| e-texts navigator |
| Wylie |
211b1 རབ་ཏུ་དབྱེར་གསོལ་ཞེས། །མཚན་ཉིད་འདྲི་བ་ཅི་ཡི་ཕྱིར། །བདག་མེད་འདྲི་བ་ཇི་ལྟ་བུ། །ཇི་ལྟར་མངལ་གྱི་སྙིང་པོར་སྐྱེ། །ལུས་ནི་ཐ་དད་སྣ་ཚོགས་དང་། །རྟག་ཆད་ལྟ་བ་ཇི་ལྟ་བུ། །ཇི་ལྟར་སེམས་ནི་མཉམ་པར་འཇོག་།བརྗོད
211b2 དང་དེ་བཞིན་ཡེ་ཤེས་དང་། །ཚུལ་ཁྲིམས་རིགས་དང་རྒྱལ་བའི་སྲས། །རིགས་པ་དང་ནི་སྨྲ་བའང་ཅི། །སློབ་དཔོན་སློབ་མ་ཇི་ལྟ་བུ། །སེམས་ཅན་རྣམ་པ་སྣ་ཚོགས་དང་། །འདི་ལ་སོགས་པ་ཇི་ལྟ་བུ། །ཟས་དང་སྐོམ་ནི་ཇི
211b3 ལྟ་བུ། །ཡིད་གཞུངས་བདུད་དང་བཏགས་པ་ཙམ། །ཤིང་དང་ཁྲི་ཤིང་ཅི་ཕྱིར་ཞེས། །རྒྱལ་བའི་སྲས་ཀྱིས་དྲི་བའི་རིགས། །ཞིང་རྣམས་སྣ་ཚོགས་ཅི་ཡི་ཕྱིར། །དྲང་སྲོང་ཡུན་རིང་དཀའ་ཐུབ་དང་། །རིགས་ཤེས་བྱ་བ་ཇི་ལྟ་བུ། །
211b4 བླ་མ་གང་ལས་བསླབ་པ་བླང་། །ཅི་ཡི་ཕྱིར་ན་མི་དག་ངན། །ཅི་ཡི་ཕྱིར་ན་རྣལ་འབྱོར་པ། །འདོད་པའི་ཁམས་སུ་འཚང་མི་རྒྱ། །འོག་མིན་དུ་ནི་གྲུབ་པའི་མཐའ། །ཅི་ཕྱིར་མངོན་ཤེས་འཇིག་རྟེན་པ། །ཅི་ཕྱིར་དགེ་སློང་ཞེས་ནི་བརྗོད།
211b5 སྤྲུལ་པའི་སངས་རྒྱས་ཇི་ལྟ་བུ། །རྣམ་སྨིན་སངས་རྒྱས་ཇི་ལྟ་བུ། །དེ་བཞིན་ཉིད་ཀྱི་སངས་རྒྱས་གང་། །མཉམ་ཉིད་ཡེ་ཤེས་སངས་རྒྱས་དང་། །དགེ་འདུན་རྣམས་ཀྱང་ཇི་ལྟ་བུ། །རྒྱལ་སྲས་དེ་བཞིན་དྲི་བའི་རིགས། །དགུ་པོ་རྒྱུད་མང
211b6 མེ་ཏོག་རྔ། །ཞིང་དང་སྣང་བ་སྤངས་པ་དང་། །སེམས་ཙམ་ས་ནི་བདུན་པོ་དག་།དྲིས་པ་རྣམས་ནི་ཡང་དག་ཉིད། །འདི་དང་གཞན་ཡང་རབ་མང་བའི། །དྲི་བ་དག་ནི་རྒྱལ་སྲས་དྲིས། །རེ་རེ་མཚན་ཉིད་རབ་ལྡན་ཞིང་། །ལྟ་བའི
211b7 ཉེས་པ་རྣམ་སྤངས་པ། །གྲུབ་མཐའི་བརྗོད་དང་བྲལ་བ་སྟེ། །ངས་ནི་ད་འདིར་བསྟན་པར་བྱ། །གོ་རིམས་རྣམ་པར་གཞག་པའི་ཚིག་།རྒྱལ་བའི་སྲས་ཀྱིས་ལེགས་པར་ཉོན། །ཚིག་བརྒྱ་རྩ་བརྒྱད་འདི་དག་ནི། །སངས་རྒྱས་རྣམས་ཀྱིས
211b8 གསུངས་བཞིན་བཤད། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཚིག་བརྒྱ་པོ་དག་གང་ལགས། །བཅོམ་ལྡན་འདས་ཀྱིས་བཀའ་སྩལ་པ། །
iiif viewer powered by OpenSeadragon
