| e-texts navigator |
| Wylie |
253b1 རང་གི་སེམས་སྣང་བར་སྟོན་པས་འབྲས་བུ་འཐོབ་པའི་མཚན་ཉིད་ནི་འབྲས་བུ་ཐོབ་པ་ཞེས་བྱའོ། །གཞན་ཡང་བློ་གྲོས་ཆེན་པོ་བསམ་གཏན་དང་། ཚད་མེད་པ་དང་། གཟུགས་མེད་པའི་ཁམས་ལས་ཤིན་དུ་བཟླ་བར་འདོད
253b2 ན། རང་གི་སེམས་སྣང་བའི་མཚན་ཉིད་ལས་ལྡོག་པར་བྱའོ། །བློ་གྲོས་ཆེན་པོ་འདུ་ཤེས་དང་ཚོར་བ་འགོག་པའི་སྙོམས་པར་འཇུག་པ་ནི་རང་གི་སེམས་སྣང་བ་ལས་འདས་ཤེས་བྱར་མི་རུང་སྟེ། དེ་ཅིའི་ཕྱིར་ཞེ་ན། སེམས
253b3 སྣང་བ་ཡོད་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །བསམ་གཏན་རྣམས་དང་ཚད་མེད་བཞི། །གཟུགས་མེད་པ་ཡི་ཏིང་འཛིན་དང་། །ཚོར་བ་འདུ
253b4 ཤེས་འགོག་པ་རྣམས། །སེམས་ཙམ་ལ་ནི་དེ་ཡོད་མིན། །རྒྱུན་དུ་ཞུགས་པའི་འབྲས་བུ་དང་། །ལན་ཅིག་ཕྱིར་འོང་ཕྱིར་མི་འོང་། །དགྲ་བཅོམ་པ་ཡི་འབྲས་བུ་རྣམས། །དེ་དག་ཐམས་ཅད་སེམས་འཁྲུལ་པ། །བསམ
253b5 གཏན་དང་ནི་བསམ་གཏན་རྐྱེན། །སྤོང་ཤེས་བདེན་པ་ཡང་དག་མཐོང་། །དེ་དག་རྟོག་པ་ཙམ་ཡིན་པར། །གང་གིས་རྟོགས་པ་དེ་འགྲོལ་ལོ། །གཞན་ཡང་བློ་གྲོས་ཆེན་པོ་བློ་རྣམ་པ་གཉིས་ཡོད་དེ། འདི་ལྟ་སྟེ། རབ་ཏུ་རྣམ་པར་འབྱེད
253b6 པའི་བློ་དང་། རྣམ་པར་རྟོག་པའི་མཚན་ཉིད་འཛིན་པ་ལ་མངོན་པར་ཞེན་པས་རྣམ་པར་གཞག་པའི་བློའོ། །དེ་ལ་བློ་གྲོས་ཆེན་པོ་རབ་ཏུ་རྣམ་པར་འབྱེད་པའི་བློ་ནི་འདི་ལྟ་སྟེ། བློ་གང་གིས་དངོས་པོའི་རང་བཞིན་གྱི
253b7 མཚན་ཉིད་རབ་ཏུ་གཞིགས་ན་མཐའ་བཞི་དང་བྲལ་བས་མི་དམིགས་པ་འདི་ནི་རབ་ཏུ་རྣམ་པར་འབྱེད་པའི་བློ་ཞེས་བྱའོ། །དེ་ལ་བློ་གྲོས་ཆེན་པོ་མཐའ་བཞི་ནི་འདི་ལྟ་སྟེ། །གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ
253b8 ཡིན་པ་དང་། ཡོད་པ་དང་མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པ་ནི་མཐའ་བཞི་ཞེས་བཤད་དེ། བློ་གྲོས་ཆེན་པོ་མཐའ་བཞི་པོ་དེ་དག་དང་བྲལ་བ་ནི་ཆོས་ཐམས་ཅད་ཅེས་བྱའོ། །
iiif viewer powered by OpenSeadragon
