| e-texts navigator |
| Wylie |
237a1 ཆེན་པོ་རིམ་གྱིས་སྐྱེ་བས་འབྲལ་བའི་སྦྱོར་བ་ཡང་མི་རུང་སྟེ། དེ་ནི་རྣམ་པར་རྟོག་པའོ། །རྒྱུ་དང་། དམིགས་པ་དང་། མཚུངས་པ་མེད་པ་དེ་མ་ཐག་པ་དང་། བདག་པོའི་རྐྱེན་ལ་སོགས་པས་བསྐྱེད་པར་བྱ་བ་སྐྱེད
237a2 པའི་ཕྱིར། བློ་གྲོས་ཆེན་པོ་རིམ་གྱིས་སྐྱེ་བས་མི་སྐྱེ་སྟེ། ཀུན་བརྟགས་པའི་རང་བཞིན་ལ་མངོན་པར་ཞེན་པའི་མཚན་ཉིད་ཀྱི་ཕྱིར་རོ། །རིམ་གྱིས་སམ་ཅིག་ཅར་མི་སྐྱེ་སྟེ། རང་གི་སེམས་སྣང་བའི་ལུས་དང་ལོངས་སྤྱོད
237a3 ཡིན་པའི་ཕྱིར་རོ། །རང་དང་སྤྱིའི་མཚན་ཉིད་དང་། ཕྱི་རོལ་གྱི་དངོས་པོ་དངོས་པོ་མེད་པས་བློ་གྲོས་ཆེན་པོ་རིམ་གྱིས་སམ་ཅིག་ཅར་མི་སྐྱེ་སྟེ། གཞན་དུ་རང་གི་སེམས་སྣང་བ་ལ་རྣམ་པར་རྟོག་པ་ཙམ་དུ་ཁོང་དུ་མ་ཆུད་པའི་ཕྱིར
237a4 མཚན་མ་སྐྱེའོ། །དེ་ལྟ་བས་ན་རྒྱུ་དང་རྐྱེན་དང་། བྱ་བའི་དངོས་པོ་དང་། སྦྱོར་བའི་མཚན་ཉིད་རིམ་གྱིས་དང་། ཅིག་ཅར་གྱི་ལྟ་བ་ཡོངས་སུ་སྤང་བར་བྱའོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར
237a5 ཚིགས་སུ་བཅད་པ་འདི་དག་གསུངས་སོ། །ཆོས་རྣམས་ཐམས་ཅད་མི་སྐྱེ་སྟེ། །རྒྱུ་རྐྱེན་འགག་པའང་ཡོད་མ་ཡིན། །སྐྱེ་དང་འགག་པ་དེ་དག་ལ། །རྒྱུ་དང་རྐྱེན་དུ་རྟོག་པ་སྐྱེད། །འགགས་པ་ལས་ནི་ཡང་སྐྱེ་དང་། །འབྲེལ
237a6 པའི་རྒྱུ་རྐྱེན་བཀག་མིན་ཏེ། །བྱིས་པ་ཤིན་དུ་རྨོངས་པ་ཡིས། །རྐྱེན་དུ་རྟོག་པ་རབ་སྤང་ཕྱིར། །ཡོད་དང་མེད་པ་རྟེན་འབྲེལ་ཆོས། །དེ་དག་སྐྱེ་བ་ཡོད་མ་ཡིན། །བག་ཆགས་རྨོངས་པས་རབ་ཏུ་འཇུག་།དེ་ལས་སྲིད་གསུམ
237a7 སྣང་བ་ཡིན། །ཡང་དག་རྐྱེན་ལས་སྐྱེ་བ་མེད། །འགག་པའང་ཡོད་པར་མི་འགྱུར་ཏེ། །འདུས་བྱས་ཐམས་ཅད་རབ་བརྟགས་ན། །ནམ་མཁའི་མེ་ཏོག་ཇི་བཞིན་ནོ། །གཟུང་བ་དང་ནི་འཛིན་པ་ཡི། །ནོར་བར་མཐོང་བ་རབ་ཏུ
237a8 སྤོངས། །སྐྱེད་དང་སྐྱེ་བ་མ་ཡིན་ཏེ། །རྒྱུ་རྐྱེན་དག་ཀྱང་ཡོད་མ་ཡིན། །ཐམས་ཅད་སྣང་བ་མེད་པས་ན། །དེ་དག་ཀུན་ནི་བརྗོད་པ་ཡིན། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་ཡང
iiif viewer powered by OpenSeadragon
