| e-texts navigator |
| Wylie |
268b1 ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །ལས་རྣམས་སོགས་པ་རྣམས་ཤེས་ཏེ། །མི་སོག་དེ་ནི་ཡེ་ཤེས་སོ། །ཆོས་རྣམས་སོ་སོར་རབ་བརྟགས་ཏེ། །སྣང་བ་མེད་པར་རྟོགས་པ་དང་། །དབང་དང་སྟོབས་ཀྱང་ཐོབ
268b2 གྱུར་ན། །དེ་ནི་ཤེས་རབ་ཅེས་བྱའོ། །ཡུལ་དང་འབྲེལ་བ་སེམས་ཡིན་ཏེ། །རྣམ་རྟོགས་རིག་པ་ཡེ་ཤེས་ཡིན། །སྣང་བ་མེད་དང་ཁྱད་པར་ལས། །ཤེས་རབ་དག་ནི་སྐྱེ་བར་འགྱུར། །སེམས་དང་ཡིད་དང་རྣམ་ཤེས་དང་། །རྟོགས་པའི་འདུ་ཤེས
268b3 སྤངས་པ་དང་། །རྣམ་རྟོག་མེད་པའི་ཆོས་ཐོབ་པ། །རྒྱལ་སྲས་ཡིན་ཏེ་ཉན་ཐོས་མིན། །རབ་ཞི་ཁྱད་པར་བཟོད་པ་དང་། །དེ་བཞིན་གཤེགས་པ་རྣམ་དག་གི། །ཡེ་ཤེས་ལས་ནི་དོན་དགེ་སྐྱེ། །ཀུན་དུ་སྤྱོད་པ་རྣམ་པར་སྤངས། །ང་ཡི་ཡེ་ཤེས
268b4 རྣམ་གསུམ་སྟེ། །འཕགས་པས་ཡང་དག་རབ་ཏུ་ཕྱེ། །མཚན་ཉིད་དེ་ལ་རྟོག་པ་ནི། །དངོས་པོ་རྣམས་དང་འབྲེལ་པའོ། །ཐེག་པ་གཉིས་ནི་ལྡན་པ་མིན། །ཡེ་ཤེས་སྣང་བ་རྣམ་པར་སྤོངས། །དངོས་པོ་ཡོད་པར་ཞེན་པ་ནི། །ཉན་ཐོས་རྣམས
268b5 ལས་བྱུང་བ་ཡིན། །སེམས་ཙམ་ལས་ནི་འདས་པ་ན། །བདེ་གཤེགས་ཡེ་ཤེས་དྲི་མ་མེད། །གཞན་ཡང་བློ་གྲོས་ཆེན་པོ་མུ་སྟེགས་ཅན་རྣམས་ལ་རྣམ་པར་འགྱུར་བར་སྨྲ་བ་རྣམ་པ་དགུ་ཡོད་པས་མུ་སྟེགས་ཅན་རྣམས་ཀྱི་འགྱུར་བར
268b6 ལྟ་བ་སྐྱེའོ། །འདི་ལྟ་སྟེ། དབྱིབས་འགྱུར་བ་དང་། མཚན་ཉིད་འགྱུར་བ་དང་། རྒྱུ་འགྱུར་བ་དང་། རིགས་འགྱུར་བ་དང་། ལྟ་བ་འགྱུར་བ་དང་། ངོ་བོ་ཉིད་འགྱུར་བ་དང་། རྐྱེན་སྣང་བར་བྱེད་པ་འགྱུར་བ་དང་། བྱ་བ་སྣང་བར་བྱེད་པ་འགྱུར་བ
268b7 དང་། དངོས་པོ་འགྱུར་བའོ། །བློ་གྲོས་ཆེན་པོ་འདི་ནི་རྣམ་པར་འགྱུར་བའི་ལྟ་བ་རྣམ་པ་དགུ་ཞེས་བྱ་སྟེ། དེའི་རྒྱུས་མུ་སྟེགས་ཅན་ཐམས་ཅད་ཡོད་པ་དང་མེད་པ་ལས་སྐྱེ་བའི་རྣམ་པར་འགྱུར་བ་སྨྲ་བར་འགྱུར་བ་ཡིན་ནོ། །དེ་ལ་དབྱིབས
268b8 འགྱུར་བ་གང་ཞེ་ན། འདི་ལྟར་དབྱིབས་གཞན་དུ་འགྱུར་བར་མཐོང་བ་སྟེ། དཔེར་ན་གསེར་ལས་སྣོད་དང་། རྒྱན་སྣ་ཚོགས་སུ་བྱས་པས་དབྱིབས་སྣ་ཚོགས་སུ་གྱུར་པར་སྣང་ཡང་གསེར་གྱི་ངོ་བོ་ཉིད་ལ་འགྱུར་བ་མེད་པ་དེ་བཞིན་དུ
iiif viewer powered by OpenSeadragon
