| e-texts navigator |
| Wylie |
284b1 ཡི་གེ་དང་བྲལ་བའི་ཕྱིར་རོ། །དོན་དང་མི་ལྡན་པར་འཆད་པ་ཡང་མ་ཡིན་ཏེ། བརྗོད་པ་ནི་སེམས་ཅན་གྱི་རྣམ་པར་རྟོག་པ་ཡིན་པའི་ཕྱིར་རོ། །བློ་གྲོས་ཆེན་པོ་གལ་ཏེ་ཆོས་ཐམས་ཅད་མ་བཤད་ན་ནི་བསྟན་པའི་ཆོས་རྣམས་འཇིག་པར་འགྱུར་རོ། །བསྟན
284b2 པའི་ཆོས་ཞིག་ན་ནི་སངས་རྒྱས་དང་། བྱང་ཆུབ་སེམས་དཔའ་དང་། རང་སངས་རྒྱས་དང་། ཉན་ཐོས་རྣམས་ཀྱང་མེད་པར་འགྱུར་རོ། །དེ་དག་མེད་ན་ནི་གང་ཞིག་སུ་ལ་ཅི་ཞིག་བཤད་དེ། དེ་ལྟ་བས་ན་བློ་གྲོས་ཆེན་པོ་བྱང་ཆུབ་སེམས་དཔའ་སེམས
284b3 དཔའ་ཆེན་པོས་བཤད་པ་བརྗོད་པའི་སྒྲ་ལ་མངོན་པར་ཆགས་པར་མི་བྱ་ཞིང་། བསམ་པ་ཇི་ལྟ་བ་བཞིན་དུ་མདོ་སྡེའི་ཆོས་རྣམས་རྒྱ་ཆེར་བཤད་པར་བྱའོ། །འདི་ལྟར་སེམས་ཅན་རྣམས་ཀྱི་རེ་བ་དང་། ཉོན་མོངས་པ་ནི་གཅིག་པ་མ་ཡིན་པའི
284b4 ཕྱིར་ང་དང་སངས་རྒྱས་གཞན་རྣམས་ཀྱིས་མོས་པ་ཐ་དད་པ་སྣ་ཚོགས་ཀྱི་སེམས་ཅན་རྣམས་སེམས་དང་ཡིད་དང་། ཡིད་ཀྱི་རྣམ་པར་ཤེས་པ་བཟློག་པའི་ཕྱིར་ཆོས་བསྟན་པར་བྱ་བ་ཡིན་གྱི། སོ་སོ་རང་གིས་རིག་པ་འཕགས་པའི་ཡེ
284b5 ཤེས་ཀྱི་གནས་ཐོབ་པ་ལ་ནི་མ་ཡིན་ནོ། །བློ་གྲོས་ཆེན་པོ་ཆོས་ཐམས་ཅད་སྣང་བ་མེད་པ། རང་གི་སེམས་སྣང་བ་ཙམ་དུ་ཁོང་དུ་ཆུད་པ། རྣམ་པར་རྟོག་པ་གཉིས་སྤངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་དོན
284b6 ལ་རྟོག་པར་བྱའི་ཡི་གེ་ལ་རྟོན་པར་མི་བྱའོ། །བློ་གྲོས་ཆེན་པོ་གལ་ཏེ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཡི་གེ་ལ་རྟོན་པ་དེ་དག་ནི་བདག་ཀྱང་དོན་དམ་པ་ལས་ཉམས་པར་བྱེད་ལ། གཞན་ཡང་རྟོགས་པར་བྱེད་མི་ནུས་ཏེ། ལྟ
284b7 བ་ངན་པའི་རྒྱུད་དུ་ལྷུང་བར་འཁོར་རྣམས་ལ་སྒྲོགས་པར་བྱེད་དེ། ཆོས་ཐམས་ཅད་དང་། ས་ཐམས་ཅད་དང་། མཚན་མ་ཐམས་ཅད་ལ་མི་མཁས་པས་ཚིག་གི་རྣམ་གྲངས་རྟོགས་པས་ཁོང་དུ་མི་ཆུད་དོ། །གལ་ཏེ་ཆོས་ཐམས་ཅད
284b8 དང་། ས་ཐམས་ཅད་དང་། མཚན་མ་ཐམས་ཅད་ལ་མཁས་པ་དང་། ཚིག་གི་རྣམ་གྲངས་རྟོགས་པར་ཁོང་དུ་ཆུད་ཅིང་དངོས་པོའི་དོན་དང་ལྡན་པར་གྱུར་ན། དེ་ཡང་དག་པ་མཚན་མ་མེད་པའི་བདེ་བས་བདག་ཉིད་ཚིམ་པར་བྱེད་ཅིང་སེམས་ཅན
iiif viewer powered by OpenSeadragon
