| e-texts navigator |
| Wylie |
272a1 སྨིན་པ་དེའོ། །དེ་མིར་སྐྱེས་ཀྱང་ཚེ་ཐུང་བར་འགྱུར་རོ། །དབང་པོ་ཡོངས་སུ་མ་ཚང་བར་འགྱུར་རོ། །གཟུགས་ངན་པ་དང་། ཤེས་རབ་འཆལ་པ་དང་། རྟག་ཏུ་སྐྲག་པ་དང་། རྟག་ཏུ་ཁྲོ་བ་དང་། ནད་དང་བཅས་པ་དང་། མྱ
272a2 ངན་དང་བཅས་པ་དང་། དགའ་བ་དང་འབྲལ་བ་དང་། ཐམས་ཅད་དང་འབྲལ་བ་དང་། རྟག་ཏུ་ཡུན་རིང་དུ་འབྲལ་བར་འགྱུར་རོ། །དེའི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། སྐྱེ་བ་ལྔ་བརྒྱར་ཡི་དགས་དང་། །ཉ་སྦྲུལ
272a3 རི་དགས་འུག་པ་དང་། །མ་ཧེ་ཁྱི་དང་ཝ་རྣམས་ནི། །སྲོག་བཅད་པ་ཡི་ཉེས་པའོ། །འདི་ནི་སྲོག་བཅད་པའི་རྣམ་པར་སྨིན་པའོ། །སྲོག་གཅོད་པ་ནི་སྤངས་པ་ཡིས། །སྐྱེས་པ་འམ་ནི་བུད་མེད་ལུས། །ཐོབ་པར་འགྱུར་ཏེ་ཕན་ཡོན
272a4 ནི། །ཡོན་ཏན་ཉི་ཤུ་མི་དམན་པར། །ཡན་ལག་ཉིང་ལག་ཕུན་སུམ་ཚོགས། །ལུས་ནི་ཤེད་དང་ལྡན་པ་དང་། །རིགས་བཟང་པོར་ནི་མྱུར་དུ་སྐྱེ། །ཡན་ལག་གཙང་ཞིང་འཇམ་པ་དང་། །ཚེ་རིང་བ་དང་བདེ་བ་དང་། །དཔའ་ཞིང་སྟོབས་དང
272a5 ལྡན་པ་དང་། །ཚིག་ནི་མཆོག་ཏུ་བཟང་བ་དང་། །ལྷ་དང་བཅས་པ་དགའ་བ་དང་། །འཇིག་རྟེན་པ་ཡིས་ངན་མི་བྱེད། །འཕགས་པས་ཚིག་ངན་མི་བརྗོད་དང་། །བྱད་སྟེམ་ངན་པས་མི་འཆི་ཞིང་། །མཐའ་ཡས་པ་ཡི་འཁོར་དང་ལྡན། །
272a6 ཁ་དོག་གཟུགས་དང་ཡང་དག་ལྡན། །ནད་དང་མྱ་ངན་ཉུང་བ་དང་། །ཁྱིམ་གྱི་གནས་ནི་མི་སྤོང་དང་། །གཞན་གྱིས་མི་དགར་མི་འགྱུར་རོ། །སྲོག་གཅོད་པ་ནི་སྤངས་པ་ཡིས། །སྐྱེས་པ་འམ་ནི་བུད་མེད་ཀྱིས། །ཕན་ཡོན་འདི་ནི
272a7 མྱོང་བར་འགྱུར། །ལྷ་རྣམས་དང་ནི་མི་རྣམས་སུའོ། །དེ་ལུས་ཞིག་ཅིང་ཤི་ནས་བདེ་འགྲོ་མཐོ་རིས་ལྷའི་འཇིག་རྟེན་དུ་ཉེ་བར་སྐྱེའོ། །མ་བྱིན་པར་ལེན་པ་ནི་མ་བྱིན་པར་ཕ་རོལ་གྱི་རྫས་རྣམ་པར་ཤེས་པ་དང་བཅས་པ་དང་། རྣམ
272a8 པར་ཤེས་པ་མེད་པ་གང་རུང་ཁང་པ་ཕུག་ནས་རྐུ་བ་ལ་སོགས་པའོ། །ཕ་རོལ་བསླུས་ནས་ལེན་པ་དང་། རང་འཚོ་བའི་ཕྱིར་དེ་རྣམས་དེ་ལྟ་བུའི་རིམ་པས་མ་བྱིན་པར་ལེན་དེ་དེའི་ལུས་ཞིག་ནས་ཤི་བའི་ཕ་རོལ་དུ་ངུ་འབོད་དུ་སྐྱེ་བར
iiif viewer powered by OpenSeadragon
