| e-texts navigator |
| Wylie |
261b1 ཀྱིས་ཆོས་དེ་དག་ཉིད་ཁོང་དུ་ཆུད་ན་དེ་ཡང་སངས་རྒྱས་པ་ཉིད་ཅེས་བྱ་སྟེ། དེས་ན་དེའི་ཕྱིར་ངས་ཐེག་པ་གཅིག་ཏུ་བཤད་དོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་གསུངས་སོ། །
261b2 བདག་མེད་རྣམ་གཉིས་མཁས་པ་དང་། །སྒྲིབ་གཉིས་ཉོན་མོངས་རབ་སྤོངས་དང་། །ཤི་འཕོ་གཉིས་དང་གཏན་བྲལ་བ། །དེ་ནི་སངས་རྒྱས་ཉིད་ཅེས་བྱ། །དེ་ནས་ཡང་བྱང་ཆུབ་སེམས་དཔའ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད
261b3 ཅེས་གསོལ་ཏོ། །ཅིའི་སླད་དུ་བཅོམ་ལྡན་འདས་ཀྱིས་འཁོར་གྱི་ནང་དུ་འདི་སྐད་ཅེས་ང་ནི་གང་འདས་པའི་སངས་རྒྱས་ཐམས་ཅད་ཉིད་དོ། །སྐྱེས་པའི་རབས་སྣ་ཚོགས་སུ་ཡང་ང་ཉིད་དེའི་ཚེ་འཁོར་ལོས་བསྒྱུར་བའི་རྒྱལ་པོ་སྤྱི་བོ
261b4 སྐྱེས་དང་། གླང་པོ་ཆེ་སོ་དྲུག་པ་དང་། ནེ་ཙོ་དང་། དབང་པོ་དང་། དྲང་སྲོང་མིག་བཟངས་ལ་སོགས་པའོ་ཞེས་སྐྱེས་པའི་རབས་བརྒྱ་སྟོང་གསུངས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་མཚུངས་པ་རྣམ་པ་བཞིའི
261b5 ཕྱིར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཁོར་གྱི་ནང་དུ་འདི་སྐད་ཅེས་ང་ཉིད་དེའི་ཚེ་དེའི་དུས་ན་སངས་རྒྱས་འཁོར་བ་འཇིག་དང་། གསེར་ཐུབ་དང་། འོད་སྲུང་དུ་གྱུར་ཏོ་ཞེས་གསུང་ངོ་། །
261b6 མཚུངས་པ་རྣམ་པ་བཞི་གང་ཞེ་ན། འདི་ལྟ་སྟེ། ཡི་གེ་མཚུངས་པ་དང་། གསུང་མཚུངས་པ་དང་། ཆོས་མཚུངས་པ་དང་། སྐུ་མཚུངས་པ་ནི་མཚུངས་པ་རྣམ་པ་བཞི་ཞེས་བྱ་སྟེ། འདི་ལྟར་མཚུངས་པ་རྣམ་པ་འདི་བཞིའི་ཕྱིར་དེ་བཞིན
261b7 གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་སྐད་དུ་གསུངས་ཏེ། དེ་ལ་ཡི་གེ་མཚུངས་པ་གང་ཞེ་ན། ཡི་གེ་གང་གིས་ངའི་མིང་སངས་རྒྱས་ཤེས་བརྗོད་པའི་ཡི་གེ་དེས་སངས་རྒྱས་ཐམས་ཅད་ཀྱང་བརྗོད་པས།
261b8 ཡི་གེ་དེ་དག་གི་རང་བཞིན་བྱེ་བྲག་མེད་པས་ན་དེ་ནི་ཡི་གེ་མཚུངས་པ་ཞེས་བྱའོ། །དེ་ལ་གསུང་མཚུངས་པ་གང་ཞེ་ན་འདི་ལྟ་སྟེ། ངའི་གསུང་རྣམ་པ་དྲུག་བཅུ་རྩ་བཞི་ཚངས་པའི་སྒྲ་སྐད་ཀྱི་དབྱངས་ཀྱི་མཚན་ཉིད་དུ་འབྱུང་ངོ་། །
iiif viewer powered by OpenSeadragon
