| e-texts navigator |
| Wylie |
271a1 རང་བཞིན་གྱི་མཚན་ཉིད་ལ་ལྟོས་པ་ཞིག་མ་ལགས་ན། བཅོམ་ལྡན་འདས་ཀུན་ནས་ཉོན་མོངས་པ་དང་། རྣམ་པར་བྱང་བ་དངོས་པོ་མ་མཆིས་པར་བཀའ་སྩལ་པའི་སྐྱོན་དུ་མི་འགྱུར་བ་ལགས་སམ། ཆོས་ཐམས
271a2 ཅད་ནི་ཀུན་བརྟགས་པའི་རང་བཞིན་ཉིད་དེ་དངོས་པོ་མ་མཆིས་པའི་སླད་དུའོ། །བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་དེ་དེ་བཞིན་ཏེ། ཁྱོད་ཀྱིས་ཇི་སྐད་སྨྲས་པ་བཞིན་ནོ། །བློ་གྲོས་ཆེན་པོ་ཇི་ལྟར་བྱིས་པ་སོ
271a3 སོའི་སྐྱེ་བོ་རྣམས་ཀྱིས་དངོས་པོའི་རང་བཞིན་དུ་རྣམ་པར་བརྟགས་པ་ལྟར་ཡང་དག་པ་ཉིད་ནི་དེ་ལྟ་མ་ཡིན་པས་ཀུན་བརྟགས་པའི་རང་བཞིན་དེ་ནི་དངོས་པོའི་རང་བཞིན་གྱི་མཚན་ཉིད་དུ་ཡོད་པ་མ་ཡིན་ཏེ། འོན་ཀྱང་བློ་གྲོས་ཆེན་པོ
271a4 འཕགས་པ་རྣམས་ཀྱི་ཡེ་ཤེས་ཀྱིས་དངོས་པོ་ཡོད་པའི་རང་བཞིན་ཇི་ལྟ་བ་བཞིན་དུ་འཕགས་པའི་ཡེ་ཤེས་དང་། འཕགས་པའི་མཐོང་བ་དང་། འཕགས་པའི་ཤེས་རབ་ཀྱི་མིག་གིས་དངོས་པོའི་རང་བཞིན་དེ་བཞིན་དུ་རྟོགས་སོ། །བློ་གྲོས
271a5 ཆེན་པོས་གསོལ་པ། བཅོམ་ལྡན་འདས་གལ་ཏེ་འཕགས་པ་རྣམས་ཀྱི་འཕགས་པའི་ཡེ་ཤེས་དང་། འཕགས་པའི་མཐོང་བ་དང་། འཕགས་པའི་ཤེས་རབ་ཀྱི་མིག་གིས་ལགས་ཀྱི། ལྷའི་མིག་དང་། ཤའི་མིག་གིས་དངོས་པོའི
271a6 རང་བཞིན་དེ་བཞིན་དུ་རྟོགས་པར་མི་འགྱུར་ཏེ། བྱིས་པ་སོ་སོའི་སྐྱེ་བོ་དག་གིས་ཇི་ལྟར་བརྟགས་པ་དེ་ལྟར་མ་ལགས་ན། བཅོམ་ལྡན་འདས་ཇི་ལྟར་བྱིས་པ་སོ་སོའི་སྐྱེ་བོ་རྣམས་ཀྱི་རྣམ་པར་རྟོག་པ་ལྡོག་པར་འགྱུར་ཏེ།
271a7 འཕགས་པའི་ངོ་བོ་ཉིད་ཀྱི་དངོས་པོ་ཁོང་དུ་མ་ཆུད་པའི་སླད་དུའོ། །བཅོམ་ལྡན་འདས་དེ་དག་ནི་ཕྱིན་ཅི་ལོག་ཀྱང་མ་ལགས། ཕྱིན་ཅི་མ་ལོག་པ་ཡང་མ་ལགས་སོ། །དེ་ཅིའི་སླད་དུ་ཞེ་ན། འདི་ལྟ་སྟེ། འཕགས་པའི་དངོས་པོའི
271a8 ངོ་བོའི་རང་བཞིན་ཁོང་དུ་མ་ཆུད་པ་དང་། མཆིས་པ་དང་། མ་མཆིས་པ་དང་བྲལ་བའི་མཚན་ཉིད་མ་མཐོང་བའི་སླད་དུའོ། །བཅོམ་ལྡན་འདས་འཕགས་པ་རྣམས་ནི་འདི་ལྟ་བུའི་མཐོང་བས་དེ་ལྟ་བུའི་དངོས་པོ་ལྟར་རྣམ་པར་བརྟགས་པ
iiif viewer powered by OpenSeadragon
