| e-texts navigator |
| Wylie |
250a1 ཡི་གེའི་ཚོགས་ནི་འདི་ལྟ་སྟེ། གང་གིས་མིང་དང་ཚིག་གསལ་བར་བྱེད་པ་དེ་ནི་ཡི་གེའི་ཚོགས་ཤེས་བྱའོ། །ཡང་ཡི་གེའི་ཚོགས་ནི་འདི་ལྟ་སྟེ། རིང་པོ་དང་། ཐུང་ངུ་དང་། མཐོ་བ་དང་། དམའ་བའོ། །ཡང་ཚིག་གི
250a2 ཚོགས་ནི་འགྲོ་བའི་རྗེས་ལྟ་བུ་སྟེ། འདི་ལྟར་གླང་པོ་ཆེ་དང་། རྟ་དང་། མི་དང་། རི་དགས་ལ་སོགས་པ་གང་ས་ལ་འགྲོ་བའི་རྗེས་རྣམས་ནི་ཚིག་གི་ཚོགས་ཤེས་བྱ་བའི་མིང་འཐོབ་བོ། །བློ་གྲོས་ཆེན་པོ་མིང་དང་ཡི་གེ་ནི་འདི་ལྟ་སྟེ།
250a3 མིང་གིས་ཕུང་པོ་གཟུགས་མེད་པ་བཞི་བརྗོད་པའི་ཕྱིར་རོ། །རང་གི་མཚན་ཉིད་སྣང་བར་བྱེད་པས་ནི་ཡི་གེ་སྟེ། དེ་ནི་མིང་དང་། ཡི་གེའི་ཚོགས་ཤེས་བྱའོ། །འདི་ནི་མིང་དང་། ཚིག་དང་། ཡི་གེའི་ཚོགས་རྣམས་བརྗོད་པའི་མཚན་ཉིད་དེ།
250a4 དེ་ལ་ཁྱོད་ཀྱིས་ནན་ཏན་དུ་བསླབ་པར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་བཅད་པ་འདི་གསུངས་སོ། །མིང་དང་ཚིག་གི་ཚོགས་རྣམས་དང་། །ཡི་གེའི་ཚོགས་ལ་བྱེ་བྲག་ཏུ། །མི་ཤེས
250a5 བྱིས་པ་ཆགས་པ་ནི། །ཇི་ལྟར་གླང་ཆེན་རྫབ་བྱིང་བཞིན། །གཞན་ཡང་བློ་གྲོས་ཆེན་པོ་མ་འོངས་པའི་དུས་ན་མཁས་པ་དག་གིས་གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པར་ལྟ་བའི་མཚན་ཉིད་ལས་རྣམ་པར་གྲོལ་བ།
250a6 ངས་རྟོགས་པའི་དོན་རྣམས་མི་མཁས་པ་དེ་དག་ལ་དྲིས་པ་ན་དེ་དག་འདི་སྐད་དུ་འདི་ནི་ཚུལ་བཞིན་འདྲི་བ་མ་ཡིན་ནོ་ཞེས་ཟེར་ཞིང་འདི་ལྟ་སྟེ། གཟུགས་ལ་སོགས་པ་དང་། མི་རྟག་པ་གཅིག་གམ་ཐ་དད་ཅེས་བྱ་བ་དང་། དེ་བཞིན་དུ་མྱ
250a7 ངན་ལས་འདས་པ་ལས་འདུ་བྱེད་དང་། མཚན་ཉིད་ལས་མཚན་ཉིད་ཀྱི་གཞི་དང་། ཡོན་ཏན་ལས་ཡོན་ཏན་ཅན་དང་། འབྱུང་བ་ལས་འབྱུང་བ་ལས་གྱུར་པ་དང་། མཐོང་བ་ལས་མཐོང་བར་བྱ་བ་དང་། རྡུལ་ལས་རྡུལ་ཕྲ་མོ་དང་།
250a8 སྒྲུབ་པ་ལས་རྣལ་འབྱོར་པ་དང་། དེ་བཞིན་དུ་གཅིག་ལ་གཅིག་ཕན་ཚུན་དཔག་པའི་མཚན་ཉིད་ཀྱི་ཚུལ་གྱིས་དེ་དག་ལ་སོགས་པ་དྲིས་པ་རྣམས་བཅོམ་ལྡན་འདས་ཀྱིས་ལུང་བསྟན་ཏོ། །ཞེས་ཟེར་རོ། །དེ་ལ་གཞག་པའི་ལུང
iiif viewer powered by OpenSeadragon
