| e-texts navigator |
| Wylie |
271b1 བཞིན་དུ་མཐོང་བར་མི་འགྱུར་ཏེ། རང་གི་མཚན་ཉིད་ཀྱི་སྤྱོད་ཡུལ་ལ་སྤྱོད་ཡུལ་དུ་མི་བགྱིད་པའི་སླད་དུའོ། །བཅོམ་ལྡན་འདས་དེ་དག་ལ་ཡང་དངོས་པོའི་རང་བཞིན་གྱི་མཚན་ཉིད་རྣམས་ཀུན་བརྟགས་པའི་རང་བཞིན་ཉིད་བཞིན་དུ་སྣང་སྟེ།
271b2 རྒྱུ་མ་བསྟན་པས་རྒྱུ་མ་མཆིས་པའི་སླད་དུ་འདི་ལྟ་སྟེ། དངོས་པོའི་མཚན་ཉིད་ཀྱི་ལྟ་བར་ལྷུང་བས་སྤྱོད་ཡུལ་ཐ་དད་པར་འགྱུར་ཏེ། དེ་དག་ཇི་ལྟ་བ་བཞིན་དུ་མ་ལགས་པས་འདི་ལྟར་ཐུག་པ་མ་མཆིས་པའི་ནོངས་པར་འགྱུར་ཏེ། བཅོམ་ལྡན
271b3 འདས་དངོས་པོའི་རང་བཞིན་གྱི་མཚན་ཉིད་ཁོང་དུ་མ་ཆུད་པའི་སླད་དུའོ། །བཅོམ་ལྡན་འདས་རྣམ་པར་རྟོག་པའི་རང་བཞིན་གྱི་རྒྱུས་དངོས་པོའི་རང་བཞིན་གྱི་མཚན་ཉིད་མ་ལགས་ན། ཇི་ལྟར་ཀུན་དུ་རྟོག་པ་དེ་དག་ཀུན་དུ་རྟོག་པར་མི་འགྱུར
271b4 ཞིང་། ཡང་དག་པ་ཇི་ལྟ་བ་བཞིན་དུ་ཀུན་བརྟགས་ལགས་པར་ཁོང་དུ་ཆུད་པར་འགྱུར། བཅོམ་ལྡན་འདས་སོ་སོར་རྣམ་པར་རྟོག་པའི་མཚན་ཉིད་ཀྱང་གཞན། རང་བཞིན་གྱི་མཚན་ཉིད་ཀྱང་གཞན་ཏེ། བཅོམ་ལྡན་འདས་རྒྱུ་མི་མཚུངས
271b5 ན་རྣམ་པར་རྟོག་པ་དང་། རང་བཞིན་གྱི་མཚན་ཉིད་ལ་དེ་དག་ཅིའི་སླད་དུ་སོ་སོར་རྣམ་པར་རྟོག་པར་མི་བགྱིད། གཞན་ཡང་ཅིའི་སླད་དུ་བྱིས་པ་སོ་སོའི་སྐྱེ་བོ་རྣམས་ནི་ཡང་དག་པ་ཇི་ལྟ་བ་བཞིན་དུ་མི་རིག་སྟེ། འོན་ཀྱང་སེམས་ཅན
271b6 རྣམས་ཀྱི་རྣམ་པར་རྟོག་པ་ཡོངས་སུ་སྤང་བའི་ཕྱིར་ཀུན་བརྟགས་པའི་མཚན་ཉིད་བཞིན་ནོ་ཞེས་བསྟན་ཀྱང་ཡང་དག་པ་ཡོད་པ་མ་ཡིན་ནོ་ཞེས་གསུངས། བཅོམ་ལྡན་འདས་ཅིའི་སླད་དུ་སེམས་ཅན་རྣམས་ཀྱིས་མཆིས་པ་དང་མ་མཆིས་པ་དང
271b7 མཆིས་པའི་ལྟ་བའི་དངོས་པོའི་རང་བཞིན་དང་། འཕགས་པའི་ཡེ་ཤེས་ཀྱི་སྤྱོད་ཡུལ་ལ་མངོན་པར་ཞེན་པ་དང་། མཆིས་པའི་ལྟ་བར་ལྷུང་བ་ལ་མངོན་པར་ཞེན་པ་བཟློག་ནས་སྟོང་པའི་ཆོས་ནི་དངོས་པོ་མེད་དོ་ཞེས་གསུངས་ཤིང་འཕགས་པའི
271b8 རང་བཞིན་གྱི་དངོས་པོ་བཀའ་སྩལ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ང་ནི་སྟོང་པའི་ཆོས་དངོས་པོ་མེད་པར་བཤད་པ་ཡང་མ་ཡིན། ཡོད་པའི་ལྟ་བར་ལྷུང་བས་འཕགས་པའི་ཡེ་ཤེས་ཀྱི་རང་བཞིན་གྱི་དངོས་པོ
iiif viewer powered by OpenSeadragon
