| e-texts navigator |
| Wylie |
270a1 གི་མཚན་ཉིད་ལ་རྣམ་པར་རྟོག་པ་མངོན་པར་ཞེན་པའི་མཚམས་སྦྱོར་བ་དང་། རང་གི་རྣམ་པར་རྟོག་པ་ལ་བར་ཆད་མེད་པ་ཡོད་པར་རྣམ་པར་རྟོག་པ་མངོན་པར་ཞེན་པའི་མཚམས་སྦྱོར་བ་དང་། ཡོད་པ་དང་མེད་པའི་ཕྱོགས་མུ་སྟེགས་ཅན
270a2 གྱི་གནས་ལ་རྣམ་པར་རྟོག་པ་མངོན་པར་ཞེན་པའི་མཚམས་སྦྱོར་བ་དང་། ཐེག་པ་གསུམ་དང་། ཐེག་པ་གཅིག་ལ་བར་ཆད་མེད་པ་ཡོད་པར་རྣམ་པར་རྟོག་པ་མངོན་པར་ཞེན་པའི་མཚམས་སྦྱོར་བའོ། །བློ་གྲོས་ཆེན་པོ་དེ་དག་དང་གཞན་རྣམས
270a3 ཀྱང་བྱིས་པ་སོ་སོའི་སྐྱེ་བོ་རྣམས་ཀྱིས་རང་གི་རྣམ་པར་རྟོག་པས་མཚམས་སྦྱོར་བ་ཡིན་ཏེ། དེ་ལྟར་མཚམས་སྦྱོར་བའི་ཕྱིར་བྱིས་པ་སོ་སོའི་སྐྱེ་བོ་རྣམས་རྣམ་པར་རྟོག་པར་བྱེད་པས་ཇི་ལྟར་དར་གྱི་སྲིན་བུ་སྐོན་པ་བྱེད་པ་བཞིན་དུ་རྣམ་པར་རྟོག
270a4 པའི་དར་སྐུད་ཀྱིས་བདག་དང་གཞན་ལ་ཡོངས་སུ་དཀྲི་ཞིང་ཡོད་པ་དང་མེད་པར་མཚམས་སྦྱོར་བའི་མཚན་ཉིད་ལ་མངོན་པར་ཞེན་ཏོ། །བློ་གྲོས་ཆེན་པོ་འདི་ལ་མཚམས་སྦྱོར་བ་དང་། མཚམས་མི་སྦྱོར་བའི་མཚན་ཉིད་གང་ཡང་མེད་དེ། ཆོས
270a5 ཐམས་ཅད་རབ་ཏུ་དབེན་པར་མཐོང་བས་རྣམ་པར་རྟོག་པ་མི་འབྱུང་བའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཆོས་ཐམས་ཅད་རབ་ཏུ་དབེན་པར་མཐོང་ངོ་། །གཞན་ཡང་བློ་གྲོས་ཆེན་པོ་ཕྱི་རོལ་གྱི་དངོས་པོ་རྣམས་དངོས་པོ
270a6 མེད་པ་དང་། རང་གི་སེམས་སྣང་བའི་མཚན་ཉིད་དུ་ཁོང་དུ་ཆུད་ཅིང་སྣང་བ་མེད་པ་དང་། རང་གི་སེམས་སྣང་བ་ཙམ་དུ་སོ་སོར་རྟོག་པའི་རྗེས་སུ་འབྲང་བ་དང་། ཡོད་པ་དང་མེད་པའི་དངོས་པོ་ཐམས་ཅད་ཀྱི་མཚན་མ་མེད་པ་དང་། རྣམ་པར་རྟོག
270a7 པའི་མཚམས་སྦྱོར་བ་རབ་ཏུ་དབེན་པར་མཐོང་བའི་ཕྱིར་ཆོས་ཐམས་ཅད་ལ་མཚམས་སྦྱོར་བ་ཡང་མེད། མཚམས་སྦྱོར་བ་མ་ཡིན་པའི་མཚན་ཉིད་ཀྱང་མེད་དོ། །བློ་གྲོས་ཆེན་པོ་འདི་ལ་གང་ཡང་འཆིང་བའམ་གྲོལ་བ་མེད་དེ། གཞན་དུ་ན་ཡང
270a8 དག་པ་མ་ཡིན་པར་ལྷུང་བའི་བློ་ཅན་དག་གིས་བཅིངས་པ་དང་གྲོལ་བ་ཡོད་པར་ཤེས་སོ། །དེ་ཅིའི་ཕྱིར་ཞེ་ན། འདི་ལྟ་སྟེ། ཆོས་ཐམས་ཅད་ལ་ཡོད་པ་དང་། མེད་པ་དང་། སེམས་ཅན་མི་དམིགས་པའི་ཕྱིར་རོ། །གཞན་ཡང་བློ་གྲོས་ཆེན་པོ་བྱིས
iiif viewer powered by OpenSeadragon
