| e-texts navigator |
| Wylie |
272b1 པས་ཡོད་པ་དང་མེད་པའི་མཚན་ཉིད་མི་དམིགས་སོ། །བློ་གྲོས་ཆེན་པོ་གལ་ཏེ་དམ་བཅས་པ་མ་སྐྱེས་པ་དེས་དངོས་པོ་ཐམས་ཅད་མ་སྐྱེས་པའོ་ཞེས་དམ་བཅའ་བར་བྱེད་ན། དེ་ལྟ་ན་ཡང་དམ་བཅས་པ་ལས་ཉམས་པར་འགྱུར་ཏེ།
272b2 འདི་ལྟར་ཡོད་པ་དང་མེད་པའི་དངོས་པོའི་མཚན་ཉིད་ནི་མི་སྐྱེ་བའི་ཕྱིར་དམ་བཅའ་བར་མི་བྱའོ། །ཡན་ལག་ལྔ་དང་ལྡན་པའི་སྨྲ་བ་ནི་ཉེས་པ་མང་པོའི་ཕྱིར་དང་། ཕན་ཚུན་རྒྱུ་ཐ་དད་པའི་མཚན་ཉིད་ཀྱི་ཕྱིར་དང་། བྱས་པའི་ཕྱིར་ཡན
272b3 ལག་རྣམས་དམ་བཅའ་བར་མི་བྱའོ། །འདི་ལྟ་སྟེ། ཆོས་ཐམས་ཅད་མ་སྐྱེས་པ་དང་། དེ་བཞིན་དུ་ཆོས་ཐམས་ཅད་སྟོང་པ་དང་། རང་བཞིན་མེད་པའོ་ཞེས་དམ་བཅའ་བར་མི་བྱ་མོད་ཀྱི། བློ་གྲོས་ཆེན་པོ་འོན་ཀྱང་བྱང་ཆུབ་སེམས
272b4 དཔའ་སེམས་དཔའ་ཆེན་པོས་ཆོས་ཐམས་ཅད་སྒྱུ་མ་དང་། རྨི་ལམ་ལྟ་བུ་བསྟན་པར་བྱ་སྟེ། སྣང་བ་དང་། མི་སྣང་བའི་མཚན་ཉིད་ཀྱི་ཕྱིར་ལྟ་བ་དང་། བློ་སླུ་བར་བྱེད་པའི་ཕྱིར་ཆོས་ཐམས་ཅད་སྒྱུ་མ་དང་། རྨི་ལམ་ལྟ་བུའི་ངོ་བོ
272b5 ཉིད་དུ་བསྟན་པར་བྱའོ། །གཞན་དུ་ན་བྱིས་པ་སོ་སོའི་སྐྱེ་བོ་རྣམས་སྐྲག་པའི་གནས་སྤང་བར་བྱ་བའི་ཕྱིར་དང་། བློ་གྲོས་ཆེན་པོ་བྱིས་པ་སོ་སོའི་སྐྱེ་བོ་རྣམས་ཡོད་པ་དང་། མེད་པའི་ལྟ་བར་ལྷུང་བ་དེ་དག་སྐྲག་པར་མི་འགྱུར་ཞིང
272b6 ཐེག་པ་ཆེན་པོ་ལས་རིང་དུ་མི་འགྱུར་བར་བྱ་བའི་ཕྱིར་རོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །རང་བཞིན་མེད་པས་བརྗོད་དུ་མེད། །དངོས་པོ་མེད་ཅིང་མཚམས
272b7 སྦྱོར་མེད། །འདི་དག་རོ་བཞིན་བྱིས་པ་ཡི། །ལོག་པའི་བློ་ཡིས་རྣམ་པར་བརྟགས། །ཆོས་རྣམས་ཐམས་ཅད་མ་སྐྱེས་པ། །དེ་ནི་མུ་སྟེགས་གཞུང་མ་ཡིན། །མཐར་ནི་སྐྱེ་བ་གང་ཡང་མེད། །དངོས་པོ་རྐྱེན་གྱིས་བསྒྲུབས་པའོ། །
272b8 ཆོས་རྣམས་ཐམས་ཅད་མ་སྐྱེས་པས། །བློ་ལྡན་མཚན་མར་འཛིན་མི་བྱེད། །དམ་བཅས་རྒྱུ་ལས་སྐྱེས་པའི་ཕྱིར། །མཁས་པ་དག་གིས་ཡོངས་སུ་སྤོང་། །ཇི་ལྟར་རབ་རིབ་མིག་ཅན་གྱིས། །སྐྲ་ཤད་མཚན་ཉིད་ལོག་པར་མཐོང་། །
iiif viewer powered by OpenSeadragon
