| e-texts navigator |
| Wylie |
284a1 པར་འཇིག་རྟེན་གྱི་ཁམས་འདི་དང་། གཞན་ཀུན་གྱིས་ང་ལ་ཆུའི་ཟླ་བ་བཞིན་དུ་འབྱུང་བ་ཡང་མེད། འཇུག་པ་ཡང་མེད་པར་རབ་ཏུ་ཤེས་སོ། །བྱིས་པ་སོ་སོའི་སྐྱེ་བོ་དག་གིས་ནི་ང་རབ་ཏུ་མི་ཤེས་ཏེ། མཐའ་གཉིས་སུ་ལྷུང
284a2 བའི་ཕྱིར་རོ། །འོན་ཀྱང་ང་ལ་བཀུར་སྟི་བྱེད་མཆོད་པར་བྱེད་དེ། ཚིག་གི་དོན་གྱི་ཚུལ་ལ་མི་མཁས་པས་མིང་རྣམ་པར་འབྱེད་མི་ནུས་ཤིང་རང་གི་ཚུལ་མི་ཤེས་པས། བརྗོད་པའི་ཚིག་སྣ་ཚོགས་ལ་མངོན་པར་ཞེན་ནས། སྐྱེ་བ་མེད་པ་དང་།
284a3 འགག་པ་མེད་པ་ལ་དངོས་པོ་མེད་པར་འདུ་ཤེས་སོ། །དེ་བཞིན་གཤེགས་པའི་མིང་གི་རྣམ་གྲངས་ཐ་དད་པ་དབང་པོ་དང་། བརྒྱ་བྱིན་དང་། གྲོང་ཁྱེར་འཇིག་པ་ལྟ་བུར་མ་ཤེས་ཤིང་། རང་གི་ཚུལ་མཐར་ཐུག་པ་ལ་རྨོངས་པས། ཆོས་ཐམས
284a4 ཅད་ལ་སྒྲ་ཇི་བཞིན་དུ་མངོན་པར་ཞེན་ཏོ། །བློ་གྲོས་ཆེན་པོ་སྐྱེས་བུ་བླུན་པོ་དེ་དག་འདི་སྐད་དུ་དོན་ནི་ཇི་བཞིན་པ་ཉིད་དེ། སྒྲ་ལས་དོན་གཞན་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟ་སྟེ། དོན་མ་ལུས་པ་མེད་པའི་ཕྱིར་སྒྲ་ལས་གཞན་ཅི་ཡང
284a5 མེད་དོ། །སྒྲ་འབའ་ཤིག་གོ་ཞེས་ཟེར་རོ། །བློ་གྲོས་ཆེན་པོ་ལོག་པས་བསྲེགས་པའི་བློ་ཅན་དེ་དག་སྒྲའི་རང་བཞིན་ཡོངས་སུ་མི་ཤེས་པས་སྒྲ་ལ་སྐྱེ་བ་དང་། འགག་པ་ཡོད་ཅིང་དོན་ལ་སྐྱེ་བ་དང་། འགག་པ་མེད་པར་མི་རིག་གོ། །བློ་གྲོས
284a6 ཆེན་པོ་སྒྲ་ཐམས་ཅད་ནི་ཡི་གེར་ལྷུང་བའོ། །དོན་ནི་མ་ལྷུང་བ་སྟེ། དངོས་པོ་དང་དངོས་པོ་མེད་པ་སྤངས་པའི་ཕྱིར་དང་། སྐྱེ་བ་ལེན་པ་མེད་ཅིང་ལུས་མེད་པའི་ཕྱིར་རོ། །བློ་གྲོས་ཆེན་པོ་དེ་བཞིན་གཤེགས་པ་ནི་ཡི་གེར་ལྷུང་བའི་ཆོས་མི་སྟོན
284a7 ཏེ། ཡི་གེ་རྣམས་ཀྱི་ཡོད་པ་དང་། མེད་པ་མི་དམིགས་པའི་ཕྱིར་གཞན་དུ་ན་ཡི་གེར་མ་ལྷུང་བས། ཆོས་སྟོན་ཏོ། །བློ་གྲོས་ཆེན་པོ་གལ་ཏེ་ཁ་ཅིག་འདི་སྐད་དུ་དེ་བཞིན་གཤེགས་པ་ནི་ཡི་གེར་ལྷུང་བའི་ཆོས་མི་སྟོན་ཏོ་ཞེས་ཟེར་བ། དེ་ནི་བརྫུན་དུ
284a8 སྨྲ་བ་སྟེ། ཆོས་ཉིད་ནི་ཡི་གེ་དང་བྲལ་བའི་ཕྱིར་རོ། །དེ་ལྟ་བས་ན་བློ་གྲོས་ཆེན་པོ་ང་ལ་སོགས་པ་སངས་རྒྱས་དང་། བྱང་ཆུབ་སེམས་དཔའ་རྣམས་ནི་ཡི་གེ་གཅིག་ཀྱང་མ་བཤད་འཆད་པར་མི་འགྱུར་རོ། །དེ་ཅིའི་ཕྱིར་ཞེ་ན། ཆོས་རྣམས
iiif viewer powered by OpenSeadragon
