| e-texts navigator |
| Wylie |
281b1 ཡིན་མེད་པ་ཡང་མ་ཡིན། གང་ཡོད་པ་ཡང་མ་ཡིན། མེད་པ་ཡང་མ་ཡིན་པ་དེ་ནི་མཐའ་བཞི་ལས་འདས་པའོ། །མཐའ་བཞི་གང་ཡིན་པ་དེ་ནི་འཇིག་རྟེན་གྱི་བརྗོད་པའོ། །གང་མཐའ་བཞི་ལས་འདས་པ་དེ་ནི་མཐའ་བཞིར་མ་ལྷུང་བའོ། །མ་ལྷུང
281b2 བའི་ཕྱིར་མཁས་པ་རྣམས་ཀྱིས་ལེན་པར་བྱེད་དེ། དེ་བཞིན་གཤེགས་པ་ཐམས་ཅད་ཀྱིས་ཚིག་གི་དོན་ཀྱང་དེ་བཞིན་དུ་རིག་པར་བྱའོ། །བློ་གྲོས་ཆེན་པོ་བློ་དང་ལྡན་པ་རྣམས་ཀྱིས་ཇི་ལྟར་ངས་ཆོས་ཐམས་ཅད་བདག་མེད་པའོ་ཞེས་བཤད
281b3 པ་དེའི་དོན་ཀྱང་ཁོང་དུ་ཆུད་པར་བྱའོ། །བདག་མེད་པའི་དངོས་པོ་ནི་བདག་མེད་པ་ཉིད་དེ་ཆོས་ཐམས་ཅད་ནི་རང་གི་དངོས་པོར་ཡོད་ཀྱི་གཞན་གྱི་དངོས་པོར་ནི་མེད་དོ། །ཇི་ལྟར་བ་ལང་དང་རྟ་བཞིན་ཏེ། བློ་གྲོས་ཆེན་པོ་དཔེར་ན་བ་ལང་དང་། རྟའི
281b4 དངོས་པོ་མ་ཡིན་པ་ལ་བ་ལང་དང་རྟའི་དངོས་པོ་དེ་ཡང་དག་པར་ཡོད་པ་ཡང་མ་ཡིན། མེད་པ་ཡང་མ་ཡིན། ཡང་དེ་རང་གི་མཚན་ཉིད་མེད་པ་ནི་མ་ཡིན་ནོ། །དེ་བཞིན་དུ་བློ་གྲོས་ཆེན་པོ་ཆོས་ཐམས་ཅད་རང་གི་མཚན་ཉིད་མེད་པ་ཡང
281b5 མ་ཡིན་ཏེ། རང་གི་མཚན་ཉིད་ཡོད་ཀྱང་བྱིས་པ་སོ་སོའི་སྐྱེ་བོ་རྣམས་ཀྱིས་བདག་མེད་པ་ཁོང་དུ་ཆུད་པར་ནུས་པ་མ་ཡིན་ཏེ། འདི་ལྟར་རྣམ་པར་རྟོག་པའི་ཕྱིར་རོ། །དེ་བཞིན་དུ་ཆོས་ཐམས་ཅད་སྟོང་པ་དང་། སྐྱེ་བ་མེད་པ་དང་། རང་བཞིན་མེད་པ
281b6 ཡང་དེ་བཞིན་དུ་རིག་པར་བྱའོ། །དེ་བཞིན་དུ་དེ་བཞིན་གཤེགས་པ་ནི་ཕུང་པོ་རྣམས་དང་། ཐ་དད་པ་ཡང་མ་ཡིན། གཅིག་པ་ཡང་མ་ཡིན་ཏེ། གལ་ཏེ་ཕུང་པོ་རྣམས་དང་ཐ་དད་པ་མ་ཡིན་ན་ནི་མི་རྟག་པ་ཡིན་པར་འགྱུར་རོ། །ཅི་སྟེ
281b7 ཐ་དད་ན་ནི་སྦྱོར་བ་རྣམས་དོན་མེད་པར་འགྱུར་རོ། །གལ་ཏེ་གཉིས་སུ་གྱུར་ན་ནི་ཐ་དད་པར་འགྱུར་ཏེ། ཇི་ལྟར་བ་ལང་གི་རྭ་བཞིན་དུ་འདྲ་བའི་ཕྱིར་ཐ་དད་པ་ཡང་མ་ཡིན་ལ། རིང་ཐུང་བྱེ་བྲག་ཡོད་པའི་ཕྱིར་ཐ་དད་པ་ཡང་མ་ཡིན་ཏེ།
281b8 ཆོས་ཐམས་ཅད་ཀྱང་དེ་བཞིན་ནོ། །བློ་གྲོས་ཆེན་པོ་ཇི་ལྟར་བ་ལང་གི་རྭ་གཡས་པ་ནི་རྭ་གཡོན་པ་ལས་ཐ་དད་ལ། རྭ་གཡོན་པ་ནི་རྭ་གཡས་པ་ལས་ཐ་དད་པས། དེའི་ཕྱིར་རྭ་གཉིས་ནི་གདོན་མི་ཟ་བར་ཐ་དད་པ་ཡིན་པར་རིག
iiif viewer powered by OpenSeadragon
