| e-texts navigator |
| Wylie |
240b1 སྐྲ་ཤད་འཛིངས་པ་མཐོང་ནས། སྐྱེ་བོ་མང་པོའི་ཚོགས་རྣམས་ལ་འདི་སྐད་དུ། ཀྱེ་གྲོགས་པོ་དག་འདི་ལྟོས་ཤིག་ཅེས་ཟེར་ཡང་། སྐྲ་ཤད་འཛིངས་པ་དེ་ནི་མཐར་དངོས་པོ་ཡོད་པ་ཡང་མ་ཡིན། དངོས་པོ་མེད་པ་ཡང་མ
240b2 ཡིན་ཏེ། མཐོང་བ་དང་། མི་མཐོང་བའི་ཕྱིར་རོ། །དེ་བཞིན་དུ་མུ་སྟེགས་ཅན་ལྟ་བ་ངན་པའི་བསམ་པ་ཅན་དག་ཀྱང་། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ
240b3 ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི་རྟག་པའི་ལྟ་བ་ལ་རབ་ཏུ་རྟེན་ཅིང་། དམ་པའི་ཆོས་ལ་སྐུར་པ་འདེབས་པས། བདག་ཀྱང་ལྷུང་བར་བྱེད་ལ་གཞན་དག་ཀྱང་ལྷུང་བར་བྱེད་དོ། །དཔེར་ན་མགལ་མེའི་འཁོར
240b4 ལོ་ནི། འཁོར་ལོ་མ་ཡིན་ཡང་། བྱིས་པ་རྣམས་ཀྱིས་འཁོར་ལོ་ཉིད་དུ་ཡོངས་སུ་རྟོག་སྟེ། མཁས་པ་རྣམས་ནི་མ་ཡིན་ནོ། །དེ་བཞིན་དུ་མུ་སྟེགས་ཅན་ལྟ་བ་ངན་པའི་བསམ་པ་ཅན་དག་ཀྱང་གཅིག་པ་དང་། ཐ་དད་པ་དང་།
240b5 གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་མི་རྟག་པར་ཡོངས་སུ་རྟོག་པ་ལ་རྟེན་ནས། དངོས་པོ་ཐམས་ཅད་སྐྱེད་དོ། །དཔེར་ན་ཆུ་བུར་ནོར་བུ་འདྲ་བ
240b6 ལ། བྱིས་པ་བློ་དང་མི་ལྡན་པ་རྣམས་ཀྱིས། ནོར་བུ་ཉིད་དུ་འདུ་ཤེས་ཤིང་། མངོན་པར་ཞེན་ནས་རབ་ཏུ་རྒྱུག་ཅིང་ལེན་ཀྱང་། ཆུ་བུར་དེ་དག་ནི་ནོར་བུ་ཡང་མ་ཡིན། ནོར་བུ་མ་ཡིན་པ་ཡང་མ་ཡིན་ཏེ། ལེན་པ་དང་། མི་ལེན་པའི
240b7 ཕྱིར་རོ། །དེ་བཞིན་དུ་མུ་སྟེགས་ཅན་ལྟ་བ་ངན་པའི་རྣམ་པར་རྟོག་པའི་བག་ཆགས་ཀྱིས་ཡོངས་སུ་བསྒོས་པ་རྣམས་ཀྱང་། ཡོད་པ་མ་ཡིན་པ་ལ་སྐྱེ་བ་ཡོད་པར་སྨྲ་བ་དང་། རྐྱེན་གྱིས་ཡོད་པ་ཡང་འཇིག་པར་སྨྲ་བར
240b8 འགྱུར་རོ། །གཞན་ཡང་བློ་གྲོས་ཆེན་པོ་ཚད་མ་རྣམ་པ་གསུམ་དང་། སྨྲ་བའི་ཡན་ལག་ལྔ་ཡོད་དོ། །དེ་དག་སོ་སོར་རྣམ་པར་གཞག་པ་བྱས་ནས། འཕགས་པའི་ཡེ་ཤེས་སོ་སོ་རང་གིས་རིག་པར་བྱ་བ། རང་བཞིན
iiif viewer powered by OpenSeadragon
