| e-texts navigator |
| Wylie |
330b1 ཅད་དང་མི་འགྲོགས་པར་བྱའོ། །སྐྱེས་བུ་དམ་པ་དག་།དྲན་པའི་ཡེ་ཤེས་ཀྱི་གོ་ཆ་དེས་ནི་ཐམས་ཅད་མཁྱེན་པ་རྟོགས་པར་ནུས་སོ། །བྱང་ཆུབ་སེམས་དཔའ་ལྷུན་པོ་ཆེན་པོས་སྨྲས་པ།
330b2 འདི་ལྟ་སྟེ། སངས་རྒྱས་ཀྱི་ཡེ་ཤེས་དེ་ནི་འཇིག་རྟེན་ཐམས་ཅད་ལས་མངོན་པར་འཕགས་པའི་ཡེ་ཤེས་ཏེ། དེ་ནི་ཚད་ཡོད་པའི་སྤྱོད་པས་རྟོགས་པར་མི་ནུས་སོ། །དེ་བས་ན
330b3 བསམ་པ་འཇིག་རྟེན་ཐམས་ཅད་ལས་མངོན་པར་འཕགས་པ་དང་། ཐོས་པ་འཇིག་རྟེན་ཐམས་ཅད་ལས་མངོན་པར་འཕགས་པ་དང་། དད་པ་འཇིག་རྟེན་ཐམས་ཅད་ལས
330b4 མངོན་པར་འཕགས་པ་དང་། སྦྱིན་པ་འཇིག་རྟེན་ཐམས་ཅད་ལས་མངོན་པར་འཕགས་པ་དང་། དེ་བཞིན་དུ་ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། བསམ
330b5 གཏན་དང་། ཤེས་རབ་འཇིག་རྟེན་ཐམས་ཅད་ལས་མངོན་པར་འཕགས་པ་དང་། བསོད་ནམས་རི་རབ་ལྷུན་པོ་བཞིན་དུ་མངོན་པར་འཕགས་པས་ཐམས་ཅད་མཁྱེན་པ་རྟོགས
330b6 པར་ནུས་སོ། །བྱང་ཆུབ་སེམས་དཔའ་མཐོང་ན་དགའ་བས་སྨྲས་པ། སྐྱེས་བུ་དམ་པ་དག་།གང་གི་ཚེ་ན་བྱང་ཆུབ་སེམས་དཔའ་བདག་གི་གཟུགས་ཀྱི་སེམས་ཡོངས་སུ་དག་པས
330b7 གཟུགས་སུ་སྣང་བ་ཡིད་དུ་མི་འོང་བ་གང་ཡང་མིག་གིས་མཐོང་ཞིང་སྣང་བར་མི་འགྱུར། བདག་གི་རྣ་བའི་སེམས་ཡོངས་སུ་དག་པས་སྒྲ་ཡིད་དུ་མི་འོང་བ་གང་ཡང་རྣ་བས་ཐོས
iiif viewer powered by OpenSeadragon
