| e-texts navigator |
| Wylie |
240a1 པར་བདག་ཉིད་ཞུགས་པ་སྙམ་པ་ལས་སད་ནས། །དེ་ཉིད་རྗེས་སུ་དྲན་ན། བློ་གྲོས་ཆེན་པོ་ཇི་སྙམ་དུ་སེམས། སྐྱེས་བུ་དེས་སྔར་རྨིས་པ་རྣམས་རྗེས་སུ་དྲན་པར་བྱེད་ཅིང་། ཡོངས་སུ་གཏོང་བར་མི་བྱེད་ན། ཅི་མཁས་པའི
240a2 རང་བཞིན་ཅན་ཡིན་ནམ། བློ་གྲོས་ཆེན་པོས་བཅོམ་ལྡན་འདས་ལ་གསོལ་པ། བཅོམ་ལྡན་འདས་མ་ལགས་སོ། །བཅོམ་ལྡན་འདས་ཀྱིས་བློ་གྲོས་ཆེན་པོ་ལ་བཀའ་སྩལ་པ། དེ་བཞིན་དུ་བྱིས་པ་སོ་སོའི་སྐྱེ་བོ་ལྟ་བ་ངན་པས
240a3 རབ་ཏུ་ཟིན་པ། མུ་སྟེགས་ཀྱི་བློ་ཅན་དག་རང་གི་སེམས་སྣང་བའི་དངོས་པོ་རྨི་ལམ་ལྟ་བུར་མ་ཤེས་པས། གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན།
240a4 མེད་པ་ཡང་མ་ཡིན་པ་དང་། རྟག་པ་དང་། མི་རྟགས་པར་ལྟ་བ་ལ་རབ་ཏུ་བརྟེན་ཏོ། །དཔེར་ན་རི་མོ་བྲིས་པ་ལ་མཐོ་དམན་མེད་ཀྱང་། བྱིས་པ་དེ་དག་མཐོ་དམན་དུ་རྣམ་པར་རྟོག་གོ། །དེ་བཞིན་དུ་མ་འོངས་པའི་དུས་ན་མུ་སྟེགས
240a5 ཅན་གྱི་ལྟ་བ་ངན་པའི་བག་ཆགས་ཤིན་ཏུ་རྒྱས་པས། དེ་དག་གཅིག་པ་དང་། ཐ་དད་པ་དང་། གཉི་ག་དང་། གཉི་ག་མ་ཡིན་པ་དང་། ཡོད་པ་དང་། མེད་པ་དང་། ཡོད་པ་ཡང་མ་ཡིན། མེད་པ་ཡང་མ་ཡིན་པ་དང་། རྟག་པ་དང་། མི
240a6 རྟག་པར་ལྟ་བ་ལ་བརྟེན་ནས། བདག་དང་གཞན་ཡང་བརླག་པར་བྱེད་ལ། ཡོད་པ་དང་། མེད་པ་སྤོངས་པ། སྐྱེ་བ་མེད་པར་སྨྲ་བ་གཞན་དག་ལ་ཡང་མེད་པ་ཞེས་ཟེར་བ་དག་འབྱུང་སྟེ། འདི་དག་ནི་རྒྱུ་དང་འབྲས་བུར་ལྟ་བ་ལ་སྐུར
240a7 པ་འདེབས་ཤིང་། དགེ་བའི་རྩ་བ་འདོན་པར་བྱེད་ལ། རྣམ་པར་དག་པའི་རྒྱུ་འཇིག་པར་བྱེད་པ་ཡིན་པས། མཆོག་ཚོལ་བ་རྣམས་ཀྱིས་རིང་དུ་སྤང་བར་བྱའོ། །དེ་སྐད་དུ་སྨྲ་བ་དེ་དག་ནི། བདག་དང་གཞན་དང་། གཉི་གའི་ལྟ
240a8 བར་ལྷུང་བ། ཡོད་པ་དང་། མེད་པར་རྣམས་པར་བརྟགས་ནས། སྒྲོ་འདོགས་པ་དང་། སྐུར་པའི་ལྟ་བ་ངན་པར་ལྷུང་བ་ཡིན་པས། སེམས་ཅན་དམྱལ་བར་ལྷུང་བར་འགྱུར་རོ། །དཔེར་ན་མིག་ལ་རབ་རིབ་ཡོད་པ་དེ་དག་གིས
iiif viewer powered by OpenSeadragon
