| e-texts navigator |
| Wylie |
282a1 པར་བྱ་སྟེ། དེ་བཞིན་དུ་རིང་པོ་དང་། ཐུང་ངུ་དང་། གཟུགས་སྣ་ཚོགས་རྣམས་ཀྱང་ཕན་ཚུན་ཐ་དད་དོ། །བློ་གྲོས་ཆེན་པོ་དེ་བཞིན་གཤེགས་པ་ཡང་ཕུང་པོ་དང་། ཁམས་དང་། སྐྱེ་མཆེད་རྣམས་དང་ཐ་དད་པ་ཡང་མ་ཡིན། ཐ་མི
282a2 དད་པ་ཡང་མ་ཡིན་ནོ། །དེ་བཞིན་དུ་དེ་བཞིན་གཤེགས་པ་ཡང་ཐར་པ་དང་ཐ་དད་པ་ཡང་མ་ཡིན་ཐ་མི་དད་པ་ཡང་མ་ཡིན་པས། འདི་ལྟར་དེ་བཞིན་གཤེགས་པ་ནི་ཐར་པའི་མིང་གིས་བསྟན་ཏོ། །གལ་ཏེ་དེ་བཞིན་གཤེགས་པ་དང་ཐར་པ་ཐ་དད་ན
282a3 ནི་གཟུགས་ཀྱི་མཚན་ཉིད་ལས་མངོན་པར་འགྲུབ་པར་འགྱུར་ཏེ། གཟུགས་ཀྱི་མཚན་ཉིད་ལས་མངོན་པར་འགྲུབ་པའི་ཕྱིར་མི་རྟག་པར་འགྱུར་རོ། །ཅི་སྟེ་ཐ་མི་དད་ན་ནི་རྣལ་འབྱོར་པ་རྣམས་ཀྱིས་ཐོབ་པའི་མཚན་ཉིད་བྱེ་བྲག
282a4 མེད་པར་འགྱུར་ཏེ། རྣལ་འབྱོར་པ་རྣམས་ཀྱིས་བྱེ་བྲག་ཀྱང་མཐོང་བས་ན་དེའི་ཕྱིར་ཐ་དད་པ་ཡང་མ་ཡིན། ཐ་མི་དད་པ་ཡང་མ་ཡིན་ནོ། །དེ་བཞིན་དུ་ཤེས་པ་དང་། ཤེས་བྱ་ཡང་ཐ་དད་པ་ཡང་མ་ཡིན། ཐ་མི་དད་པ་ཡང་མ་ཡིན་ནོ། །
282a5 བློ་གྲོས་ཆེན་པོ་ཤེས་པ་དང་། ཤེས་བྱ་ཐ་དད་པ་ཡང་མ་ཡིན། ཐ་མི་དད་པ་ཡང་མ་ཡིན་པ་ནི་རྟག་པ་ཡང་མ་ཡིན། མི་རྟག་པ་ཡང་མ་ཡིན། བྱེད་པ་ཡང་མ་ཡིན། བྱས་པ་ཡང་མ་ཡིན། འདུས་བྱས་ཀྱང་མ་ཡིན། འདུས་མ་བྱས་ཀྱང་མ
282a6 ཡིན། བློ་ཡང་མ་ཡིན། རིག་པར་བྱ་བ་ཡང་མ་ཡིན། མཚན་ཉིད་ཀྱང་མ་ཡིན། མཚན་ཉིད་ཀྱི་གཞི་ཡང་མ་ཡིན། ཕུང་པོ་རྣམས་ཀྱང་མ་ཡིན། ཕུང་པོ་རྣམས་ཐ་དད་པ་ཡང་མ་ཡིན། བཤད་པ་ཡང་མ་ཡིན། བཤད་པར་བྱ་བ་ཡང
282a7 མ་ཡིན། གཅིག་པ་ཡང་མ་ཡིན། ཐ་དད་པ་ཡང་མ་ཡིན། གཉི་ག་ཡང་མ་ཡིན། གཉི་ག་མ་ཡིན་པ་ཡང་མ་ཡིན་པའི་ཕྱིར་ཚད་མ་ཐམས་ཅད་དང་བྲལ་བའོ། །གང་ཚད་མ་ཐམས་ཅད་དང་བྲལ་བ་དེ་ནི་ཚིག་མེད་པའོ། །གང་ཚིག་མེད
282a8 པ་དེ་ནི་མ་སྐྱེས་པའོ། །གང་མ་སྐྱེས་པ་དེ་ནི་མ་འགགས་པའོ། །གང་མ་འགགས་པ་དེ་ནི་རབ་ཏུ་ཞི་བའོ། །གང་རབ་ཏུ་ཞི་བ་དེ་ནི་རང་བཞིན་གྱིས་མྱ་ངན་ལས་འདས་པའོ། །གང་རང་བཞིན་གྱིས་མྱ་ངན་ལས་འདས་པ་དེ་ནི་དངོས་པོ་དང
iiif viewer powered by OpenSeadragon
