| e-texts navigator |
| Wylie |
328a1 འོད་ཀྱིས་ནི་སྲིད་པའི་རྩེ་མོ་མན་ཆད་ནས་མནར་མེད་པའི་སེམས་ཅན་དམྱལ་བ་ཡན་ཆད་ནས། གཞན་ཡང་ལྕགས་རི་ཆེན་པོའི་ཕྱི་རྒྱབ་ན་སེམས་ཅན་རང་གི་ལས་ཀྱི་སྒྲིབ་པས་བསྒྲིབས་པའི་མུན་ནག་ཆེན་པོའི་ནང་ན་རང་གི་ལག་པ་བརྐྱང
328a2 བསྐུམ་ཡང་མི་མཐོང་བའི་གནས་ཚུན་ཆད་སྣང་ཞིང་གསལ་བར་གྱུར་ཅིག་། ཡུན་ནི་དུས་གསུམ་གྱི་སངས་རྒྱས་ཇི་སྲིད་བཞུགས་པ་དེ་སྲིད་དུ་གནས་པར་གྱུར་ཅིག་།གྲངས་ནི་ཕྱོགས་བཅུ་འཇིག་རྟེན་གྱི་ཁམས
328a3 མཐའ་ཡས་པ་ན་བཞུགས་པའི་སངས་རྒྱས་གྲངས་མེད་པ་རེ་རེའི་སྤྱན་ལམ་དུ་གསལ་བར་གྱུར་ཅིག་། མར་མེ་འདི་གཟུགས་མེད་པའི་གནས་སུ་སྣང་ཞིང་གསལ་བར་གྱུར་ཅིག་།དེ་ལྟར་གསལ་བའི་མོད་ལ་གཟུགས་མེད
328a4 པའི་ལྷ་རྣམས་མར་མེའི་འོད་ཀྱིས་བསྐུལ་མ་ཐག་ཏུ་མཚན་དང་དཔེ་བྱད་དུ་ལྡན་ནས་སྙོམས་པར་འཇུག་པའི་སྐྱེ་མཆེད་བཞི་ལས་གྲོལ་ཏེ། དེ་བཞིན་གཤེགས་པའི་བསམ་གཏན་ལ་སོགས་པ་སྙོམས་པར་འཇུག་པའི་སྐལ་བ་དང
328a5 ལྡན་པར་གྱུར་ཅིག་། མར་མེ་འདི་གཟུགས་ན་སྤྱོད་པའི་ལྷ་རྣམས་ཀྱི་གནས་སུ་གསལ་བར་གྱུར་ཅིག་།གཟུགས་ན་སྤྱོད་པའི་ལྷ་རྣམས་ཏིང་ངེ་འཛིན་ཀྱིས་དགའ་བདེ་རྩེ་གཅིག་པ་ཉམས་སུ་མྱོང་ནས་ཕྱིར་མི་ལྡོག་པའི་ས་ཐོབ
328a6 པར་གྱུར་ཅིག་། མར་མེ་འདི་འདོད་ཁམས་ཀྱི་ལྷ་རྣམས་ཀྱི་གནས་སུ་སྣང་ཞིང་གསལ་བར་གྱུར་ཅིག་།འདོད་ཁམས་ཀྱི་ལྷ་རྣམས་ཀྱང་ལྷའི་འདོད་པའི་ལོངས་སྤྱོད་ལ་སེམས་མ་ཆགས་ཤིང་རང་གི་སེམས་ལ་ལྟ
328a7 ཞིང་བསམ་གཏན་བཞི་རིམས་ཀྱིས་སྙོམས་པར་འཇུག་པའི་སྐལ་བ་དང་ལྡན་པར་གྱུར་ཅིག་། མར་མེ་འདི་ལྷ་མ་ཡིན་རྣམས་ཀྱི་གནས་སུ་སྣང་ཞིང་གསལ་བར་གྱུར་ཅིག་།ལྷ་མ་ཡིན་གྱི་ང་རྒྱལ་དང་། ཁྲོ་གཏུམ
328a8 དང་སེམས་ཀྱི་གདུག་པ་ཞི་ནས་ཚད་མེད་པ་བཞི་དང་ལྡན་ནས་ཞི་གནས་ཀྱི་སེམས་ཡིད་ལ་བྱེད་པ་དང་ལྡན་པར་གྱུར་ཅིག་། མར་མེ་འདི་གླིང་བཞིའི་མི་རྣམས་ཀྱི་གནས་སུ་སྣང་ཞིང་གསལ་བར་གྱུར་ཅིག་།གླིང་བཞིའི་མི་རྣམས་ཀྱང
iiif viewer powered by OpenSeadragon
