| e-texts navigator |
| Wylie |
249a1 ཚིགས་སུ་བཅད་པ་འདི་གསུངས་སོ། །སྒྱུ་མར་མེད་མིན་ཆོས་འཐུན་པས། །དངོས་པོ་རྣམས་ནི་སྒྱུ་མར་བརྗོད། །ཡང་དག་མ་ཡིན་གློག་འདྲ་བས། །དེ་ཕྱིར་སྒྱུ་མ་ལྟ་བུར་བཤད། །བློ་གྲོས་ཆེན་པོས་ཡང་བཅོམ་ལྡན
249a2 འདས་ལ་གསོལ་པ། འདི་ལྟར་བཅོམ་ལྡན་འདས་ཀྱིས་དངོས་པོ་ཐམས་ཅད་ནི་མ་སྐྱེས་པ་དང་། སྒྱུ་མ་ལྟ་བུ་ཞེས་གསུངས་པས། བཅོམ་ལྡན་འདས་ཀྱིས་དེ་སྐད་དུ་བཀའ་སྩལ་པའི་ཚིག་སྔ་མ་དང་། སླད་མ་འགལ་བ་ནོངས་པར་མི
249a3 འགྱུར་རམ་ཅི་ན་དངོས་པོ་རྣམས་སྐྱེ་བ་མ་མཆིས་པ་དང་། སྒྱུ་མ་ལྟ་བུ་ཞེས་གསུངས། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་ངས་དངོས་པོ་རྣམས་སྐྱེ་བ་མེད་པ་དང་། སྒྱུ་མ་ལྟ་བུར་བརྗོད་ཀྱང་ཚིག་སྔ་ཕྱི་འགལ་བའི
249a4 ཉེས་པར་མི་འགྱུར་རོ། །དེ་ཅིའི་ཕྱིར་ཞེ་ན། འདི་ལྟ་སྟེ། སྐྱེ་བ་རྣམས་སྐྱེ་བ་མེད་པ་དང་། རང་གི་སེམས་སྣང་བ་ཙམ་དུ་རྟོགས་པ་དང་། ཕྱི་རོལ་གྱི་དངོས་པོ་དང་དངོས་པོ་མེད་པ་ཡོད་པ་དང་མེད་པ་ལས་མི་སྐྱེ་བར་མཐོང་བས་ན། བློ་གྲོས
249a5 ཆེན་པོ་ངའི་ཚིག་སྔ་ཕྱི་འགལ་བའི་ཉེས་པར་མི་འགྱུར་ཏེ། འོན་ཀྱང་མུ་སྟེགས་ཅན་གྱི་རྒྱུ་ལས་སྐྱེ་བ་གཞིག་པའི་ཕྱིར་ངས་དངོས་པོ་ཐམས་ཅད་མ་སྐྱེས་པ་ཞེས་བཤད་དོ། །བློ་གྲོས་ཆེན་པོ་མུ་སྟེགས་ཅན་གླེན་པའི་ཚོགས་མང་པོ་རྣམས
249a6 ནི་དངོས་པོ་རྣམས་ཡོད་པ་དང་། མེད་པ་ལས་སྐྱེ་བར་འདོད་དེ། རང་གི་རྣམ་པར་རྟོག་པ་སྣ་ཚོགས་ལ་མངོན་པར་ཞེན་པའི་རྐྱེན་གྱིས་ནི་མ་ཡིན་ནོ། །བློ་གྲོས་ཆེན་པོ་ང་ནི་ཡོད་ན་ཡང་མ་ཡིན། མེད་ན་ཡང་མི་སྐྱེ་སྟེ། དེའི་ཕྱིར་ང་ནི་སྐྱེ་བ་མེད
249a7 པའི་ཚིག་ཉིད་དུ་བརྗོད་དེ། བློ་གྲོས་ཆེན་པོ་དངོས་པོར་བསྟན་པ་ནི་འཁོར་བར་ཡོངས་སུ་འཛིན་པའི་ཕྱིར་དང་། མེད་དོ་ཞེས་ཆད་པར་ལྟ་བ་རྣམ་པར་བཟློག་པའི་ཕྱིར་དང་། ངའི་སློབ་མ་རྣམས་ལས་སྣ་ཚོགས་ཀྱིས་སྐྱེ་བའི་གནས
249a8 ཡོངས་སུ་འཛིན་པར་བསྟན་པའི་ཕྱིར་དངོས་པོའི་སྒྲས་འཁོར་བ་ཡོངས་སུ་འཛིན་པར་བྱེད་དོ་ཞེས་བཤད་དོ། །བློ་གྲོས་ཆེན་པོ་སྒྱུ་མ་ལྟ་བུའི་རང་བཞིན་དང་མཚན་ཉིད་བསྟན་པ་ནི་དངོས་པོའི་རང་བཞིན་དང་མཚན་ཉིད་ཡོངས་སུ
iiif viewer powered by OpenSeadragon
