| e-texts navigator |
| Wylie |
242a1 སྒོ་ལ་དམིགས་པ་ཡང་སྨིག་རྒྱུའི་དབའ་རླབས་དེ་དག་ཇི་ལྟ་བ་བཞིན་ནོ། །དཔེར་ན་ལ་ལ་ཞིག་གིས་སྔགས་དང་། འཁྲུལ་འཁོར་གྱིས་སེམས་ཅན་དུ་བགྲང་བ་མ་ཡིན་པ་སྟོན་པ་འདྲེ་དང་སྦྱོར་བར་ལྡན་ན་གཡོ
242a2 བའི་ལས་བྱེད་དེ། བྱིས་པ་རྣམས་ཀྱིས་རྣམ་པར་རྟོགས་པས་འགྲོ་བ་དང་། འོང་བ་ཉིད་དུ་མངོན་པར་ཞེན་ཏོ། །དེ་བཞིན་དུ་མུ་སྟེགས་བྱེད་ལྟ་བ་ངན་པའི་བསམ་པ་ཅན་དག་ཀྱང་། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ
242a3 ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པའི་ལྟ་བ་ལ་རྟེན་ཅིང་སྤྲོས་པ་ལ་མངོན་པར་ཞེན་པས་ཡང་དག་པ་མ་ཡིན་པར་སྒྲོ་འདོགས་སོ། །བློ་གྲོས་ཆེན་པོ་དེ་བས་ན་སོ་སོ
242a4 རང་གིས་རིག་པ་འཕགས་པའི་ཡེ་ཤེས་ཀྱི་དངོས་པོ་འདོད་པ་དག་གིས་སྐྱེ་བ་དང་། གནས་པ་དང་། འཇིག་པ་དང་། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ
242a5 དང་། རྟག་པ་དང་། མི་རྟག་པ་ལ་སོགས་པའི་ལྟ་བ་ངན་པའི་རྣམ་པར་རྟོག་པ་རྣམས་ཡོངས་སུ་སྤང་བར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་པ་འདི་དག་གསུངས་སོ། །སྒྱུ་མ་རྨི་ལམ་ཆུ་གྲིབ
242a6 ཤིང་། །སྐྲ་ཤད་འཛིངས་དང་སྨིག་རྒྱུ་ལྟར། །སྲིད་གསུམ་དག་ནི་རབ་རྟོག་ན། །མཐར་ནི་རྣམ་པར་གྲོལ་བར་འགྱུར། །རི་དགས་སྐོམ་པའི་འདུ་ཤེས་ཀྱི། །གཡོ་བས་སེམས་ནི་བསླུས་པས་ན། །སྨིག་རྒྱུ་ལ་ནི་ཆུར་རྟོག་ཀྱང་། །ཆུ་ཡི་དངོས་པོ་ཡང
242a7 ཡང་དག་མེད། །དེ་བཞིན་རྣམ་ཤེས་ས་བོན་པ། །གཡོ་ཞིང་གྱུར་པས་ཡུལ་དུ་སྣང་། །བྱིས་པ་རྣམ་རྟོག་གང་སྐྱེས་པ། །རབ་རིབ་ཅན་གྱི་རབ་རིབ་བཞིན། །ཐོག་མ་མེད་པའི་འཁོར་བ་ལ། །དངོས་པོར་འཛིན་ཅིང་མངོན་ཞེན་པ། །མི་མཐུན་ཁྱེའུས
242a8 ཁྱེའུ་དབྱུང་བཞིན། །འདོད་པའི་རྒྱུ་འཛིན་པ་རབ་ཏུ་སྤོངས། །སྒྱུ་མ་རོ་ལངས་འཁྲུལ་འཁོར་དང་། །སྤྲིན་དང་རྨི་ལམ་གློག་ལྟ་བུར། །རབ་ཏུ་རྟོག་ན་རྣམ་གྲོལ་ཞིང་། །རྒྱུན་གསུམ་དག་ནི་གཏན་དུ་སྤོངས། །འདི་ལ་བྱེད་པ་གང་ཡང་མེད། །སྨིག
iiif viewer powered by OpenSeadragon
