ངས་བཤད་དོ། །ཕྱི་རོལ་དངོས་པོ་དངོས་མེད་མིན། །སེམས་ཅན་ཡོངས་སུ་གཟུང་བ་མེད། །ལྟ་བ་ཐམས་ཅད་རབ་སྤངས་པ། །སྐྱེ་བ་མེད་པར་ངས་བཤད་དོ། །
iiif viewer powered by OpenSeadragon
