| e-texts navigator |
| Wylie |
217b1 བར་འདུན་པའོ། །བློ་གྲོས་ཆེན་པོ་འདི་ནི་རྒྱུ་རྐྱེན་བཞི་པོ་ཆུ་ཀླུང་གི་གནས་དང་། ཀུན་གཞི་རྣམ་པར་ཤེས་པ་ལས་འཇུག་པའི་རྣམ་པར་ཤེས་པའི་རླབས་འབྱུང་བ་ཞེས་བྱའོ། །བློ་གྲོས་ཆེན་པོ་མིག་གི་རྣམ་པར་ཤེས་པ་ཇི་ལྟ་བ
217b2 བཞིན་དུ་དབང་པོ་ཐམས་ཅད་ཀྱི་རྡུལ་ཕྲ་རབ་དང་། སྤུའི་ཁུང་བུ་ལྷན་ཅིག་སྐྱེ་བ་དང་། རིམ་གྱིས་ཡུལ་གྱི་རྗེས་སུ་སྐྱེ་བ་ཡང་དེ་བཞིན་ཏེ། ཇི་ལྟར་མེ་ལོང་རབ་ཏུ་གསལ་བའི་ནང་དུ་གཟུགས་བརྙན་སྣང་བ་བཞིན་ནོ། །བློ
217b3 གྲོས་ཆེན་པོ་དཔེར་ན། རླང་རབ་ཏུ་དྲག་པོས་རྒྱ་མཚོ་ཆེན་པོའི་ཆུ་རབ་ཏུ་སྐྱོད་པར་བྱེད་པ་དེ་བཞིན་དུ། ཕྱི་རོལ་གྱི་ཡུལ་གྱི་རླུང་གིས་ཀྱང་སེམས་ཀྱི་རྒྱ་མཚོ་བསྒུལ་བས་རྣམ་པར་ཤེས་པའི་རླབས་རྣམས་རྒྱུན་མི་འཆད་དེ། རྒྱུ
217b4 དང་བྱ་བའི་མཚན་ཉིད་ཐ་དད་པ་དང་། ཐ་དད་མ་ཡིན་པ་གཅིག་ཏུ་འདྲེས་པ། ལས་དང་སྐྱེ་བའི་མཚན་ཉིད་ལ་ཤིན་དུ་མངོན་པར་ཞེན་པ་དང་། གཟུགས་ལ་སོགས་པའི་རང་གི་ངོ་ཧ་བོ་ཉིད་མི་རྟོགས་པས་དེའི་ཕྱིར་རྣམ་པར་ཤེས་པའི
217b5 ཚོགས་ལྔ་འཇུག་གོ། །བློ་གྲོས་ཆེན་པོ་རྣམ་པར་ཤེས་པའི་ཚོགས་ལྔ་པོ་དེ་དག་དང་ལྷན་ཅིག་པའི་རྒྱུ་ལ་བྱེ་བྲག་གིས་རྣམ་པའི་མཚན་ཉིད་ཁོང་དུ་ཆུད་པར་བྱེད་པས་ཡིད་ཀྱི་རྣམ་པར་ཤེས་པའི་རྒྱུ་ནི་དེའི་ལུས་ཀྱི་རྗེས་སུ་འཇུག
217b6 པ་ཡིན་པར་རིག་པར་བྱའོ། །དེ་དག་འདི་སྙམ་དུ་བདག་ཅག་ནི་ཕན་ཚུན་གཅིག་གི་རྒྱུ་གཅིག་བྱེད་དོ་སྙམ་དུ་མི་སེམས་ཏེ། འོན་ཀྱང་རང་གི་སེམས་སྣང་བ་ལ་རྣམ་པར་རྟོག་པས་མངོན་པར་ཞེན་པ་འཇུག་ཅིང་དེ་དག་སོ་སོ་ནས
217b7 འཇིག་པའི་མཚན་ཉིད་དང་ལྷན་ཅིག་ཏུ་འཇུག་གོ། །ཡུལ་གྱི་རྣམ་པའི་བྱེ་བྲག་འབྱེད་པ་ནི་འདི་ལྟ་སྟེ། དེ་དག་འཇུག་པའོ། །བློ་གྲོས་ཆེན་པོ་ཇི་ལྟར་རྣལ་འབྱོར་པ་དག་བསམ་གཏན་དང་ཏིང་ངེ་འཛིན་ལ་མཉམ་པར
217b8 བཞག་པ་བག་ཆགས་ཤིན་དུ་ཕྲ་རབ་འཇུག་པ་རྣམས་མི་ཤེས་པ་དེ་དག་འདི་སྙམ་དུ། བདག་ཅག་རྣམ་པར་ཤེས་པ་བཀག་ནས་སྙོམས་པར་ཞུགས་སོ་སྙམ་དུ་སེམས་ཀྱང་ཡང་དག་པར་རྣམ་པར་ཤེས་པ་བཀག་ནས་སྙོམས་པར
iiif viewer powered by OpenSeadragon
