| e-texts navigator |
| Wylie |
424a1 རིང་བར་འདོད་ན་སྙིང་རྗེ་དང་ལྡན་ཞིང་སྲོག་མི་གཅོད་པར་བྱའོ། །མི་ལུས་འཐོབ་པར་འདོད་ན་གསུང་རབ་སྒྲོག་པ་དང་། ཚུལ་ཁྲིམས་བསྲུང་བར་བྱའོ།།
424a2 བསོད་ནམས་ཆེ་བར་འདོད་ན་མཆོད་རྫས་དབུལ་བར་བྱའོ། །ནོར་ཕྱུག་པོ་འདོད་ན་དབུལ་པོ་ལ་ཕན་པར་བྱའོ། །ནད་མེད་པར་འདོད་ན་སྨན་སྦྱིན་པར་བྱའོ།། ཡང་བཅོམ་ལྡན
424a3 འདས་ཀྱིས་བྱང་ཆུབ་སེམས་དཔའ་ཤེས་རབ་ཡེ་ཤེས་ལ་བཀའ་སྩལ་པ། གང་ལ་ལ་ཚེ་སྔ་མ་ལ་སྡིག་པ་བྱས་ན་ཚེ་འདི་ལ་སྡུག་བསྔལ་བར་འགྱུར་རོ། །ལུས་རྟག་ཏུ་ན
424a4 བ་ནི་བདེ་བར་གཤེགས་པ་ལ་མ་གུས་པ་དང་། དགེ་འདུན་ལ་སྨད་པ་ཡིན་ནོ། །མིག་རྟག་ཏུ་ལོང་བ་ནི་ཚུལ་ཁྲིམས་སྲུང་བ་འཆལ་དུ་བཅུག་པ་ཡིན་ནོ། །རྐང་ལག་ཞ་བ
424a5 ནི་མེ་སྦར་བས་བསྡིགས་པ་ཡིན་ནོ། །སྐད་ཀྱི་དོན་མི་གསལ་བ་ནི་སངས་རྒྱས་དང་། ཆོས་ལ་སྨད་པ་ཡིན་ནོ། །རྣ་བ་འོན་པ་དང་། ངག་ལྐུགས་པ་ནི་གསུང་ལ་སྡང་བ་དང་།
424a6 དམ་པའི་ཆོས་ལ་སྨད་པ་ཡིན་ནོ། །སྣས་དྲི་མི་ཚོར་བ་ནི་དྲི་མི་ཞིམ་པའི་སྤོས་ངན་པ་བསྲེགས་པ་ཡིན་ནོ། །མིག་དམར་བ་ནི་ཐེག་པ་ཆེན་པོའི་ཆོས་ལ་སྨད་པ་ཡིན་ནོ། །
424a7 གཟུགས་དཀར་ཞིང་དམར་བ་ནི་མཆོད་པ་རྒྱ་ཆེན་པོ་བྱས་པ་ཡིན་ནོ། །ལུས་ཁ་དོག་གནག་ཅིང་རིད་པ་ནི་དེ་བཞིན་གཤེགས་པའི་སྐུ་ལ་དུ་བ་བཏང་བ་ཡིན་ནོ། །རྒས་ནས
iiif viewer powered by OpenSeadragon
