| e-texts navigator |
| Wylie |
278b1 ཡོངས་སུ་བཟུང་བས་ནི་རྟག་པར་ལྟ་བ་འབྱུང་ངོ་། །ཕྱི་རོལ་གྱི་རྒྱུ་འཇིག་ཅིང་རྒྱུ་དང་རྐྱེན་དངོས་པོ་མེད་པར་མཐོང་བ་ལས་ནི་ཆད་པར་ལྟ་བ་འབྱུང་སྟེ། བློ་གྲོས་ཆེན་པོ་དེ་ནི་སྐྱེ་བ་དང་། གནས་པ་དང་། འཇིག་པ་མི་མཐོང་བའི་ཕྱིར་ཆོས
278b2 ཤེས་བྱའོ། །བློ་གྲོས་ཆེན་པོ་དེ་ནི་ཟང་ཟིང་དང་ཆོས་ཤེས་བྱ་སྟེ། དེ་ལ་ཁྱོད་དང་བྱང་ཆུབ་སེམས་དཔའ་སེམས་དཔའ་ཆེན་པོ་གཞན་དག་གིས་བསླབ་པར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར
278b3 ཚིགས་སུ་བཅད་པ་འདི་དག་གསུངས་སོ། །འཇིག་རྟེན་རྒྱང་པན་ཐམས་ཅད་ནི། །མུ་སྟེགས་ཅན་གྱིས་བཤད་དེ་བརྫུན། །རྣམ་རྟོག་བྱེད་དང་བྱ་བར་མཐོང་། །དེ་ལ་རང་གི་གྲུབ་མཐའ་མེད། །ང་ཡི་གྲུབ་མཐའ་འདི་འབའ་ཤིག་།བྱེད་དང་བྱ
278b4 བ་ཡོངས་སུ་སྤངས། །འཇིག་རྟེན་རྒྱང་པན་རྣམ་བྲལ་བ། །སློབ་མ་རྣམས་ལ་རབ་ཏུ་བཤད། །སེམས་ཙམ་དེ་ནི་མི་དམིགས་པས། །སེམས་གཉིས་སོ་སོར་རྟོག་མི་བྱེད། །གཟུང་དང་འཛིན་པ་དངོས་མེད་དེ། །རྟག་ཆད་གཉི་ག་ཡོངས
278b5 སུ་སྤངས། །ཇི་སྲིད་སེམས་ནི་འཇུག་པའི་བར། །དེ་སྲིད་འཇིག་རྟེན་རྒྱང་པན་ཡིན། །རྣམ་པར་རྟོག་པ་མི་འཇུག་ན། །དེས་ནི་རང་གི་སེམས་མཐོང་ངོ་། །འོང་ཚེ་དངོས་པོ་སྐྱེ་ཞེས་བྱ། །འགྲོ་ཚེ་དངོས་པོ་ཡོང་མི་སྣང་། །འགྲོ་འོང་ལེགས
278b6 པར་གསལ་རྟོགས་ན། །རྣམ་པར་རྟོག་པ་ཡང་མི་སྐྱེ། །རྟག་པ་དང་ནི་མི་རྟག་དང་། །བྱས་པ་དང་ནི་མ་བྱས་པ། །འཇིག་རྟེན་འདི་དང་འཇིག་རྟེན་གཞན། །ཐམས་ཅད་འཇིག་རྟེན་རྒྱང་པན་ཚུལ། །དེ་ནས་ཡང་བློ་གྲོས་ཆེན་པོས
278b7 བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མྱ་ངན་ལས་འདས་པ་ཞེས་བགྱི་བ། ཆོས་ཇི་ལྟ་བུ་ཞིག་ལ་མྱ་ངན་ལས་འདས་པ་ཞེས་བགྱི་ན། མུ་སྟེགས་ཅན་རྣམས་སོ་སོ་ནས་རྣམ་པར་རྟོག་པ་སྐྱེད་པར
278b8 བགྱིད། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེའི་ཕྱིར་ཤིན་དུ་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་ཁྱོད་ལ་ཇི་ལྟར་མུ་སྟེགས་ཅན་རྣམས་མྱ་ངན་ལས་འདས་པར་རྣམ་པར་རྟོགས་པ
iiif viewer powered by OpenSeadragon
