| e-texts navigator |
| Wylie |
262a1 དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་གི་གསུང་ཡང་དེ་བཞིན་དུ་རྣམ་པ་དྲུག་བཅུ་རྩ་བཞི་ཚངས་པའི་སྒྲ་སྐད་ཀྱི་དབྱངས་ཀྱི་མཚན་ཉིད་དུ་འབྱུང་སྟེ། ཀ་ལ་པིང་ཀ་དང་། ཚངས
262a2 པའི་སྒྲ་སྐད་ཀྱི་དབྱངས་ཀྱི་རང་བཞིན་དུ་བྱེ་བྲག་མེད་ཅིང་ལྷག་ཆད་མེད་དོ། །དེ་ལ་སྐུ་མཚུངས་པ་གང་ཞེ་ན། འདི་ལྟ་སྟེ། ང་དང་སངས་རྒྱས་ཐམས་ཅད་ནི་ཆོས་ཀྱི་སྐུ་དང་། གཟུགས་དང་། མཚན་དང་། དཔེ་བྱད་བཟང་པོའི་སྐུར་མཚུངས
262a3 ཤིང་བྱེ་བྲག་མེད་དེ། འགྲོ་བའི་བྱེ་བྲག་སེམས་ཅན་དེ་དང་དེ་དག་གདུལ་བའི་ཕྱིར་གཟུགས་ཐ་དད་པ་སྣ་ཚོགས་སྟོན་པ་ནི་མ་གཏོགས་ཏེ། དེ་ནི་སྐུ་མཚུངས་པ་ཞེས་བྱའོ། །དེ་ལ་ཆོས་མཚུངས་པ་གང་ཞེ་ན། འདི་ལྟ་སྟེ། ང་དང་སངས
262a4 རྒྱས་དེ་དག་བྱང་ཆུབ་ཀྱི་ཕྱོགས་ཀྱི་ཆོས་སུམ་བཅུ་རྩ་བདུན་ཐུགསུ་ཆུད་དེ། སངས་རྒྱས་ཀྱི་ཆོས་རྣམས་དང་། སྒྲིབས་པ་མེད་པའི་ཡེ་ཤེས་མདོར་བསྡུས་ཏེ་བསྟན་པ་དེ་ནི་མཚུངས་པ་རྣམ་པ་བཞི་ཞེས་བྱ་སྟེ། དེ་ལྟ་བས་ན་དེ་བཞིན
262a5 གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཁོར་གྱི་ནང་དུ་དེ་སྐད་ཅེས་གསུང་ངོ་། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་གསུངས་སོ། །འོད་སྲུང
262a6 དང་ནི་འཁོར་བ་འཇིག་། གསེར་ཐུབ་ཀྱང་ནི་ང་ཡིན་ཞེས། །མཚུངས་པ་བཞི་ནི་མཉམ་གྱུར་པས། །རྒྱལ་བའི་སྲས་ལ་ངས་བཤད་དོ། །བློ་གྲོས་ཆེན་པོས་ཡང་བཅོམ་ལྡན་འདས་ལ་གསོལ་པ། ཇི་སྐད་དུ་བཅོམ་ལྡན་འདས་ཀྱིས
262a7 ང་ནི་གང་གི་ནུབ་མོ་མངོན་པར་རྫོགས་པར་སངས་རྒྱས་པ་ནས་གང་གི་ནུབ་མོ་ཡོངས་སུ་མྱ་ངན་ལས་འདའ་བར་འགྱུར་བ་དེའི་བར་དུ་ཡི་གེ་གཅིག་ཀྱང་མ་བཤད། མི་འཆད་འཆད་པར་མི་འགྱུར་ཏེ། བཤད་པ་མེད་པ་ནི
262a8 སངས་རྒྱས་ཀྱིས་བཤད་པའོ་ཞེས་གསུངས་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཅིའི་རྒྱུས་བཤད་པ་མེད་པ་ནི་སངས་རྒྱས་ཀྱི་བཤད་པའོ་ཞེས་གསུངས།
iiif viewer powered by OpenSeadragon
