| e-texts navigator |
| Wylie |
281a1 ཅི་ཡང་མེད། །འཕགས་པ་ལང་ཀར་གཤེགས་པ་རིན་པོ་ཆེའི་མདོ་ལས། བམ་པོ་བདུན་པ། དེ་ནས་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས
281a2 ཡང་དག་པར་རྫོགས་པའི་སངས་རྒྱས་པ་ཉིད་བཤད་དུ་གསོལ། དེ་ནས་བདག་དང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་རྣམས་དེ་བཞིན་གཤེགས་པའི་རང་བཞིན་ལ་མཁས་ཤིང་། བདག་དང་གཞན་རྣམས་ཁོང་དུ་ཆུད
281a3 པར་བགྱིད་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ཁྱོད་ཇི་ལྟར་འདོད་པ་བཞིན་དུ་དྲིས་ཤིག་དང་། ངས་ཇི་ལྟར་ཁྱོད་ཀྱིས་དྲིས་པ་དེ་བཞིན་དུ་བཤད་པར་བྱའོ། །བློ་གྲོས་ཆེན་པོས་བཅོམ་ལྡན་འདས
281a4 ལ་གསོལ་པ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བགྱིས་པ་འམ། མ་བགྱིས་པ་འམ། དངོས་པོ་འམ། རྒྱུ་འམ། མཚན་ཉིད་དམ། མཚན་ཉིད་ཀྱི་གཞི་འམ་བརྗོད
281a5 པའམ། བརྗོད་པར་བགྱི་བའམ། བློ་འམ། རིག་པར་བགྱི་བའམ། དེ་ལྟ་བུ་ལ་སོགས་པའི་ཚིག་རྣམས་དང་། ཐ་དད་པའམ། ཐ་དད་པ་མ་ལགས་པ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེ
281a6 བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་དེ་ལྟ་བུ་ལ་སོགས་པའི་ཚིག་གི་དངོས་པོ་ཡང་མ་ཡིན། རྒྱུ་ཡང་མ་ཡིན་ཏེ། དེ་ཅིའི་ཕྱིར་ཞེ་ན། གཉི་ག་ཡང་ཉེས་པར་འགྱུར་བའི་ཕྱིར་རོ། །བློ་གྲོས་ཆེན
281a7 པོ་གལ་ཏེ་དེ་བཞིན་གཤེགས་པ་དངོས་པོ་ཡིན་མིན་བྱས་པའམ། མི་རྟག་པར་འགྱུར་ཏེ། མི་རྟག་པའི་ཕྱིར་དངོས་པོ་ཐམས་ཅད་ཀྱང་དེ་བཞིན་གཤེགས་པར་འགྱུར་བས་ན། དེ་ནི་ང་དང་དེ་བཞིན་གཤེགས་པ་ཐམས་ཅད་ཀྱང་མི་བཞེད་དོ། །ཅི་སྟེ
281a8 བྱས་པ་མ་ཡིན་ན་ནི་དམིགས་སུ་མེད་པའི་ཕྱིར་སྦྱོར་བ་རྣམས་དོན་མེད་པར་འགྱུར་ཏེ། རི་བོང་གི་རྭ་དང་། མོ་ཤམ་གྱི་བུ་ལྟར་ཡོད་པ་མ་ཡིན་པའི་ཕྱིར་རོ། །བློ་གྲོས་ཆེན་པོ་གང་དངོས་པོ་ཡང་མེད། རྒྱུ་ཡང་མེད་པ་ནི་ཡོད་པ་ཡང་མ
iiif viewer powered by OpenSeadragon
