| e-texts navigator |
| Wylie |
283a1 གཤེགས་པའི་ཚིག་བླ་དགས་སོ་ཞེས་ཀྱང་གསུངས་ན། ཅི་བཅོམ་ལྡན་འདས་ཀྱིས་དངོས་པོ་མ་མཆིས་པའི་སླད་དུ་སྐྱེ་བ་མ་མཆིས་པ་དང་། འགག་པ་མ་མཆིས་པ་ཞེས་གསུངས་སམ། འོན་ཏེ་དེ་བཞིན་གཤེགས་པའི
283a2 རྣམ་གྲངས་གཞན་ཞིག་ལགས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ངས་ཆོས་ཐམས་ཅད་མི་སྐྱེ་བ་དང་། མི་འགག་པ་ཞེས་བཤད་ཀྱང་ཡོད་པ་དང་མེད་པའི་ཕྱོགས་ནི་མི་སྣང་ངོ་། །བློ་གྲོས་ཆེན་པོས་བཅོམ་ལྡན
283a3 འདས་ལ་གསོལ་པ། བཅོམ་ལྡན་འདས་གལ་ཏེ་ཆོས་ཐམས་ཅད་མ་སྐྱེས་པ་ཞིག་ལགས་ན་ནི་ཆོས་ཤེས་སྨོས་པ་ཡང་དམིགས་པར་མི་འགྱུར་ཏེ། ཆོས་ཐམས་ཅད་མ་སྐྱེས་པའི་སླད་དུའོ། །ཅི་སྟེ་མིང་ལ་ཆོས་མཆིས་པ་ཞིག་ལགས
283a4 ནི་བཅོམ་ལྡན་འདས་ཀྱིས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ལེགས་སོ་ལེགས་སོ། །ཤིན་དུ་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་རབ་ཏུ་དབྱེ་ཞིང་བཤད་པར་བྱའོ། །
283a5 བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། དེ་བཞིན་དུ་འཚལ་ལོ་ཞེས་བཀའ་མཉན་པ་དང་། བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །བློ་གྲོས་ཆེན་པོ་ང་ནི་དེ་བཞིན་གཤེགས་པ་དངོས་པོ་མེད་པར་བཤད་པ
283a6 ཡང་མ་ཡིན། སྐྱེ་བ་མེད་པ་དང་། འགག་པ་མེད་པས་ཆོས་ཐམས་ཅད་སྨོས་པ་ཡང་མ་ཡིན། རྐྱེན་ལ་ལྟོས་པ་ཡང་མ་ཡིན་པའི་ཕྱིར། སྐྱེ་བ་མེད་པ་དང་། འགག་པ་མེད་ཀྱང་དོན་མེད་པ་ཡང་མ་ཡིན་ནོ། །བློ་གྲོས་ཆེན་པོ་ངས
283a7 ཡིད་ལས་བྱུང་བའི་ཆོས་ཀྱི་སྐུའི་དེ་བཞིན་གཤེགས་པའི་མིང་གི་ཚིག་བླ་དགས་སུ་མ་སྐྱེས་པ་ཞེས་བཤད་པ་དེ་ནི་མུ་སྟེགས་ཅན་དང་། ཉན་ཐོས་དང་། རང་སངས་རྒྱས་དང་། ས་བདུན་ལ་རབ་ཏུ་གནས་པའི་བྱང་ཆུབ་སེམས་དཔའ
283a8 རྣམས་ཀྱི་སྤྱོད་ཡུལ་མ་ཡིན་པས། བློ་གྲོས་ཆེན་པོ་མ་སྐྱེས་པ་དེ་ནི་དེ་བཞིན་གཤེགས་པའི་རྣམ་གྲངས་ཀྱི་ཚིགས་ཡིན་ནོ། །བློ་གྲོས་ཆེན་པོ་དཔེར་ན། དབང་པོ་དང་། བརྒྱ་བྱིན་དང་། གྲོང་ཁྱེར་འཇིག་དང་། དེ་ལ་སོགས་པ་དངོས
iiif viewer powered by OpenSeadragon
