| e-texts navigator |
| Wylie |
224b1 རང་དང་སྤྱིའི་མཚན་ཉིད་ཀྱི་སྔོན་གྱི་རྒྱལ་བ་རྣམས་ཀྱིས་ལེགས་པར་གསུངས་པ་མཐོང་ནས་དེ་དག་ལ་རང་བཞིན་གྱི་རྣམ་པར་རྟོག་པ་འབྱུང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོས་དེ་དག་ཁོང་དུ་ཆུད་པར་བྱས
224b2 ནས་ཡོངས་སུ་སྤང་བར་བྱའོ། །ཆོས་ལ་བདག་མེད་པའི་མཚན་ཉིད་ཀྱི་རྗེས་སུ་ཞུགས་པས་གང་ཟག་ལ་བདག་མེད་པའི་མཚན་ཉིད་དུ་ལྟ་བ་བཟློག་ནས་ས་རྣམས་རིམ་གྱིས་མཚམས་སྦྱོར་བ་རྣམ་པར་གཞག་པ་ལ་གནས། བློ
224b3 གྲོས་ཆེན་པོ་འདི་ནི་ཉན་ཐོས་རྣམས་ཀྱི་དངོས་པོར་རྣམ་པར་རྟོག་པའི་རང་བཞིན་ལ་མངོན་པར་ཞེན་པའི་མཚན་ཉིད་ཅེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ
224b4 ཏོ། །བཅོམ་ལྡན་འདས་ཀྱིས་རྟག་པ་དང་། བསམ་གྱིས་མི་ཁྱབ་པ། སོ་སོ་རང་གིས་རིག་པ་འཕགས་པའི་སྤྱོད་ཡུལ་དང་། དོན་དམ་པའི་སྤྱོད་ཡུལ་བཀའ་སྩལ་པ་དེ་བཅོམ་ལྡན་འདས་མུ་སྟེགས་ཅན་གྱིས་སྨྲ་བའི་རྟག་པ་དང་།
224b5 བསམ་གྱིས་མི་ཁྱབ་པའི་རྒྱུ་དང་རྐྱེན་ཞིག་མ་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། བློ་གྲོས་ཆེན་པོ་མུ་སྟེགས་ཅན་རྣམས་ཀྱི་རྒྱུ་དང་རྐྱེན་གྱིས་རྟག་པ་དང་། བསམ་གྱིས་མི་ཁྱབ་པ་འཐོབ
224b6 པར་མི་འགྱུར་རོ། །དེ་ཅིའི་ཕྱིར་ཞེ་ན། མུ་སྟེགས་ཅན་རྣམས་ཀྱིས་རྟག་པ་དང་། བསམ་གྱིས་མི་ཁྱབ་པ་ནི་རྒྱུའི་རང་གི་མཚན་ཉིད་ལས་གྲུབ་པ་མ་ཡིན་ཏེ། གལ་ཏེ་རྟག་པ་དང་བསམ་གྱིས་མི་ཁྱབ་པའི་རྒྱུ་རང་གི་མཚན
224b7 ཉིད་ལས་གྲུབ་པ་མ་ཡིན་ན། རྒྱུ་གང་གིས་རྟག་པ་དང་། བསམ་གྱིས་མི་ཁྱབ་པ་མངོན་པར་བྱེད། གཞན་ཡང་བློ་གྲོས་ཆེན་པོ་ཅི་སྟེ་རྟག་པ་དང་། བསམ་གྱིས་མི་ཁྱབ་པ་རྒྱུའི་རང་གི་མཚན་ཉིད་ལས་གྲུབ་པ་ཞིག་ཡིན་ན་ནི་དེས
224b8 རྟག་པ་ཉིད་དུ་འགྱུར་བ་ཞིག་ན། འདི་ལྟར་བྱེད་པའི་རྒྱུའི་མཚན་ཉིད་ཀྱི་ཕྱིར་རྟག་པ་དང་། བསམ་གྱིས་མི་ཁྱབ་པར་མི་འགྲུབ་བོ། །བློ་གྲོས་ཆེན་པོ་ངའི་དོན་དམ་པ་རྟག་པ་དང་། བསམ་གྱིས་མི་ཁྱབ་པ་ནི་དོན་དམ་པའི་རྒྱུའི་མཚན
iiif viewer powered by OpenSeadragon
